1Wooɠula ga koozunɛɛi,ɗɛi è ɠɛni ga doun zɔlɔɔtala anzanui,è la ɠɛni doun zɔlɔɔni!Guyei loo ga koozunɛɛi, è wooɠula la,ɗɛi è la doun ɠoozuwana woni!Mazɔlɔɔ Ɠɔoɠɔ GALAGI boni ga:«Anzanui kɛlɛi wogai ba, ná-dointi ta mɔin,é leʋe anzanui nɔnɔi ʋa, nii é zini bɛ.»2Ɗa-zeɠe ɠotai zuwɔɔlɔ,è ta ʋili ɗa-landaiti su è-zeizuʋɛ,mina naavoloi ɠaalu, nii ɗa kula!Ɗa-zeɠe ɠotai ma ɠaluiti sumɛɛn,è gulu ɠaazoɓagiti pilɛpele ɓɛtɛ!3Mazɔlɔɔ è maa ɠa wɔɔlɔzu adaʋɛ pɛ,è-mavofodai ɠa zei zii ɠiligiti unda,ti taa wola zuɲakaiti sulaave.4Mina lua pa, mazɔlɔɔ è la unfega,mina unfe, mazɔlɔɔ ɓaa la ɠulaa è ma.Kɛlɛ ɗa yeema è ma nu niinɛ yeei ma unfegi ma,è-ɠi ge la mɔ loa ɓaaɠulamai zu è sɔlɔɔni,è ɠɛai ma ga poanzai.5Mazɔlɔɔ è Ɓɛtɛ Nui ɠa é ga è-zinigi,daasei ka ga: «Ɠɔoɠɔ GALAGI, Fai-Pɛ-Maliɠii».Tɔ ɠa é ga è unmɔɔ nui, Izilayɛle ná-GALA Ɲadegai,daasei ka ga: «Eteai pɛ ná-GALAGI».6Mazɔlɔɔ Ɠɔoɠɔ GALAGI ɠa è lolisu ʋolueɠɛ anzanui nii sinigi daalooni,é lɔ ziizoolɛi zu, sinigi tolisu ʋolu,tɛigi é ɠɛni ga naa ziɛpolu ɲɔɠɔi ma nu niinɛlai zu, kɛlɛ é ɠɛlɛ ba.Naa ɠa Ɠɔoɠɔ GALAGI ɗa-ƓALAGI bosu è ma.7«Gè ɠɛlɛni ɗa yeeɠɛɠala go laawu,kɛlɛ nà-maawɔinɠaa wolai zu,nà yeezeizu è wu ʋolu.8Ziiɠaawana wolai zu,gè ɠɛlɛni ga gè mina è ʋɛtɛ, yeeɠɛɠala go laawu,kɛlɛ nà-nɛɛbɛi maaʋele ma, nii kwɛ ge la ba,nà è maawɔinɠaazu.»È Unmɔɔ Nui Ɠɔoɠɔ GALAGI ɠa é boga.9«Toɠa zèa eɠɛʋelei Nowe ná-foloiti ti ɠɛni la,gè ɠonani názu ga undaaʋili ɗɛi la mɔ ʋaa,é ʋa eteai undaaʋili.Zenɔ ɠana, nà minazeɠezu,gè la mɔ yiiɠaawanaa è laalɔɠɔma,gè la mɔ zeliloga è ma.10Anɛɛ ni gizeiti ta zeɠe losuʋɛti,anɛɛ ni gize nɛmɛiti ta ɲiikpi,nɛɛbɛi é zìimaʋɛ è ʋɛ,é la valiboga eyɛsu pɛ,minai gè seɠea ga gè ɗa-undaanɛɛi ɓɛtɛ,é la valiboga pɛ.»Ɠɔoɠɔ GALAGI ɠa é boga,ziimaʋɛ laavegai ga gaazumaawɔinɠai è ʋɛ.
Zeluzalɛme niinɛi
11«Ee, taai maawɔinɗai, tɔngɔlɔ fiilɛi pɛ ge vɔɔɠuzu ba,nu la ná, é ʋa ziilɛi!Tama nɔ̀un, nà ʋaazu è losu ga niinɛ ga kɔtu zɔngɔ ɓaagiti,è ma wuulaagiti ti ɠɛ ga safiilegi ma ɠɔtui.12Nà ɗa-ziɠigi ungaʋɛti kpɛtɛzu ga kɔtu zɔngɔ ɓaagi daa ga luɓii,ɗa-ziɠidaʋɛti ti ɠɛ kɔtuiti ti volozu,siɠigi gè è maalatisu da,naa ɠɛ ga kɔtu zɔngɔ ɓaa pagɔiti.13È-lointi pɛ ta ɠɛ ga Ɠɔoɠɔ GALAGI ná-kaladopoiti,è-lointi ta-yiilɛigi ɠa wɔɔlɔ gola.14Ɗa ʋoluzei telebodai ʋa.Nu nɔpɛ ge la mɔ è ɠoloɠologa ʋolu.È la lua ani nɔpɛ ba,mazɔlɔɔ maalua vai maa ɠa ɠooza è ʋa,é la maaɓuɠaa ɗa pɛ.15Ni nua ta wuzeɠena è laalɔɠɔma,pɔ̀ ge la ɠɛa naa ʋa!Tama nu-o-nu a laalɛna è wu,naa ɠa loo bu, tɔɔzei ɗa-vaa ʋa.16Ɠida bu, nà ɠa gè ɠain bo nui ɓɛtɛni,zunui é abui ɠaazosu, é kɔɔɠɔ zɔɔlaiti kula.Kɛlɛ nà ɓalaa nɔ ɠa gè zunui ɓɛtɛa, é ti ɠoloɠolosu.17Kɔɔɠɔ zɔɔla nɔpɛ kpɛtɛai ga é faa ɲɔu ɠɛ ga ɗe,é la faa nɔpɛ paa.Ni nu ɠa pɔ é è maalɔ tukpɔɠaaleʋezuʋɛ,ɗɔun ɗa zoo è peelala ná.Ɠɔoɠɔ GALAGI ná-botiɠɛ nuiti ta-ɠulanumai ɠana,faa zɔlegai ɠana gè ti maalobosu da,»Ɠɔoɠɔ GALAGI wooi ɠana.