1«Gè ɓɔɠɔ yɛni ná, naati ti wooɠula mà,niiti ti la ɠɛni màaɠaazaɠabosu,gè ɓɔɠɔ yɛni ná, naati ti kà,zɔiti ti la ɠɛni gàiziɛzu.Zii é la ɠɛni wooɠulazu mà,gè ɠɛni ma: ‹Nà ɠaa, nà ɠaa!›2Yeenɔpɛ ka zèe maalegai la nuɓusɛiti ma ti la ɠoloni,ti ziɛzu ga pele ɲɔi,ti ʋilɛgai ta ɓɔɠɔ ɠisiɛ ɲɔiti polu.3Nuɓusɛiti be ti la ɓesu zìiɠaawana vai ʋa,ta zalaɠaiti kulazu kpeleiti su,ti ɗa ansansegiti kula ga zalaɠaizalaɠa ɠula ɠɔtuiti ma zɛɛ ɠalagiti bɛ.4Ta ɗa zei kabaiti saama, ti ɗa gɔvɛiti gaazaɠa,ti ɗa ɲi kɔtu yeɠeiti su,ti ɗa boi suai mi,ti ɗa ta-laami aniɲakaiti daave ga kɔzɔba laamianigi.5Ta nu ta ɠomina, ti ɠɛ ma:‹Mina maaɓuɠa bà, è ʋa vɔɔɠu bà,mazɔlɔɔ gòla ɲadegɛ è ʋɛ.›Naama ziɛ ʋeleiti lɛɛzu sòkpayeɠei zu, eɠɛ abu luului,abui é zosu foloi pɛ nɔ.6Kɛlɛ gè ti-ziɛ ʋelei pɛ sɛʋɛa,naa li poun gè ʋa maaɠɛ kpɔ.Nà ti zalazu, é zeeli su.Nà ta-vaaɠaaza golaiti salazu7ʋɔɔma ta ti-mɛmɛwolani tɔnɔi.Ti ansansegiti galani gizei ma zɛɛ ɠalagiti bɛ.Nà kɔɠɔgi wo, é zoloo su,ta-ɠɛɛwoti wɔlɔmaiti ma zalai.»Ɠɔoɠɔ GALAGI ɠa é boga.8Ɠɔoɠɔ GALAGI wooi ɠaa:«Siɛgi zu nu a ziɛi ɠaa la ga mɔingadɔɔɓɔi gwaai ma ɠɔpɔgi ta zu,ta ɗa ɠɛ ma: ‹À mina koloɠolo,mazɔlɔɔ tuya ɠa ba.›Ʋele nɔ ɠana nà kɛ la nà-botiɠɛ nuiti maaʋele ma,naa ɠa a kɛ gè mina ti pɛ koloɠolo ʋɔɔma.9Nà mavofodai ɠula Zakɔɓe ná-nuɓusɛiti su, ta Zuda wolodai,ti nà-gizeiti zeɠe ga tɔnɔ.Zɔiti gè yiimazeɠeni ga tiye,naati ta sɔlɔɔ ga tɔnɔ,nà-botiɠɛ nuiti ta zei ná.10Salon nɛmɛi ɠa ɠɛ ga tufa lɛnugi,daami wosuʋɛ togani goiti bɛ,Akɔɔl nɛmɛi zu ɠɛ ga sasai togani wolaiti bɛ,naa ɠa ɠɛ nà-nuɓusɛiti bɛ, ta gàiziɛ.11Kɛlɛ wɔiti wo ɠɛlɛzu Ɠɔoɠɔ GALAGI ʋa,wo yeemazu nà-gize ɲadegai ma,wo daamianigi veezu Gade ya, undaanɛ ɠalagi,wo ɗa dɔɔ zupui ve Meni ya, sei tuɠɔ ɠalagi.12Nà ʋaazu ga boɠa zɔkpɔi wo ʋɔ,wo pɛ wa ʋilɛ ɲiibiɠa, wo ɠɔdaaleʋe,mazɔlɔɔ gè toligi woni, wo la daazoni,gè ɓɔɛni wo ʋɔ, wo la woiloni.Kɛlɛ nii ɲɔuɗai gàazu, naa ɠa wo kɛɛzu.Nii wo yiimazeɠeni la,naa ɠa é la nɛɛni bɛ̀.»13Naa ɠa é ba, Maliɠii Ɠɔoɠɔ GALAGI wooi ɠaa:«Nà-botiɠɛ nuiti ta ani zɔlɔɔ, ti mi,wɔun wa, wa pului ɠwɛɛ.Nà-botiɠɛ nuiti ta ɓɔɔle,wɔun wa, wa za ga kpɔɔle