1Ɠɔoɠɔ GALAGI wooi ɠaa Siluse ʋɔ,zunui é yiimazeɠeai la, é gulɔi ziaai ma,é sogai zee ʋa,ga é zii ɠiligiti maaɠolo tuɠɔ,ga é masagiti ta-zobogi ɠula ti ya,siɠidaʋɛti ti laaɠulugai taaiti ma,ti laalao tuɠɔ:2«Nà ɓɔɠɔi nà li è luɠɔ,ʋɛti náti ɲɔuɗai, gè ti ɠaa ɠɛ sɔli,gè kɔlu ɓɔigi ma ɓogiti suɠaleɠale,gè kɔlu zɔɠɔgiti suɓulukpulu.3Naavoloiti ti lɔɔɠuai, nà naati fe è ya,ta kulanumaiti ti lɔɔɠuai.Ɗa suɠwɛɛ naazu ga nà ga Ɠɔoɠɔ GALAGI,nɛ̀i gè è lolisu ga è-laaseigi,nɛ̀i gè ga Izilayɛle ná-GALAGI.4Nà-botiɠɛ nui Zakɔɓe maaʋele ma,Izilayɛle gè yiimazeɠeni la,gè è lolini ga è-laaseigi,gè lɛbiya losu veeni è ya,anɛɛ ni è la ɠɛni kwɛ̀ɛni.5Nà ya, nà ɠa gè ga Ɠɔoɠɔ GALAGI,gala kili ge la ná nɔ̀un polu ɲɛgɛlɛin,taɠili ge la ná nɔ̀un polu.Gè è zaamaɠilini ga zɛbɛi,anɛɛ ni è la ɠɛni kwɛ̀ɛni.6É zo folo ɠulazu, é li folo liizu,ɛsɛ pɛ ge kwɛɛ ga ani ɠili ge la ná nɔ̀un polu.Nà ɠa gè ga Ɠɔoɠɔ GALAGI,taɠili ge la ná nɔ̀un polu.7Nà ɗa wozakalagi ɠulaa, gè kpidii ɓɛtɛ.Nà ɗa undaanɛɛi ve, gè maanɔɠɔi ɓɛtɛ.Nà, Ɠɔoɠɔ GALAGI, nà ɠa gè naa kpein kɛ.8«Ee, geeɠɔlɔgi, kizogi ʋu, é zeɠe geezuʋɛ eɠɛ nɔɗagi!Tonaɓiingiti ti telebodai ʋu.Zooi laalao, é kizo fai yɛna,é vaza, telebodai ʋɔnɔ!Nà, Ɠɔoɠɔ GALAGI, nà ɠa gè niima vaiti kpɛtɛa.»
Ani ɓɛtɛ nui ta ná-kpɛtɛ anii
9Maanɔɠɔ ɠa naa ʋɛ, zɔi é Kpɛtɛ Nui zakpesu!Leeni ɠa è ga ɗe, pɔlɔ liɠii zɔɔma ʋɔlɔ liɠiiti saama?Penɛi ɠa zoo nɛi é ɠɛ kpɛtɛ nui ma:«Leeni ɠa è kɛɛzu?»Pɔlɔ liɠii ɠa ɠɛ nɛi kpɛtɛ nui ma:«È yea la ʋani?»10Maanɔɠɔ ɠa naa ʋɛ, zɔi a zoo é ɠɛ doun kɛɛɠɛi ta ma:«Doin ma ɓɛgele ɠa é sɔlɔɔni miná?»ɓaa anzanui ta ma:«Leeni vaa zu é dointi sɔlɔɔsu?»11Ɠɔoɠɔ GALAGI wooi ɠaa,Izilayɛle ná-GALA Ɲadegai, tɔungi é kpɛtɛai:«Wa zoo nɛi wo gàazaɠa dòinti ta-vaa zu,wo devea ve zèa, maanɛai gè kɛ?12Nà ʋe de, nà ɠa gè zooi ɓɛtɛai,gè nuɓusɛi ɓɛtɛ, gè pu ga.Nà ya, zèeiti ka ti geei zuvieni,nà ɗa devei ve su somideɠa ɓulugiti zea.13Nà ɠa gè Siluse logai ga telebodai,nà ná-peleiti suɓɛtɛzu.Tɔ ɠa é nà-taai losu,é nà-nuiti unmɔɔ, ti liini ga tiye duɔlai zu,unmɔɔ gani vaa la su, ɓaa lobɛani vaa.»