1«Kɛlɛ, nà-botiɠɛ nui Zakɔɓe ná-nuɓusɛiti,à woilo niina gòoi ma ga pagɔ,Izilayɛle, ɗa gè yiimazeɠeai ga ɗe.»2Ɠɔoɠɔ GALAGI wooi ɠaa, nii é è ɓɛtɛni,é è ɠɛʋele ɓɛtɛni è-lee ɠoozu,zɔi é ga ɗa-ɓɔba nui:«Mina lua, nà-botiɠɛ nui Zakɔɓe,Yesulun, nii gè yiimazeɠea la.3Mazɔlɔɔ nà ziɛi ʋu zooi ma, kpɔɔle wɔin ma,gè ziɛ wolaiti da zou vɔɔi zu.Nà zɛ̀nvui yei è-mavofodai ma,nà-tuyai ɠɛ è-ʋaalobai pɛ ba.4Ta ʋɔnɔ, ti wɔɔlɔ eɠɛ kpalaga tufa wundui,eɠɛʋelei guluiti ta ɗa ɠɛ la ziɛlaʋɛ.5Ta ɠa ɠɛ ma:‹Nà ga Ɠɔoɠɔ GALAGI nɔnɔ›,zɔi Zakɔɓe laaseigi ʋɛɛ ɓɔɠɔ ʋa.Ta sɛʋɛ zeei ma ga:‹Nà ga Ɠɔoɠɔ GALAGI nɔnɔ›,é Izilayɛle laaseigi ʋɛɛ ɓɔɠɔ ʋa.»
Zɛɛ ɠalagiti unfe fai
6Ɠɔoɠɔ GALAGI, Fai-Pɛ-Maliɠii wooi ɠaa,Izilayɛle ná-masagi ta unmɔɔ nui:«Nà ga ma mɔungi ta ma ɠaaɓelagi,é ɠula nɔ̀un polu, gala kili ge la ná.7Ɓɛ ɠa é ga kɛ̀ʋele?É ɠula lɛɛ, é ɓɔɛ!É gaalɛɛ ga ze ga pagɔ!Kaipa gè nuɓusɛi ɓɛtɛni ɠɔoɠɔ,faiti ti ziaa, é ti wo,ta ɓalaa niiti ti ʋaazu!8Maaɠili mina ɠɛ wo ma, nà-nuɓusɛiti,à mina lua.Gè daazeelini wo ma,gè dɛɛni ga woye, kaite naa luɠɔ,wa ga nà-zeeleiti.Gala kili ka ná nɔ̀un polu?Ɓa, fasai taɠili ge la ná,gè la gila kpalaa ɠwɛɛ.»
Kɔɔɠɔ gani kpɛtɛ nuiti
9Kɔɔɠɔ gani kpɛtɛ nuiti ti la ga ani nɔpɛ,ti-yiima anii ʋagɔiti pɛ ta ga wafuun faa nɔ,ta ga zeelei ga ti la wozaɠaazu,ti faa nɔpɛ gaaɠaazu,ti unfe faa letele nɔ ʋe.10Ɓɛ ɠa a ɗa galagi ɓɛtɛ,é kɔɔɠɔ ganigi ɠaawuun, é kpɛtɛ,nii é la faa nɔpɛ paa,naama lɔnɔgi ɠa ga leeni?11Niiti pɛ ti ʋɔɔkpɔsu ti ʋa, ta unfe,nuiti nɔ ɠa ti ti ɓɛtɛzu.Ti pɛ ti maaɓɔ lɛɛ ba ti lo ná,ti pɛ ti zasu ɠa ɓali, ti unfe.12Ɠain bo nui ɠa ɗa kɔlu ɓuɠai ta leʋega,é kpadi ga tiɠii,é kɔɔɠɔ ganigi ɓɛtɛ ga malitoi,é kɛ ga zuvikɛi pɛ.Kɛlɛ botii ɠa ɗa pului ʋili ma,toɠa na zɛbɛ la mɔ ba.Ni é la ziɛ ɓɔleni,toɠa na é ɓɔlɔa.13Gulu zaɠa nui ɠa ɗa kɔɠɔgi wo ga galui,é yeeʋozɛ naati ba ga ani ɠolegi,é kpɛtɛ ga gulu ɓɛtɛ ɠɔlui,é yeeʋozɛ mɛtu.É kɛ ga nuɓusɛi ʋaaɠulabai,gaazuʋɛ ɠɛ ga nui ɠɛʋele,nii a yɛ pɛlɛ wu.14A sɛdele gului leʋena,ɓaa é yiimazeɠe ga sipɛlɛ gului ɓaa sɛnegi,é zɛ ná, suzeeli dɔɓɔzu wuluiti saama,ɓaa é gului naa zeɠe, é ga pɛingi,nii é siinni tɔ ɓɔɠɔi,tonai ʋu ma, é ɓɛtɛ.15Tama nuɓusɛi ɠa maavai ɠɛɛzu ga niima wuluiti,é ɗa gala, é ɗa ɠɔɔlɛ da,a abui ɠaazona, é laaɠoli ga.Naama wulu ɠilagi nɔ ɠaé kpɛtɛzu ga galagi ɓɔɠɔ ʋɛ, é ɗa