Read Ezayi 60

Ezayi60tod_pbt

Wozakala niinɛi é Zeluzalɛme ma

¹Wuzeɠe, è volo, mazɔlɔɔ ɗa-wozakalagi ɠulaa,Ɠɔoɠɔ GALAGI ná-lɛbiyai è maa ɠɛa kala.²Mazɔlɔɔ kpidii eteai maaɓɔlega,kpidii ʋɛa nuɓusɛiti ma.Kɛlɛ ɗɔun ɗa, Ɠɔoɠɔ GALAGI è maaɠalaga eɠɛ foloi é ɠulazu.Ta ná-lɛbiyai ɠa, é ɗa volo è ma.³Zii ɠiligiti ta li ɗa-wozakalagi ʋɔ bɛ,masagiti ti ziɛ ma zezei ɠa kulaai è ʋɛ.

⁴Wɛlɛ ga pagɔ è-maaɠoolii zu,wɛlɛ è-lointi ba ti ʋaazu,ti ɠaalɛa ba è ɠoba.È-loun zunuiti ti zeelia, ti zeɠe ɠoozama.Numaa ti è-loun anzanuiti daa yeeloko zu, ti ʋa ga tiye.⁵Ɗa ti ɠaana, è-ɠaazuʋɛ ɠa volo ga undaanɛɛi,naati ta è laavɔ, è yiilaave ga koozunɛɛi.Mazɔlɔɔ kpoloɗɛi ʋaalɔnɔgi pɛ ka ʋa è ʋɔ,zii ɠiligiti ta-ɠulanumaiti pɛ ta zeeli è ʋɔ bɛ.⁶Ɗa-yooi zulaa ɠa ve ga ɲɔmɛ ɓulugiti,Madiyan ta Efa nuiti ta-ɲɔmɛ ɓulugiti,ti pɛ ta ʋa, ti zeɠe Saɓa.Ta ʋa ga zanugi ta ansansegi,ti ɗa Ɠɔoɠɔ GALAGI ɠɛɛ vaiti maawuye.⁷«Kedaal nuiti ta-logani ɓulugiti ta ɠaalɛ ba è ʋɔ bɛ,Neɓayɔte ʋaala sinɛ wolaiti ta ɠɛ è yeema.Ta ɠula ga gala zalaɠaiti nà-zalaɠa ɠulazuʋɛ, ti zìima,nà nà-pɛlɛwuʋɛ volo ga nà-wozakalagi.

⁸«Ɓɛɛni kanu ti ɠoʋesu eɠɛ tonaɓiingaa,ɓaa eɠɛ poopogaa ti liizu ti-laɠagi zu?⁹Mazɔlɔɔ ziɛ zaama yooiti ta kpoloɗɛi laaʋɛ yooiti kitogɛ bà,Taalasise ɓato wolaiti ese ta ʋa,ti zeɠe ga è-loun zunuiti ɠoozama,ta ta-waliiti ta ta-zanugiti,ti lɛbiyai ve Ɠɔoɠɔ GALAGI ʋɛ, ɗa-ƓALAGI,Izilayɛle ná-GALA Ɲadegai é vaa bu, é è wɔɔlɔ.

