1Wuun, wuun, Siyɔn, ɓɔɠɔ maaɠili ga ɗa-zobogi!Ee, Zeluzalɛme, taa ɲadegai, ɗa-vɛti zeɠeiti too ɠɔba!Mazɔlɔɔ wɛɛinti, kɔzɔba nuiti, tanɔpɛ kɔɠɔ la mɔ ʋilɛga è ʋɔ bɛ si.2Ee, Zeluzalɛme, fufiligiti kpale ɓɔɠɔ ma,wuzeɠe, è zei!Ee, Siyɔn nuɓusɛi, ɗɛi è ga kasoɠa nui,ɓɔɠɔ ɠula galuiti su, ti è ɠɔgi ʋa.3Mazɔlɔɔ Ɠɔoɠɔ GALAGI wooi ɠaa:«Wo ʋɔdini ga duɔiti, wali vaa la ɠɛni su,wa unmɔɔgi zɔlɔɔsu, wali vaa la ba ɓalaa.»4Mazɔlɔɔ Maliɠii Ɠɔoɠɔ GALAGI wooi ɠaa:«Tɔɔzeizu mɔunpa, nà-nuɓusɛiti ti liini seikɔɠɔmai zu Ezipete yooi zu,ti ɓɔɠɔ maaʋela ná.Naa ʋolu Asiili nuiti ti ti maanɔɠɔ, un ge la ba.5Za voloi zu, leeni ɠa nà kɛ?»Ɠɔoɠɔ GALAGI wooi ɠana.«Nà-nuɓusɛiti ti zoni, wali vaa nɔpɛ taade,ti ɠɛ ga kasoɠa nuiti.Ti zili nuiti ti pilɛ zɔlɔɔni ti ma,»Ɠɔoɠɔ GALAGI wooi ɠana.«Yeenɔpɛ ti ɗa ɲɛɛɠula dàaseigi zu.6Naa ɠa é ba, nà-nuɓusɛiti ta kwɛɛɓɛ ɠa é ga ze.Naama volo ná, ta kwɛɛ ganà ɠa gè ɠɛni ma: ‹Nà ɠaa!› »
GALA ka unmɔɔgi wosu
7Pagɛ gola ga nu wɛlɛ keelai ʋa, é gizeiti ma,é ɗa ʋa ga woo niinɛ ʋagɔi,é ziilɛi fai laazeelizu,é ɗa undaanɛ vai wo,é ɗa zeze ga kizogi ma vai,é ɗa ɠɛ Siyɔn ma: «Ɗa-ƓALAGI ɠa masadai ɠɛɛzu.»8Ɗa-laa makɛ nuiti gooi ɠana!Ti pɛ ti wooɠulaa ʋɔɔma,mazɔlɔɔ ti kaa ga ti-ɠaazuʋɛga Ɠɔoɠɔ GALAGI ʋa ʋolu Siyɔn.9Wɔi wo ga ada ɠoloɠologaiti Zeluzalɛme,à wooɠula, wo wa-ɠoozunɛɛi ɠula kɛlɛma ʋɔɔma!Mazɔlɔɔ Ɠɔoɠɔ GALAGI ná-nuɓusɛiti gaanɛɛnɛa,é Zeluzalɛme unmɔɔ.10Ɠɔoɠɔ GALAGI ná-zobogi ta ná-ɲadedai ɠulaa kɛlɛmazii ɠiligiti pɛ gaazu,eteai ɠwɛmaʋɛ pɛ ka ada-ƓALAGI ná-unmɔɔ fai ɠa, é ʋaazu la.11À li, à li, à ɠula ná ʋa,à mina vɔɔɠu kɔzɔba ani nɔpɛ ba!À zeɠe Ɓaɓilɔne taai tɛi su.À ɓɔɠɔ ɲade,wɔi wo Ɠɔoɠɔ GALAGI lɛbi aniɲakaiti seɠezu!12Wo la ɠulazu ná ʋa ga gaazuvilɛ,wo la ziɛzu eɠɛ pelaʋea,mazɔlɔɔ Ɠɔoɠɔ GALAGI ɠa losu wo luɠɔ,Izilayɛle ná-GALAGI ɠa ɠɛɛzu wo ʋoluʋɛ.
Ɠɔoɠɔ GALAGI ná-botiɠɛ nui ná-kpɔlɔiti
13«Wɛlɛ, nà-botiɠɛ nui ɠa dituɠɔma sɔlɔɔ,toɠa lɛ, é ɠɛ tosu wolaiti su,toɠa lɛbiya wolaiti pɛ sɔlɔɔ.14Ná-fai ɠulani bɛbɛi viliba,mazɔlɔɔ gaazulo pelei valiboni,nu ɠaazulosu la ɠɛni la ba.15Kɛlɛ niizu, toɠa zii ɠiligiti ma mɔinmɔin ɲade ga ɲamai vazagai.Masagiti daa ɠa vɔ ná-faa zu, ti la zooga ti ʋa ɓɔɛ,mazɔlɔɔ ta naa ɠa tiya ɓɔɠɔi, nii é la ɠɛni woni ti ma,ta naa ɠaaɠa, nii é la ɠɛni woni ti ma.»