1Maliɠii Ɠɔoɠɔ GALAGI ná-Zɛnvui ɠa bà,mazɔlɔɔ é gulɔ ɲadegai ziɛʋɛ mà gagè woo niinɛ ʋagɔi wo bala nuiti ma.Ungo, é tèʋegɛ ga gè ɓɔ kiteʋe nuiti ba,gè daazeeli kɔɔ luɔiti ma ga ti viega é zo za ma,gè bo kasoɠa nuiti ma ga ti ʋilɛga, ti ɠɛ ɓɔɠɔ yeema.2Gè konagi ná-fai wo,nii Ɠɔoɠɔ GALAGI ʋaazu ná-nuɓɔɠɔlai ɠulazu la kɛlɛma ná-nuɓusɛiti bɛ,foloi ada-ƓALAGI ʋaazu nɔnɔ ʋotokulazu la sili nuiti ma,é naati gaanɛɛnɛ, niiti ti wɔlɔzu.3Zɔiti gɔlɔ wo seɠei ti ɠɔba Siyɔn,gè masa bɔɔlɔgi ve ti ya zuʋui ʋotogi zu,gè koozunɛ wulɔi ziɛ ti unma gɔlɔi ʋotogi zu,ʋɛ ti ziiɠoloɠologai ná,gè ti maaɠili ga lɛbiya zeɠei,naa ɠa a kɛ ti loli ga:«Telebodai ma sɛne guluiti,Ɠɔoɠɔ GALAGI ná-kpelei,niiti ti ná-lɛbiyai ɠulazu kɛlɛma».4Ta ada wɔlɔmaiti to ʋolu, ti ɠoloɠologai,ti pɛlɛ wɔlɔmaiti to ʋolu, ti woloni kaite,ta taa wolaiti kpɛtɛ ʋolu,niiti ti ɠoloɠoloni kaite.5Wɛɛinti ta ʋa, ti zei ná,tiya ɠa ta ɠɛ wa-loganiiti tosu.Nui naati ka ta ɠɛ wa-liiti kɛɛzu,ti ɗa wa-leezɛn ɓeleiti da.6Wɔun wa loli ga:«Ɠɔoɠɔ GALAGI ná-zalaɠa ɠula nuiti».Ta ɠɛna wa vaa woga, ta ɠɛ ma:«Ada-ƓALAGI ná-botiɠɛ nuiti».Wa zii ɠiligiti ta-lɔnɔgiti mi.Wa wokomaalɛ ga ta-naavoloiti.7Adaʋɛ ti wo unfeni ná,wa lɛbiyai zeizu felegɔ zɔlɔɔ miná.Ʋɛ ti ɓaaɠulani ná wo ma,wa wooɠula ga koozunɛɛi miná,tɔɔzei wa wɔnɔ zɔlɔɔ seizu felegɔ nui naati wa-yooi zu,wa wa-eteai ziɛ ná koozunɛɛi zué zo niizu ma eyɛsu ɠɔ.8«Nà, Ɠɔoɠɔ GALAGI, sɔle fai ɠa nɛai bɛ̀,kɛlɛ toomai wɔinzeɠeʋɛ mà, ta yaavai.Nà wa-ɠulanumai ve wo ya wooɠɛɠiladai zu,nà minazeɠe bo wo ʋɛ ga ɠɔoɠɔ kelei.9Wo-mavofodaiti ta ɠwɛɛ zii ɠiligiti saama,ti-mavofodaiti ta ɠwɛɛ nuɓusɛiti saama.Zɔiti pɛ ta ɠa, ta ti ɠwɛɛ gamavofodai Ɠɔoɠɔ GALAGI tuya loai ma.»
Faanɛɛ wuuɠwɛɛ guyei
10Ɠɔoɠɔ GALAGI ɠa bɛ̀ ga koozunɛɛi ma un golai.Zìilaaʋɛ, tɔɔzei nà-GALAGI ná-faa zu,mazɔlɔɔ toɠa màaɠilizu ga kizogi ma zeɠei,é telebodai ma zeɠei veleveleni mà,eɠɛ anzazini niinɛi é ɓɔɠɔ maaɠilizu ga zalaɠa ɠula nui ná-seɠei,ɓaa mu anza ɓeai é ɓɔɠɔ maaɠilizu ga ná-bala ʋagɔiti.11Tama, ʋelei zooi ani ʋɔnɔgiti kulazu la,kpelei ná-ani zuwuiti pɔnɔ,zekana, Maliɠii Ɠɔoɠɔ GALAGI a kizogi ta maamusɛi ʋɔnɔ da,zii ɠiligiti pɛ gaazu.