1«Wɛlɛ nà-botiɠɛ nui ʋa, gè yeezeiɗai bu,toɠa gè yiimazeɠeai la, é gòla ɠoozunɛɛzu.Gè nà-Zɛnvui yeiɗa ma ga é telebodai lɔ zii ɠiligiti saama.2É la kpee loa, goo ɠaa la ɓainga,é la kpɔɛzuɠula wola ɠɛa koi yɔɠɔzuʋɛti.3É la seeli kpaku ɠalea ga, nii golowoloai,é la sɔmɔgi ʋaa, nii gaayeizu,kɛlɛ toɠa telebodai lɔ é zoloo gaamai ma.4Zeezu la ɓɔlɔa, iɲɔ ge la leʋea,eyɛsu é telebodai lɔ eteai zu,eyɛsu ziɛ zaama yooiti ta kpoloɗɛi laaʋɛ yooiti ti wɔin ga ti ná-tɔgiti sɔlɔɔ.»
Wozakalagi zii ɠiligiti bɛ
5GALA, Ɠɔoɠɔ GALAGI wooi ɠa,é geeɠɔlɔgi ɓɛtɛni, ʋɛ kpein suviegai ná,é zooi ɠɛʋele ɓɛtɛ, ta anii pɛ é ʋɔnɔsu ga,é zɛnvui veeni nuɓusɛiti pɛ zea zooi ɠa,é zɛnvu viilɛi veeni naati pɛ zea, ti yɛnvuzu, é ɠɛ ma:6«Nà, Ɠɔoɠɔ GALAGI, gè è lolini nà-faazeikpasu ʋagɔi ʋɔ.Nà yeezeizu è wu, gè è makɛ, gè è zeiga gè è ɠɛ ga minazeɠegi zu ɠaegi nuɓusɛiti bɛ,ga è ɠɛ ga wozakalagi zii ɠiligiti bɛ,7ga gaazuɠole nuiti gaazuʋɛ zeɠe ma,ga kasoɠa nuiti ti ɠula duɔlai zu,è naati kula ta-ɠasoi ɠa, niiti ti zeizu kpidii zu.8«Nà ga Ɠɔoɠɔ GALAGI, dàaseigi ɠana.Gè la vaa bu nà-lɛbiyai ʋa ve taɠili bɛ̀,ta nà-unfemai ʋa ve kɔɔɠɔ ganigiti bɛ.9Faa mɔungiti ti ɓega ga ɠɛ,ma niinɛa ɠa gè ti wosu wo ma,nà ti wosu wo ma aisa ti ʋa ɠɛ.»
Guye niinɛi
10À guye niinɛi loo Ɠɔoɠɔ GALAGI ʋɛ.À maamusɛ eteai zu ná pɛ,wɔi wo ziɛzu kpoloɗɛi ɠa,ta fuluaniiti wo zeini bu,ta ziɛ zaama yooiti ta ti zu aniiti!11Teʋebai ta teʋebai zu laaiti,Kedaal ɓalaɠaiti, wo pɛ à wooɠula!Sela nuiti, à maamusɛi wo ga koozunɛɛi!Koozunɛ wooi ɗa ɠula gizei unmaʋɛ!12Ti lɛbiyai ve Ɠɔoɠɔ GALAGI ʋɛ,ti zeze ga maamusɛ vai ziɛ zaama yooiti ta kpoloɗɛi laaʋɛ yooiti su.13Ɠɔoɠɔ GALAGI ɠa ɠula eɠɛ kɔɔɠuluɓai,eɠɛ kɔɔɠɔ nu wolai é ɠɛʋele ɓɛtɛ ga é kɔɔi ɠɔ,é kɔɔɠɔ ɓee wolai loo,toɠa pilɛ sɔlɔɔ sili nuiti ma.
