Maanɔɠɔ ɠa Efelayime luɠɔ
1Maanɔɠɔ ɠa Samali ʋɛ,taa wolai é ga masa bɔɔlɔgi ɠɛʋele,Efelayime dɔɔzo nuiti ti ɓɔɠɔ lɛɛzu su la!É zeini nɛmɛ ʋagɔi unda,ná-kɔbu ani ʋagɔi ɠɛa nɔ ga tufa waai pooloainiima zunuiti unmaʋɛ, dɔɔi tɔungi zeɠeai ma.2Mazɔlɔɔ wɛlɛ, ɠuluɓa ɠila ka Maliɠii yeema daalɔɠɔma,sɛbɛai, suzeeli, é ʋaazu é laalɛ bu,eɠɛ sakɔtu lona viilɛ wolai,faa zuɠoloɠolo fiilɛ wolai,sabala golai, ma ɓoigi yeizu.Maliɠii ná-zɛbɛi zu, toɠa taai loka zooi ma.3Kɔɠɔlomai ɠa wo da,Efelayime dɔɔzo nuiti ta-ɓɔɠɔlɛsu masa bɔɔlɔgi.4Tufa waa vɔɔi, é ga ná-kɔbu ani ʋagɔi,é zeini nɛmɛ ʋagɔi unda,naa ɠa ɠɛ eɠɛ kooleɠoole gwaai, kpɔiɗai ma yeeluɠɔ,zɔi é kaazu mɔunpa, naa ɠa kulazu ga, é kpɔle gaamanɔ.5Naama volo ná,Ɠɔoɠɔ GALAGI, Fai-Pɛ-Maliɠii ɠa ɠɛ ga masa bɔɔlɔgi é volozu,zanu bɔɔlɔgi maayikiai,ná-nuɓusɛiti maa a ɠili la.6Zɔi é tukpɔi ɠaaleʋezu,toɠa telebodai ʋu naa yiimaʋɛ.Zɔi é sili nuiti kpɛɛzu, ti zeɠe taa ziɠidaʋɛ,é ɠɛ ga naa ná-zɛbɛi.Dɔɔzo nuiti ti ga tukpɔɠaaleʋe nuiti
7Wɛlɛ tanigaani ba, dɔɔi ti loai ya,gaazulati ganii ɗa ti ɠaka.Zalaɠa ɠula nuiti ta GALA goo wo nuitigaazulati ganii ɗa ti loo ya,dɔɔi tɔungi zeɠea ma,gaazulati ganii ɗa ti ɠaka.Ta ɗa ɓali ta ɠɛna kulakɛlɛma vaiti boga,ti ɗa ɠaka ta-lukpɔɠaaleʋeiti su.8Ta-laɓaliiti pɛ gaaɠoloɠologa ga unpiligiti,ada nɔpɛ ge la ná, ʋɛ ná la ɠɔzɔni.9Ti ɠɛni ma: «Ɓɛ ɠa Ezayi kɛɛzu eɠɛ a ɠɛ kalasu?Ɓɛ ɠa é pɔ ga é ná-keela wooi zuɠula ma?Naa la zolooni doungoiti nɔ ma ɓaa,ti laaɠula feya ɲiimii ʋa,ti zeɠeai ti-lee ʋa feya nɔ?10Devei la devei maazu, devei la devei maazu,tɔgi la tɔgi maazu, tɔgi la tɔgi maazu,tago ʋɛ ʋele, tago munu ʋele.»11Za ʋoluma, Ɠɔoɠɔ GALAGI ɠa ɗa ɓɔɛ niima nuɓusɛiti pɔzii wooiti su ti ɠaaɠaala ɓaai, wɛɛn wooiti.12É ɠɛni ti ma: «Dooɠo bosuʋɛ ɠaa.Niiti ɓɔlɔai, à naati zɛ ná, ti looɠo, wɛlɛ ziilɛigi ʋa.»Kɛlɛ ti la ɠɛni kɛɛni ti ʋa woilo Ɠɔoɠɔ GALAGI wooi ma.13Ti ɠaazu, Ɠɔoɠɔ GALAGI wooi ɠa ɠɛ ga:«Devei la devei maazu, devei la devei maazu,tɔgi la tɔgi maazu, tɔgi la tɔgi maazu,tago ʋɛ ʋele, tago munu ʋele,»naa ɠa a kɛ ti yɛ ziɛzu, ti laazei, ti-zaamaʋɛ ɠale ga,ti lɔ balii ɠa, ti zo.Sɔɓelama ɠɔtu wolai
