1Ziɛ zaama yooiti ta kpoloɗɛi laaʋɛ yooiti,à maaɠɛ kpɔ tùɠɔ, wo gòoi mɛni!Nuɓusɛiti ti zɛbɛi niinɛ ʋolu, ti maaɓuɠa, ti ɓɔɛ.Ungo, ade li ʋɔɔma tukpɔlosuʋɛ.2Ɓɛ ɠa é naa wuzeɠea folo ɠulazu ʋele,zɔi telebodai ziɛzu kɔɠɔ ʋogi zu?Ɓɛ ɠa é ziiti dɔa zeezu,ta ɓɛ ɠa é masagiti gaayeiɗa?Ná-boɠa zɔkpɔi ɠa ti vukɔzu eɠɛ fufiligi,ná-mɛɛin ɗa ti zuvaza eɠɛ molo ɓooloi,fiilɛi seɠezu, é ɗa lii la.3Toɠa ti ɓɛɛzu, é li ɠoozama, faa la ba,é ɗa li ga pelei nii é la dɛ ziɛni la ɠila.4Ɓɛ ɠa é vaazu bu pɛ fai niiti ti ʋa ɗa ɠɛ?Naa ʋe, nii é yeeɠɛɠalai ɠilagilagi zu nuiti tolisu,kaite tɔɔzeizu mɔunpa.«Nà ʋe, Ɠɔoɠɔ GALAGI, nɛ̀i gè ga ma mɔungi,ta gè ma ɠaaɓelagiti ba, ungo, nà ɓɔɠɔɓɔɠɔgi ʋe.5Ziɛ zaama yooiti nuɓusɛiti ta kpoloɗɛi laaʋɛ yooiti su geleiti ti kaani, ti lua,nuiti ti zeini zou ɓela ga, ti tɔɔzeini ga sasuɓali,ti ɗa maaɓuɠa, ti ɗa ʋa.6Ti ɗa ɓɔ ɓɔɠɔ ʋa,ɛsɛ ge ɗa ɠɛ kɛɛɠɛloin ma: ‹Yiilɔɔ!›7Ɲɛɛliɠi nui ɗa zanu kpɛtɛ nui iɲɔdɔ.Zɔi é suɓilisu ga malitoi,naa ɗa iɲɔdɔ, nii é doɠazu kɔtui ma.Ta kpatana ɓɔɠɔ ʋa, ti ɠɛ ma:‹Boti ʋagɔi ɠa kɛai.›É kɔɔɠɔ ganigi ɓakpani ga kɔlu ɠaazoɓagiti, a ʋa ɲiikpi.8Ɗɔun ɗa, Izilayɛle, nà-botiɠɛ nui,Zakɔɓe, ɗɛi gè yiimazeɠeai ga ɗe,bɔ̀ɔlai Abalaame mavofodai,9ɗɛi dìai, gè è ɠaiziɛ zou ɓela ga,gè è loli, è zeɠe ɠoozamaʋɛti,ɗɛi gè ɠɛni è ma:‹Ɓa-o, gè la è ʋilini ya,tɔun gè yiimazeɠeni ga ɗe,nà-botiɠɛ nui ɠa ga ɗe,›10maaɠili mina ɠɛ è ma, mazɔlɔɔ nà è ʋa.Mina yiizoolɛ, mazɔlɔɔ nà ga ɗa-ƓALAGI.Nà è zɛbɛlɔɔzu, nà ná ga gè ɓɔ è ʋa,nà è maalobo ga nà-zɛbɛsu yeei, é zobogi zɔlɔɔsu.11Wɛlɛ, zɔiti kpein ti è laalɔɠɔma,ta unfe, ɓaaɠula ti ma.È-ɓɔɛɲɔɠɔiti ta ɠoloɠolo, ti ɲɛɛlɛ.12Ɗa ɓɔlɔ ga ti ɠaiziɛ, è la mɔ ti ɠaa,niiti ti ɠɛa kpɔɛi ʋɛɛzu è ʋa,ti ɗa laalɛ è wu.Ti pɛ ta ɠoloɠolo, ti la ɠɛa ga ani nɔpɛ.13Mazɔlɔɔ nà ga Ɠɔoɠɔ GALAGI, ɗa-ƓALAGI,é è zosu è-yeei ʋa,é ɠɛɛzu è ma: ‹Maaɠili mina ɠɛ è ma,nà ná ga gè ɓɔ è ʋa.›14Izilayɛle, Zakɔɓe ná-nuɓusɛiti,maaɠili mina ɠɛ wo ma,wɔiti wo levezu kpeinɲaɠagi,wɔiti wo lɛɛvɛzu eɠɛ kpeinɲaɠagi.Nà ɓɔɠɔi ɠa gè ʋaazu ɗa-ɓɔba vai ma,zɔi é ga è Unmɔɔ Nui,Izilayɛle ná-GALA Ɲadegai,»Ɠɔoɠɔ GALAGI wooi ɠana.15«Wɛlɛ, nà è ɠɛɛzu ga kaʋa loɠa wulu zɛpɛ niinɛi,kɔlu ɠaazoɓagiti ti ba.Ɗa gizeiti golowolo, è ti ʋali ga,è gize goiti so eɠɛ molo ɓooloi.16Ɗa ti ɠaavɛ, fiilɛi li ga tiye,tɔngɔlɔ fiilɛi ti zuvaza.Kɛlɛ ɗɔun ɗa, ɗa ɠoozunɛ Ɠɔoɠɔ GALAGI ɠoba,è ɓɔɠɔ maamusɛ ga Izilayɛle ná-GALA Ɲadegai ná-fai.»