Ɠɔoɠɔ GALAGI ná-faazeikpasui
14«Kaite suɠooza, gè maaɠɛni kpɔ,gè maaɠɛ kpɔ, gè ɓɔɠɔ zo,kɛlɛ niizu, nà ga kpalagi wo eɠɛ anzanui é doin zɔlɔɔsu,ziilɛɛzu la, é la yɛnvuzu ga pagɔ.15Nà gize wolaiti ta gize goiti fazasu,gè tufa wunduiti pɛ fɔ,gè ziɛ wolaiti falibo ga zou vɔɔi,gè kpoigiti fɔ su.16Nà zobo fe gaazuɠole nuiti bɛ,ti ziɛ ga pelei nii ti la dɛ ziɛni la.Ungo, nà losu ti luɠɔ pele goiti su, niiti ti la ti ɠwɛɛ.Nà kpidii valibo ti ʋɛ ga wozakalagi,ʋɛ ti-ɠɔɠɔ a ziɠa ná, gè mináti gaala.Naa ɠa é ga nà-kisiɛi, gè la zeɠea polu pɛ,kɛni gè daazeeli.17Nui niiti ti ɠalivaazu kɔɔɠɔ ganigiti ma,ti ɗa ɠɛ vololibaiti ma: ‹Wa ga gá-ɠalagiti,›naama nuiti ta ɠula ʋolu ga unfegi.»
Nuɓusɛiti ti-ɠaazuʋɛ ɠoleai,ti woizuɓɔlɔ
18«Goizuɓɔlɔ nuiti, à woilo!Gaazuɠole nuiti, à ɠaazuzeɠe ma, wo wozaɠa!19Ɓɛ ɠa gaazuɠoleni, nà-botiɠɛ nui laade ɓaa?Ɓɛ ɠa deɠɛmu goizuʋɛ ɓɔlɔni, eɠɛ nà-keelai gè teʋesu?Ɓɛ ɠa gaazuɠoleai, kɛni zɔi Ɠɔoɠɔ GALAGI seiɗai ʋolu?Ɓɛ ɠa goizuɓɔlɔai, Ɠɔoɠɔ GALAGI ná-botiɠɛ nui laade ɓaa?20È ani mɔinmɔin kaa,kɛlɛ è la gila kpalaa gaaɠaani.È-woiyeɠeiti daalaogɛ,è la faa nɔpɛ mɛnini.»21Ɠɔoɠɔ GALAGI vaani bu, ná-telebodai maaʋele ma,é dɛɛ ʋelei ná-tɔgi wɔɔlɔai la, maayiki.22Anɛɛ naa ʋe, wɛlɛ nuɓusɛiti ba,ti looni ti ma, ti ti maavo.Ti pɛ ti ɠɔɔni ga balii zeɠei zu,ti lɔ kasoi ɠa dɔɔɠuzu.Ti looni ti ma, nu nɔpɛ ge la ti unmɔɔni.Ti liini ga tiye, nu nɔpɛ ge la ɠɛni ma:«À ɠale ma ga tiye!»23Wo zaama, ɓɛ ɠa é woilosu niima vaiti ma?Ɓɛ ɠa a dama kpɛ ga é woilo ti ma yeeta?24Ɓɛ ɠa é Izilayɛle ʋɔdini, Zakɔɓe mavofodai,naati ma, niiti ti looni ma,ta naati ma, niiti ti kɔligiti seɠeni?Ɠɔoɠɔ GALAGI laade ɓaa,nii ti kotoi ɠɛɛni daalɔɠɔma?Ti la ɠɛni vaani bu, ti ʋa ziɛ ga ná-peleiti,ta ti la ɠɛni woiloni ná-tɔ gooiti ma.25Naa ɠa é kɛɛni, Maliɠii ná-ziiɠaawanai zeelini ná-nuɓusɛiti ma,ta kɔɔi ma vaa zuɠoloɠologi.Naa ti maaɠoolini mini-o-mini ga abuzogi,kɛlɛ Izilayɛle la ɠɛni tanɔpɛ gaaɠaani.Abui naa galani,é la ɠidaani bu, é ʋa ɠisiɛ su.