14Naa ɠa é ba, à woilo Ɠɔoɠɔ GALAGI laawooi ma,ɲɛɛɠulasu nuiti, wo zeini Zeluzalɛme nuiti unda.15Wɛlɛ nii ɠa wo bosu:«Gi minazeɠea ɓɔɠɔ ʋɛ ga saai,gi yɔɠɔzuɓɛtɛni gá gɔvɛalaazu,siɛgi zu ziɛ ɓoi golai lokoleʋezu la,é la ʋaa, é ʋa zeeli gi ma,mazɔlɔɔ gi zɛɛi ɠɛa ga gi-makɛsuʋɛ,gi wooveledai ɠɛ ga gi-lɔɔɠuzuʋɛ.»16Naa ɠa é ba, Maliɠii Ɠɔoɠɔ GALAGI ɠɛ:«Wɛlɛ, nà kɔtu laazu Siyɔn,é ɠɛɛzu ga buulaagi, poluɠulaai,sɔɓelama ɠɔtu wolai ɠɛ de, fizɔgɛ gola,é laani ga pagɔ.Zɔi a ʋoluzei ba, naa la ʋelaa.17Nà kɔɠɔ galui ɠa ɠɛ ga sɔledai,nà-kɔɠɔ gani ɓui galui ba,naa ɠa ɠɛ ga telebodai.»Sakɔtui ɠa li ga zɛɛi lɔɔɠuzuʋɛ,ta ziɛi ɠa yei ga wo-lɔɔɠuzuʋɛ.18Wa-minazeɠegi ɠa ɠoloɠolonii wo boni yɔɠɔzu wa saai.Wa-woolaamai la yɛga ma,nii wo boni wa gɔvɛalaazu.Siɛgi zu ziɛ ɓoi golai lokoleʋezu la,toɠa wo ɠoloɠolo.19Teʋe daa ɠilagila, toɠa wo zo,mazɔlɔɔ toɠa leʋe sobui, foloi ta kpidii.Ma ɠeela wooi ɠaaɠa vai ɠa ɠɛ ga kidaaʋili faa wola.20Betei ɠa ɓuɠa gola ga nu ʋa zakpamaale su,pɛɛmazeɠei lɔi, nu la felevelega ɓɔɠɔ ma.21Mazɔlɔɔ Ɠɔoɠɔ GALAGI ɠa wuzeɠe,eɠɛʋelei é ɠɛɛni la Pelasime gizei ma.Eɠɛ Gaɓaɠɔn nɛmɛi zu, toɠa yiiɠaawana,é ná-kɛɛwotiiti daazeeli, é ná-botii ɠɛ.Kɛlɛ, kulafiliba wotii ɠa ɠɛ de, botii nii é la ɗa ga ɠɛ pɔlɔma!22À yeeɠulana wa-ɠimalala ɲɛɛɠulasui zu.Ni naa laade, galui laa ɠa lɔsu wo-ɠɔgi ʋa gola.Mazɔlɔɔ zooi pɛ koloɠolo vai leveʋɛ na,gè mɛnigɛ Maliɠii la, Ɠɔoɠɔ GALAGI, Fai-Pɛ-Maliɠii.Ɠimalai nii ɓela ge la ba
23À woilo dɛɛ gòoi ma!À dama, wo woilo dàawooi ma!24Tii ɠɛ nui ɓɛ ɠa a ɗa yɛ nɔ wozawolii ɠa ɠɔ,é ʋa ɗa ani zuwui vaza?Yeenɔpɛ nɔ, é ɗa kuɠui la, é ɗa suloɠagi wo nɔ?25Kɛlɛ kpega ʋoluma zooi ɠaa ɠɛ sɔli,toɠa ɗa gulu kaeiti pɛ faza,é moloi vaza, é kpazii zin, ta moloi daa ga wɔɔlezegi,ʋɛti pɛ maanɛai ti ɲɛkpɛ náti, molo nɛkɛgiti.26Ʋelei a ziɛ la, naama leveiti kana,ná-GALAGI kalaga da,é ma ɠeleɠelegiti fe bɛ.27Nu la ɗa ga ɓenɛi ɠaaloa ga kaʋa loɠa wulu zɛpɛgi,ɓaa nu ʋa wotoloi ɓizɛ gulugi zu.Kɛlɛ kpakɔi ɠa nu a ɗa gulugiti ma ɠaei ɠula ga la.28Nu ɠa ɗa moloi vukɔ pɛ, é ʋa ɓului zɔlɔɔ,kɛlɛ é la yɛga vukɔzu, dooɠo ge la ba.Ni ɗa wotoloi ɠɔɠɔiti kpizɛna su,sooiti ti la zooga ti ʋa moloi vukɔ ga ʋolokagiti.29Naa pɛ ka zɔlɔɔsu Ɠɔoɠɔ GALAGI ya, Fai-Pɛ-Maliɠii,ná-faazeikpasui wola vizɔgɛ,ná-ɠimalai maayikiʋɛ.