nɔkɔ bu,é kɔɔɠɔ ganigi ɓɛtɛ, é ɗa nɔkɔ bu.16É ná-gului ɠilazuʋɛ lɔ abui ɠa,é suai ɠili la, é mi, é yiɠo,é ɠɔɔlɛ, é ɠɛ ma:«Ga-o, gè ɠɔɔlɛga, nà abuzogi ɠaazu!»17É gului mɔtai zeɠe,é kpɛtɛ ga galagi, naa ɠɛ ga kɔɔɠɔ ganigi,é ɗa unpilɛ bɛ, é nɔkɔ bu,é ɗa fali ga: «Ùnmɔɔ!Mazɔlɔɔ ɗa è ga nà-galagi!»18Niima nuiti, ɠi ge la ti ma,ti la faa ɠaaɠaazu.Ti-ɠaazuʋɛti pɛɛʋɛ ma,ti la faa yɔɠɔzuɠaazu,ta-ɠisiɛiti suɓuɠaʋɛ, ti la faa ɠaaɠaa la.19Ti tanɔpɛ ge la ɠidaazu faa wu,ɠi pagɔ la ta ma, ɓaa keleɠelegi, é ʋa ɠɛ ma:«Gè gului nii ɠilazuʋɛ ɠalaa,gè ɓului mɔ ma abulekai ɠa,gè suai mɔ ga ma abui, gè mi.Kɔɔɠɔ ganigi gè kpɛtɛzu ga mɔtai ɓaaɠulama vaa ɠana!Gulu ɓuɠai ɠa gè ʋaazu gè la, gè ɗa nɔkɔ bu!»20Zuʋui ɠa é ga ti-ɠɔnɔgiti,ti-yii ʋiliga, é ti ɠaka.Ti la zooga ti-yɛnvui unmɔɔsu,tiya ɓɔɠɔi ma, ti la ɠɛ ɓɔɠɔ ma:«Nii gè makɛ ba, koleʋɛ zɛɛ ɠalagi ʋe.»
Ɠɔoɠɔ GALAGI ɠa ná-nuɓusɛiti unmɔɔsu
21«Izilayɛle, Zakɔɓe ná-nuɓusɛiti, ɠizɛ nii zu ga pagɔ:Ɗa ga nà-botiɠɛ nui,gè è ɓɛtɛni ga è ɠɛ ga botiɠɛ nui bɛ̀,Izilayɛle, gè la yeema è ma pɛ.22Gè ɗa-lɔ koloɠologiti kpalega, ti ɲɛɛlɛ eɠɛ tonaɓiingi.Ɗa-ɠotoiti ti ɓalega eɠɛ ɓumugi.Ɠale ma, è ʋa pɔ̀, mazɔlɔɔ gè è unmɔɔga.»23Geeɠɔlɔgiti à ɠoozunɛ, mazɔlɔɔ Maliɠii ɠa botii ɠɛɛzu,zooi ɓomaʋɛti, à vuka ga koozunɛɛi!Guluiti, dɔɓɔiti, gizeiti, à vuka ga koozunɛɛi!Mazɔlɔɔ Ɠɔoɠɔ GALAGI Zakɔɓe unmɔɔga,é ná-lɛbiyai ɠulaa kɛlɛma Izilayɛle.
Eteai Ɓɛtɛ GALAGI ɠa é ga Fai-Pɛ-Maliɠii
24Ɠɔoɠɔ GALAGI wooi ɠaa,è Unmɔɔ Nui, é è ɓɛtɛni è-lee ɠoozu:«Ungo, nà, Ɠɔoɠɔ GALAGI, nà ɠa gè niima aniiti pɛ kpɛtɛni.Nà ɠila kpe ka gè geeɠɔlɔgi zuvieni,gè zooi zuvie, nu nɔpɛ ge la ɓɔni bà.25Niizu gè ungaiziɛ nuiti ta-yɛɛ vaiti kɛa ga fuun,é lo ʋelela ʋele vaiti ba.Niiti ti ʋelela ʋele vaiti bosu,gè ti ʋalaga ta-vaaɠaaɠaiti ma.Gè ɠima nuiti kulaa ʋoluzu,gè dɛɛ ga tiye, ʋelei ta-vaaɠaaɠai ga ɠimalalai la.26Kɛlɛ nà naa ɠɛ, nii nà-botiɠɛ nui é boni.Nii nà-keelaiti ti boni,nà naama vaazeikpasui pɛ pilɛ su.Gè boga Zeluzalɛme ná-faa zu ga:‹Sulaa ɠa ve ʋolu,ʋɛ pɛ naa ɠoloɠologai, náti ta ɓɛtɛ ʋolu.›Gè boga Zuda laa wolaiti faa zu ga:‹Ti pɛ ta losu ʋolu.›27Gè ɠɛ kpoloɗɛiti ma:‹À vɔ su, nà ga wa-ɗɛiti fɔ su!›28Nà bosu Siluse ná-faa zu ga:‹Nà-togani makɛ nui ʋe,toɠa ziɛ ga zìima vai pɛ.Toɠa deveiti fe,tama Zeluzalɛme ɠa lo ʋolu,GALA sei ʋɛlɛi lo ʋolu.› »