Ɠɔoɠɔ GALAGI, Fai-Pɛ-Maliɠii ɠa é boga.14Ɠɔoɠɔ GALAGI wooi ɠaa:«Ezipete ná-kulanumaiti ta Etiyopi ná-tɔnɔitita Seɓa nuiti tɔnɔi, kooza nui naati,ti pɛ ta li è ʋɔ bɛ, ti ɠɛ ga ɗɔnɔ.Nuɓusɛi niiti ta ʋilɛ è ʋolu,ti ɗa ziɛ, ti ɠiliai ga galuiti,ta nɔkɔ è wu, ti ɗa è maanɛɛnɛ,ti ɠɛ ma: ‹È ʋɔ bɛ ɠila nɔ ɠa GALA ge ná,taɠili ge la ná tɔun polu,mazɔlɔɔ zɔɔma ɠalagiti pɛ ta ga fuun gani.› »15Ee, GALA, gaamai zu,ɗa ga GALAGI è ɓɔɠɔ lɔɔɠuzu,Izilayɛle ná-GALAGI, Kizo GALAGI!16Kɔɔɠɔ gani kpɛtɛ nuiti pɛtɛ,ɓaaɠulaa ti ma ga unfegi.Ta liizu, ti pɛ tɔungi ʋilɛgai.17Kɛlɛ Izilayɛle nuiti kizogɛ Ɠɔoɠɔ GALAGI ʋɛ ga ɠɔoɠɔ kizogi.Wo la unfega, ɓaa la ɠulaa wo ma, eyɛsu ɠɔ.
Kizogi ná-fai wogai é ɠole
18Ɠɔoɠɔ GALAGI wooi ɠaa,tɔ ɠa é geei ɓɛtɛni,GALAGI nii é zooi ɠazaʋini, é kpɛtɛ,é makɛsu ma,é la kpɛtɛni ga suɲakai yɛ, kɛlɛ é kɛɛʋɛ nii a kɛ ania ti zei su:«Nà ga Ɠɔoɠɔ GALAGI, taɠili ge la ná nɔ̀un polu.19Gè la ɠɛni ɓɔɛni dɔɔɠuzu,ɓaa adaʋɛ ta ná, ʋɛ ná zuɓidiai.Gè la ɠɛni Zakɔɓe mavofodai ma:‹À gàiziɛ fuun!›Nà, Ɠɔoɠɔ GALAGI, nii sɔlegai, naa ɠa nà ɗa bo,nà ɗa naa lɛ, nii é ga gaamai.20«Wɔi wo yɛgai vulua zii ɠiligiti saama,à ɠaalɛ ba, wo pɛ wo ʋa, à maaɓuɠa wo pɛ.Zɔiti ti ta-zaleiti seɠezu ti ga gului,ɓaa ti ɗa gala kiligiti fali,niiti ti la zooga ti ʋa nu ɠizo,ɠi ge la naati ma.21À wa-vaiti bo,nii wo losu ma, wo naa lɛ!À ɓɔɠɔɠaa, wo woola ma!Ɓɛ ɠa é niima vaiti dɛɛni kaite wɔlɔwɔlɔ?Ɓɛ ɠa é ti lɛɛni ma yeeluɠɔ?Nà laade ɓaa, nà Ɠɔoɠɔ GALAGI?É ɠula nɔ̀un polu, gala kili ge la ná.GALAGI telebogai, é kizogi wosu,é ɠula nɔ̀un polu, taɠili nɔpɛ ge la ná.22«Wo pɛ à ɠaaʋote mà, wo ɠizo,wɔi wo eteai ma zokogi pɛ su!Mazɔlɔɔ nà ga GALA, taɠili ge la ná nɔ̀un polu.23Nà ɠonazu nà ɓɔɠɔi ma,gaamai ɠa é ɠulazu dàaʋɛ,wooi nii é la zeɠea ma pɛ:‹Nuɓusɛi kpein ka ʋilɛ ɲiibiɠa, ti nɔkɔ bù,nɛgi pɛ ge ɠona bɛ̀ ga gaamai.›24Ta nà-fai wo ga:‹Ɠɔoɠɔ GALAGI ɠila kpe nɔ ɠa telebodai ta zobogi zea!› »Ti unfegai nɔ ɠa a ʋa pɔ,tɛiti ti ɠɛni laalɛɛzu bu.25Ɠɔoɠɔ GALAGI zaɓui zu,Izilayɛle mavofodai pɛ ka telebodai zɔlɔɔ,ti ɓɔɠɔ maamusɛ.