Ezayi25tod_pbt

Faanɛɛ wuuɠwɛɛ guyei

1Ɠɔoɠɔ GALAGI! Ɗa ga nà-GALAGI,nà è wɔɔlɔzu, gè è-laaseigi maamusɛ,mazɔlɔɔ è faa ʋagɔiti kɛa,niiti è ti zeini kpasu kaite,ti la valiboga, nu a ɠito ti ʋa.2Mazɔlɔɔ è taa wolai ɠɛa ga kɔtu ziɠigiti,taa zɔɓelama wolai ɠoloɠologa.Wɛɛinti ta-laa wolai,ani la mɔ su, a kɛ ga taa wola,ta é la mɔ loga ʋolu pɛ.3Naa ɠa é ba, zobobɛ nuɓusɛiti ta è lɛbi,nu ʋaa yooiti ta-laa wolaiti ta ɗa-zobogi ɠwɛɛ, ti lua è ʋa.4Mazɔlɔɔ è ɠɛni ga bala nuiti dɔɔɠuzuʋɛ,ungo, maawɔin nuiti dɔɔɠuzuʋɛ,siɛgi zu ti ɠɛni la kidaaʋiligi zu.È ɠɛni ga ti-lɔɔɠuzuʋɛ sabalagi ʋa,niinigi é ti lɔɔɠuzu foloi ma liegi ʋa.Mazɔlɔɔ nu ʋaa nuiti daa liegi ɠɛɛʋɛ eɠɛ sabala golai,é loɠazu siɠigi ʋa,5ɓaa eɠɛ foloi ma lie golai é loozu zou vɔɔi zu.Ɗa wɛɛinti sɔngɔ wooi ɠaayeizu.Eɠɛʋelei foloi ma lie golai ɠaazumaa ɠa ɗa lɔɔɠu la ga tonaɓiingi,ɗa toosu nuiti ta-ʋilɛ sɔlɔɔ guyei ɠaayei.
6Siyɔn gizei nii ma ɠa Ɠɔoɠɔ GALAGI, Fai-Pɛ-Maliɠiifɛti wolai ma laamii ɠɛʋele ɓɛtɛzu ná nuɓusɛiti bɛga suai gulɔai, dɔɔ wɔlɔmai ʋu ma,sua yɔɓɔgi gulɔai golai,ta dɔɔ wɔlɔmai, gaazeɠegai ga pagɔ.7Náʋɛ ɠa é gɔlɔ zeɠei ɠoloɠolosu ná,nii é ʋɛɛni nuɓusɛiti pɛ gaazuʋɛ,é ga gaazuɠili zeɠei é ʋɛɛni zii ɠiligiti pɛ gaazuʋɛ.8Toɠa saa vai ɓe eyɛsu ɠɔ,Maliɠii Ɠɔoɠɔ GALAGI ɠa ti-ɠaazuɗɛiti kpale ti-ɠaazuʋɛti pɛ.Ɓaaɠulamai ná-nuɓusɛiti ti sɔlɔɔni,toɠa naa ɠula eteai ʋa ná pɛ.Mazɔlɔɔ Ɠɔoɠɔ GALAGI ɠa é boga.
9Toɠa wo naama volo ná ga:«Wɛlɛ gá-ƓALAGI ʋa,tɔ ɠa gi ɠitoni ba,tama tɔ ɠa é gi unmɔɔgai.Ungo, Ɠɔoɠɔ GALAGI ɠa é ɠɛni ga ada-ɠitogi.Ade ɠoozunɛ, ade ɲaɠai ɠula,tɔɔzei é ade ɠizoga!»10Mazɔlɔɔ Ɠɔoɠɔ GALAGI yee ʋagɔi ɠa laani gizei tɛi ma.Kɛlɛ kɔɠɔlomai woga ga Moaɓe yooi gaamanɔ,eɠɛ kaʋai nu ɠɔɠɔlosu ma kaʋa ʋilisuʋɛ.11Toɠa yeemaaɠɔ kaʋa ʋili zeɠei zu,eɠɛʋelei dase bo nui a ɗa kɛ la.Anɛɛ naa ʋe, Ɠɔoɠɔ GALAGI ɠa ná-wasogi ɠaayei,anɛɛ toɠa ɠaaɓaazu ʋele-o-ʋele.
12Ɠɔoɠɔ GALAGI ɠa ɗa-ziɠigiti goloti maayikiai, nu lɔɔzu la ti ʋa,toɠa ti loka, é ti ʋu ya zooi ma fufiligi zu.
expand_more
Search