¹⁰«Wɛɛinti ta siɠigiti to ɗa-laaiti ma,ta-masagiti ti ɠɛ ga ɗa-wotiɠɛ nuiti,nà-ziiɠaawanai zu gè è loɠani,kɛlɛ nà-nuɓɔɠɔlai zu, nà nà-nɛɛbɛi lɛɛzu ga ɗe.¹¹Ɗa-ziɠidaʋɛti daalaogai ɠa yɛ de yeenɔpɛ,ti laa la ɠulua, folo ʋɛɛ kpidi ʋa,nii a kɛ ti ʋa ga zii ɠiligiti ta-naavoloiti è ʋɔ bɛ,ta ta-masagiti ma ɲɛkpɛiti ʋaazu ga tiye ga maaɓaai.¹²Mazɔlɔɔ zooi ɓaa masadai é la kɛɛni é ʋa boti ɠɛ è ʋɛti undaa ɠa ʋili,zooi naati ta ɠoloɠolo mɛtu.¹³Liɓan yooi ma lɔɓɔi ma lɛbiyai pɛ,sipɛlɛ gului, ta sapɛin gului ta buise gului,ti pɛ ta ʋa è ʋɔ bɛ,ti sèi ʋɛlɛ ɲadegai maanɛɛ,nà miná ʋasu gola, ʋɛ gè ɠɔɠɔi losu ná.¹⁴Niiti ti è zopele ɲɔuni,naati ti mavofodaiti ta ʋa, ti nɔkɔ è wu,zɔiti pɛ ti ɲɛɛɠulani è zu, ta nɔkɔ è ɠɔɠɔwu.Ta è-laasei pɛɛ ga:‹Ɠɔoɠɔ GALAGI ná-taa wolai,Izilayɛle ná-GALA Ɲadegai ná-Siyɔn›.¹⁵Kɛlɛi woni è ʋa, è wɔinzeɠe,nu la ɠɛni ʋaazu è ʋɔ.Kɛlɛ nà è ɠɛɛzu ga nui nɔungi wuzeɠeai yeenɔpɛ,ziiti ta yɛ ɠoozunɛɛzu ma eyɛsu ɠɔ.¹⁶Ɗa zii ɠiligiti ta-ɲiimiɗɛi zuvɔfɔle,ɗa masagiti ta-ɲiimiiti kpɔle.Ɗa kwɛɛ naazu ga nà ga Ɠɔoɠɔ GALAGI,è Ɠizo Nui, è Unmɔɔ Nui, Zakɔɓe ná-Zɛbɛ-Su-ƓALAGI.¹⁷Ʋɛ kɔlu ɓɔigi ná, nà ʋa è ʋɔ miná ga zanugi,ʋɛ kɔlui ná, gè ʋa miná ga walii,ʋɛ gului ná, gè ʋa miná ga kɔlu ɓɔigi,ʋɛ kɔtuiti ti ná, gè ʋa miná ga kɔlui.Nà yeelo ziilɛigi ʋa, é zei è unda,zɔi a zei è unda, naa ɠa ɠɛ ga telebodai.¹⁸Nu la mɔ toosu vaa mɛniga pɛ ɗa-yooi zu,ɓaa faa zuɠoloɠolo faa ta gaaʋalaba vaa ɗa-you ɠwɛmaʋɛti.Ɗa ɗa-ziɠigiti daasei pɛɛ ga: ‹Kizogi›,è ɗa-ʋɛlɛla ɓogiti daasei pɛɛ ga: ‹Maamusɛi›.»

¹⁹Eyɛsu pɛ, foloi laade mɔnɔ a ɠɛ wozakalagi veezu è ʋɛ foloi,alugi ná-wozakalagi la mɔ voloa è maazu ga kpidii.Mazɔlɔɔ Ɠɔoɠɔ GALAGI ɠa ɠɛ ga ɗa-wozakalagi eyɛsu ɠɔ,ungo, ɗa-ƓALAGI ɠa ɠɛ ga ɗa-wozakalagi.²⁰Ɗa-foloi la mɔ lia pɛ,eɠɛʋelei foloi a ɗa lii la,ɓaa kpidi wozakalagi eɠɛ alugi a la,Kɛlɛ Ɠɔoɠɔ GALAGI ɗa-ƓALAGI ɠa ɠɛ ga ɗa-wozakalagi yeenɔpɛ.È-wɔlɔ voloiti ta ɓe niina è ʋɛ.²¹Ɗa-nuɓusɛiti pɛ ta ɠɛ ga telebo nuiti,ta zooi zɔlɔɔ ga tɔnɔ, é yɛ ti ya eyɛsu ɠɔ,ma ʋɔnɔ koi ɠana gè siinni nà ɓɔɠɔi,zèei ná-botii ɠana,ga è nà-lɛbiyai ɠula kɛlɛma.²²Ɗa nu waagila (1.000) gaalu pɛlɛyeɠe goi wu,dɔi gelei ɠa ɠɛ ga zii zobo golai bɛ.Nà, Ɠɔoɠɔ GALAGI, nà ɠa nà zuvilɛ ga niima vaiti kɛa ma ziɛgi zu.

Ezayi 60 / tod_pbt

Wozakala niinɛi é Zeluzalɛme ma

Ezayi60tod_pbt