1Wɛlɛ, Ɠɔoɠɔ GALAGI, Fai-Pɛ-Maliɠii ɠa ʋaazuZeluzalɛme ta Zuda masadai ʋalasu poluzeizuʋɛti kpein ma,daamiani sɔlɔɔsuʋɛ pɛ, ta ziɛ zɔlɔɔsuʋɛ pɛ,2kɔɔɠɔ nu ɠɛzɛiti ta salaʋusuiti,tukpɔɠaaleʋe nuiti ta GALA goo wo nuiti,ungaiziɛ nuiti ta kɛwolaiti,3nu ʋuulɔɔlugɔ (50) ɠundiɠiiti ta seizumaanɛgiti,nu lɛnɛ nuiti ta molikulagiti,ta niiti ti zoogai zoɠo fai la gola.4«Nà buzeɠe niinɛgiti sei ti unda ga kundiɠiiti,ti masadai ɠɛ ti unda ʋelei nɛai la ti ʋɛ.5Ta ɓɔɠɔ zopele ɲɔu ti ɠilagilagi,siɛpolui ɠɛ siɛpolui laalɔɠɔma,seiɲɔɠɔi ɠɛ seiɲɔɠɔi laalɔɠɔma,buzeɠe niinɛgiti ta wuzeɠe kpakologiti daalɔɠɔma,nu ɲakaiti ti wuzeɠe seizumaanɛgiti daalɔɠɔma.»6Zunui ta ɠa ɗa yeeʋili kɛɛɠɛloin zu, ná-bolodamai ta, é ɠɛ ma:«Ɗobo gila ka è ʋɛ, ɠɛ ga ada-ɠundiɠii.Devei wo ada ɠoloɠologai tɛi unda!»7Naama volo ná, zɔi ɠa gooɠaaʋote ga woo wola, é ɠɛ ma:«Gè la ga ɗɔɠɔtɔlɔ,ani nɔpɛ ge la nà-pɛlɛwuʋɛ ga daamiani ɓaa seɠe.À mina kɛ̀ ga nuɓusɛiti ta-ɠundiɠii!»8Zeluzalɛme ɓunɛni,Zuda ɠa laani zooi ma,kpɔɛzuɠulaiti ta kɛɛwotiiti su,ta Ɠɔoɠɔ GALAGI laalɔɠɔma,ta losu daawu.9Ti ɠaazulo pelei zeele wooi woni ti laalɔɠɔma.Ta ta-ɠotoi lɛɛzu eɠɛ Sɔdɔme,ti la dɔɔɠuzu.Ti maa ɠa nɔɠɔ!Mazɔlɔɔ ta maanɔɠɔi ɓɛtɛzu ɓɔɠɔ ʋɛ.10Wa zoo wo bo telebo nui maga toɠa undaanɛɛi zɔlɔɔ,mazɔlɔɔ toɠa ná-kɛɛwotiiti ma ɠulanumai zɔlɔɔ.11Maanɔɠɔ ɠa faa ɲɔu ɠɛ nuiti bɛ!Pele ɲɔi ɠa ti ma,ta ti zo, eɠɛʋelei ti kɛɛni la.12Nà-nuɓusɛiti ta kpɔlɔi zu buzeɠe niinɛgiti zea,anzanuiti ta zeini ti unda.Nà-nuɓusɛiti, niiti kpein ti losu wo luɠɔ, ta wo ɠakasu.Pelei wa ziɛ su, ta supuzu wo ya.13Ɠɔoɠɔ GALAGI wuzeɠea tukpɔlo fai ma,é wuzeɠea, é ʋa nuɓusɛiti tukpɔɠaaleʋe.14É lia ga ná-nuɓusɛiti ta-ɠundiɠiiti ta totuɠɔiti tukpɔɠaaleʋezuʋɛ, é ɠɛ ma:«Wo leezɛn ɓelei ɠoloɠoloni.Nii wo kulani bala beaiti zea,wo naati gaalɛa ba wa-ʋɛlɛiti bu.15Leeni ɠa losu ma mu, wo nà-nuɓusɛiti fɔkisu,wo ɗa bala nuiti gaaʋolo ɠɔɠɔi wu?»Ɠɔoɠɔ GALAGI, Fai-Pɛ-Maliɠii wooi ɠana.
É lo Zeluzalɛme anzanuiti ba
16Ɠɔoɠɔ GALAGI ɠɛni ma:«Tɔɔzei Siyɔn anzanuiti ti ɓɔɠɔ wasoni,ta ɠɛna ziaa, ti ɠɔgi lo ga,ti ɠaazu geezu,ti ɗa li vaavaa,ti ɗa talagi ɓɔɛ, é ti-ɠɔɠɔ ʋa,17Ɠɔoɠɔ GALAGI ɠa kpaanagi ɠɛɛzu Siyɔn anzanuiti unmaʋɛ,é ti unma ɲakai ʋilɛ.»18Naama volo ná, Maliɠii ɠa ta-maaɠili zɔɔlaiti kula ti ma, niiti ti ga: balaɠaegiti ti ti-ɠɔɠɔiti ba, timɔ wɔɔlɔgiti, ta balai kulaai ga alu toga niinɛi,19goizu anigiti, ta balaiti, ta bɔɔlɔgiti,20masa bɔɔlɔgiti, kɔɠɔ ʋa yɔlɔɠɔiti, saamaɠili fɛlɛaiti, gulɔ maku nɛɛnɛ puu aniiti, undaanɛ zɔlɔɔ ganii,21balaɠaegiti, ta sokpazu ʋalaɠaegiti,22seɠe ʋapa golaiti, ta seɠewuzeɠe wolaiti, ta seɠeungiti, ta ɓɔlɔiti,23pɛtɛgiti, ta geze zeɠei, ta seɠe zakpai tɔungi ma, ta nii ti kpesasu ɠakai wu.24Ani luulai makugi ɠa a ɠɛ ʋɛ ta-wulɔ maku nɛɛnɛgi ná,galu ɠilagi nɔ ɠa a ɠɛ ga saamaɠiligi.Tɔun fɛlɛa ʋagɔi ɠa ɠɛ ga kpaanagi.Saa wɔlɔ wo seɠei ɠa ɠɛ ti ɠɔba, seɠe wola ʋagɔi ʋotogi zu.Ti-ɠɔlɔ pagɔi ɠa ɠula ti ma, é valibo ga nii ɠaazu ʋagɔ nɔpɛ ge la ba.25Ɗa-zalaʋusuiti ta loo bu ga boɠa zɔkpɔi,ɗa-ɠɔɔɠuluɓaiti ta za kɔɔmaʋɛ.26Naama volo ná, Siyɔn ná-pɛlɛla ɓogiti pɛ ta kpalagi wo, ti ɠaalɛi.Taai koloɠologai, toɠa ɠɛ zeini zooi ma.