Teʋebai valibo fai ga undaanɛ zɔlɔɔsuʋɛ
17«Maanɔɠɔ nuiti ta bala nuiti ta ziɛi ɠaiziɛzu,é la zɔlɔɔsu pɛ.Kpɔɔle wɔin ti-nɛgi vɔa.Kɛlɛ nà, Ɠɔoɠɔ GALAGI, nà ti wooɠaaʋote,nà, Izilayɛle ná-GALAGI, gè la ɠɛlɛa ti ʋa pɛ.18Nà ziɛ wolaiti da gize unmaʋɛti, niiti gulu la ti ma,gè ziɛungiti da nɛmɛiti su,gè teʋebai valibo ga kpoigi, ziɛi daavegai,zou vɔɔi zu ɠɛ ga ziɛ yeizuʋɛ.19Nà sɛdelegi ta akasiai ta milɛtegi wuluitita wolive wuluiti sin teʋebai zu.Adaʋɛti ziɛ la ná,nà sipɛlɛ gului ta sapɛingi ta buisegiti pilɛ miná,20naa ɠa a kɛ ɛsɛ pɛ ge ka, ti kwɛɛ,ti ɠida bu, ti gaaɠa,ga Ɠɔoɠɔ GALAGI yeei ɠa é naa pɛ kɛai,Izilayɛle ná-GALA Ɲadegai ɠa é ga ti pɛ Kpɛtɛ Nui.»
Zɛɛ ɠalagiti ta-vai
21«Wa ʋe, zii ɠiligiti ta-ɠalagiti, à wa-vaiti dɛɛ,»Ɠɔoɠɔ GALAGI ɠa é boga,«à wa-woozuɠulagiti dɛɛ lɛɛ,Zakɔɓe ná-masagi ɠɛ naa.22À maaɓuɠa, wo naa zuɠula gi ma, nii é leʋesu.Faa mɔungiti ti ɠɛɛni, naati ti ɠɛni ga ɓɛgeleni?À bo dɛɛ, gá ɠigaiziɛ su.Ɓaa mu nii é ʋaazu ɠɛɛzu ná luɠɔi zu,wo naa lɛ ga giye, gi ɠɛ kwɛɛ.23À faiti dɛɛ lɛɛ ga giye,ti ʋaazu ɠɛɛzu ná luɠɔi zu,gá kwɛɛ naazu ni gaamazu wa ga galagiti.À faa ʋagɔ go nɔ ɠɛ lɛɛ, ɓaa ma ɲɔu go,ga gi ɠaazuzeɠe ma, gi ɠɛ ga ma zeeleiti.24Kɛlɛ wɛlɛ, naa ɲaka vizɔgɛ wo ʋa,faa ɲaka nɔ ɠa wo kɛɛzu.Nu a yiimazeɠena ga woye,ga wo ɠɛ ga galagiti,toɠa ɠɛ ga ɓaaɠulama vaa nɔ.25«Munu, lɛkpɛmaʋɛ nu ɠɔʋɛzuʋɛ,gè zunu ɠila pilɛgɛ pelei ma,wɛlɛ toɠa nuu é ʋaazu.Munu, folo ɠulazu ʋelei, toɠa dàaseigi maalolisu,toɠa kundiɠiiti gaayɔsu,eɠɛʋelei nu a ɗa palaʋalai ɠaayɔ da,ɓaa eɠɛʋelei pɔlɔ liɠi lo nui a ɗa ɠɔɠɔlo da pɔlɔi zu.26Ɓɛ ɠa deɠɛmu é niima vai woni,kaite ma yeeluɠɔ, gi ʋa suɠwɛɛ?Ɓɛ ɠa é boni ma yeeluɠɔ,gá ʋa ɠɛ ma: ‹Gaamai ɠɛni zea›?Koleʋɛ ga wo zaama,nu nɔpɛ ge la ɠɛni zooni naa la,nu la tanɔpɛ mɛnini wo la, wo ʋa bo.27Nà ɠa mɔunpa, gè daazeeli Siyɔn,gè nu leʋe Zeluzalɛme, é li ga woo niinɛ ʋagɔi.28Gè wɛlɛni galagiti naati saama,gè la gila kpalaa kaani,é ʋa ɠɛ ga tɛnɛbo nu ɠila kpalaa.Ni nà ti ɠaazaɠana,ti la gooɠaaʋote nɔpɛ fea.29Ti pɛ ti la ga ani nɔpɛ,nii ti kɛɛzu, naa ɠa nɔ ga wafuungi.Ta-maaniinigiti ta nɔ ga fiilɛi ta faa ɲakai.»