Read Ezayi 38

Ezayi38tod_pbt

Ezekiase zeeɓɛ vai ta kɛdɛ fai

¹Naama ziɛgi zu Ezekiase zeeɓɛni, é ɠɛnina zaazu. Amɔse ná-doun zunui Ezayi, GALA goo wo nui liini pɔ bɛ, é ɠɛ ma: «Ɠɔoɠɔ GALAGI wooi ɠaa: ‹Ɗa-vaiti gaaɠula ba, é devei yɛ ɗa-ʋɛlɛyeɠei ya, tɔɔzei ɗa ga za, è la ɠulazu seeɓɛi nii zu.› »²Ezekiase ɠaaʋoteni pɛlɛi ma, é Ɠɔoɠɔ GALAGI maanɛɛnɛni ɠani:³«Ee, Ɠɔoɠɔ GALAGI, soma è ɠizɛ su ga sìɛʋɛ è ɠaazu ga wooɠɛɠiladai ta ɠi pagɔlai, gè naa ɠɛ nii pagai è ɠaazu.» Naa ʋoluma Ezekiase wɔlɔni, gaazuɗɛi ʋu ga gola.⁴Naazu Ɠɔoɠɔ GALAGI ɓɔɛni Ezayi ʋɔ,⁵ga é li, é ɠɛ Ezekiase ma: «Ɠɔoɠɔ GALAGI, è-mɛmɛwola Davide ná-GALAGI wooi ɠaa: ‹Gè ɗa-maanɛɛnɛ wooi mɛniga, gè è-ɠaazuɗɛi ɠaa. Deɠɛmu gè kona puugɔ maazu lɔɔlugɔ (15) ʋiliga è-zii zu.⁶Ɗa-o, taai nii-yo, nà wo unmɔɔsu, gè wo ɠula Asiili masagi ya, nà taai nii makɛ.›⁷Wɛlɛ Ɠɔoɠɔ GALAGI ná-poogi ʋa è ʋɛ, é dɛɛ ga wooi nii é bogai, toɠa daazeeli:⁸‹Nu lɛɛzuʋɛ Aɠaze ná-kɔɠɔ losuʋɛ wu, foloi zeɠeni niina ná, niinigi ʋɛɛ naa ma.› » Ɠɔoɠɔ GALAGI niinigi ɠulani ʋolu ga kɔɠɔ losu puugɔ, é zeɠe nu ɠɔɠɔ losuʋɛti, foloi ɗa loo naa ma ʋolu.⁹Zuda masagi Ezekiase ɠɛdɛgai ma, é ɠula ná-seeɓɛi zu, é ɠima ɓɔɛi nii zɛʋɛni.¹⁰«Gè ɠɛni ɠɛɛzu ma:‹Gè sìi ma ɠaaɠwɛ saamai nɔ ɠɛa,kɛlɛ kɛni gè li!Kɛni gè leʋe ga gɔvɛiti ta-laazu ʋele,gè ʋalaga nà-eteai ma ɠonagi mɔtaiti ma.›¹¹Gè ɠɛni ɠɛɛzu ma:‹Gè la mɔ Ɠɔoɠɔ GALAGI ɠaa,Ɠɔoɠɔ GALAGI, fulu nuiti ta-eteai zu,anɛɛ nu vulu ɠila kpalaa, etea nuiti saama.¹²Zɛ̀nvui ɠulaa zèa, é li maaɠooza bà,eɠɛ baala makɛ nui ná-seɠe ɠotai.Zɛ̀nvui ma ɠezei ɠa ɓilisu,eɠɛʋelei geze vɛlɛ nui a ɗa kɛɛ la ga ná-seɠe vɛlɛai,kpega ʋoluma ga ma ɠeze ɠaluiti teʋeleʋe.Aisa kpɔkɔi ʋa é zeeli, Màliɠii,è ɓega ga nà-fai ɠaaɓela!¹³Gè ɓɔɠɔ zoni eyɛsu sobui.Maliɠii mà ɠaeiti golowoloni,eɠɛʋelei zalai a ɗa kɛɛ la.Aisa kpɔkɔi ʋa é zeeli, Màliɠii,è ɓega ga nà-fai ɠaaɓela!¹⁴Gè ɠɛni kpee goiti toozu eɠɛ sɛʋɛzɛʋɛgoi,gè ɗa ɓala eɠɛ poopogi.Gàazuʋɛ zuɓɔlɔ ga gɔlɛi geezuʋɛ.Ee, Maliɠii, nà kidaaʋiligi zu.Ʋa è ɓɔ bà!›¹⁵Leeni ɠa nà bo?Maliɠii ɓɔɛni pɔ̀, tɔ ɓɔɠɔi é ti pɛ kɛa.Nà yɛ ziɛzu ɓɔɠɔmaayeii zu,sìi ma voloiti pɛ su,nà-ziizoolɛ vai maaʋele ma.¹⁶Maliɠii, è-laawooi zaɓui zu ɠa nu ɠa yɛnvu la è ɠoozunɛ,saɓu zu ɠa gè zɛnvui wosu da ʋolu.Ɗa pù su ʋolu, è zɛ̀nvui ve zèa mɔnɔ.¹⁷Nà-kidaaʋili golai valiboga ga ziilɛigi,mazɔlɔɔ ɗa-nɛɛbɛi zu, è kùla saai ya,è nà-faaɠaazagiti piliga ya è ʋoluʋelei.¹⁸Gɔvɛalaazu laade a è maamusɛ,saai laade a è maamusɛ,zɔiti ti laani kabai zu,naati ki ge la mɔ looni ɗa-wooɠɛɠiladai ʋa.¹⁹Fulu nuiti nɔ ɠa ta zoo è maamusɛzu,eɠɛʋelei nɔ̀un gè la za.Ɠɛɛɠɛi ɠa a ná-dointi kala ga ɗa-wooɠɛɠiladai.²⁰Ɠɔoɠɔ GALAGI kìzoni!Gá è maamusɛ ga gɛingɛin ganigitigi-zii ma voloiti pɛ su ɗa-ʋɛlɛi wu, Ɠɔoɠɔ GALAGI.»

²¹Ezayi devei woni ga: «Ti ʋa ga kooleɠoolegi ɠaawaai ɠaayɔgai, ti siɛ wologi ɠa, masagi ɠa ʋalo.»²²Ezekiase ɠɛni ma: «Poogi ɓɛgele ɠa nà kwɛɛ da ga nà zoo gè li Ɠɔoɠɔ GALAGI zei ʋɛlɛi ma ɠoizuʋɛ?»

Ezayi 38 / tod_pbt

Ezekiase zeeɓɛ vai ta kɛdɛ fai

Ezayi38tod_pbt