wɔin.Nà-botiɠɛ nuiti ta ɠɛ koozunɛɛi zu,wɔun wa, wa ɠɛ unfegi zu.14Nà-botiɠɛ nuiti ta wooɠula ga koozunɛɛi,mazɔlɔɔ ta ɠɛ gaanɛɛi zu.Kɛlɛ wɔun wa, wa kpeei loo,wo-yiimaʋɛ laavegai ga ziizoolɛi,wa kpeei loo, wo ɓɔɠɔ maawɔin, wo yiiɠoloɠolo.15Wo-laaseigi ɠa yɛ nà-nuiti da, gè yiimazeɠeai ga tiye,ti ɗa foovooi loo la ga:‹Maliɠii Ɠɔoɠɔ GALAGI è ʋaa ɠanu!›Kɛlɛ toɠa daasei niinɛ ʋɛɛ ná-botiɠɛ nuiti ba.16Zooi ɠa, niiti ta ɠɛ pɔ, ti tuya loo ɓɔɠɔ ʋɛ,ta naa ɠɛ gaama ƓALA gila kpegi laaseigi zu.Zooi ɠa, niiti ta ɠɛ pɔ ga ti ɠona,ta konai wo gaama ƓALA gila kpegi laaseigi zu.»Geeɠɔlɔ niinɛi ta zou niinɛi«Zeemai ɠa wo kidaaʋili faiti ma ti leʋegai ná,naati ta ɲɛɛlɛ gàazu.17Mazɔlɔɔ nà ʋaazu geeɠɔlɔ niinɛi ɓɛtɛzu ta zou niinɛi,nu ɠi ge la mɔ loa pɛ mɔungi vaa wɔlɔmaiti su,nu la mɔ ɠisiaa ti zu pɛ.18À ɠoozunɛ tɔun,wo ɠɛ koozunɛɛi zu yeenɔpɛnaama vaa zu, nii gè ʋaazu kpɛtɛzu,mazɔlɔɔ nà Zeluzalɛme ɓɛtɛzu, é ɠɛ gaanɛɛi zu,ná-nuɓusɛiti ti ɠɛ koozunɛɛi zu.19Nà ɠoozunɛ nà ɓɔɠɔi Zeluzalɛme ná-faa zu,nà-nuɓusɛiti faa ɠa ɠɛ ga nà-koozunɛɛi ma ungi,nu la mɔ kpee woo mɛniga ná, ɓaa kidaaʋili kpee.20Nu la mɔ doungo ɠaa náʋɛé ʋa yɛ doungoyai zu, é ʋa za,ɓaa kpakologi é la wɔlɔzaɠani gola.Mazɔlɔɔ zɔi a zaana ná-kona ungilagi (100) ma,naa zaa nu niinɛlai zu,ni nui ta la ɠɛ ɓudɛni kona ungilagi (100) maazutoɠa leve ga kotoʋɛ.21Ta pɛlɛiti to, ti yɛ ti wu,ti leezɛn ɓeleiti da, ti ma waaiti mi.22Ti la mɔ pɛlɛiti toga gataɠiligaa ti zei bu ti-ʋotogi zu,ti la mɔ gulu ɓeleiti daa gataɠiligaa ti-laamiani.Mazɔlɔɔ nà-nuɓusɛiti sii zu ɠa ɠooza eɠɛ gulu wolaiti.Nuiti gè yiimazeɠeai ga tiye,ta yiimaɠɛ ta-wotii ma lɔnɔgi zu.23Ti la mɔ ɓɔlɔa wafuun,dointi ta ti zɔlɔɔ,naa tanɔpɛ ge la mɔ ɠɛa ná undaaʋili faa ma.Ti-ma zuwuzui ɠa ɠɛ ganii Ɠɔoɠɔ GALAGI tuyai loai ma,ti-mavofodai nɔnɔ zɔlɔɔ ti ɠoba.24Aisa ti ʋa wooɠula mà,gè ɓega ga ti wooɠaaʋote,aisa ti ʋa ɓe ga ɓɔɛ,gè ɓega ga ti wooɠaaʋote.25Zuluɓui ta baala ziʋoi ta ɠɛ tufai miizu ada ɠila,zalai ɠa ɠɛ tufai miizu ga nikɛi ɠɛʋele,kaalii laamianigi ɠa ɠɛ ga fufiligi.Faa ɲɔu ɓaa faa zuɠoloɠolo faa nɔpɛge la ɠɛa nà-gize ɲadegai ma,»Ɠɔoɠɔ GALAGI wooi ɠana.