1Keela wooi é wosu é lo Tiil ʋa.À kpalagi wona, Taalasise ɓato wolaiti!Mazɔlɔɔ ʋɛ wo ɠɛni losu ná, naa ɠoloɠologa.Pɛlɛiti ti woloa! Nu lɛɛzu la mɔ ná!Ti ma wooi mɛnini, ti ʋaai ma,ti zeɠe ziɛ zaama yooi ma laai zu daa ga Sipele.2À yɛ daavɔyai zu, kpoloɗɛi laaʋɛ yooi ma zei wo nuiti,nii Sidɔn yaaɠoiti ti ɠɛni sulaavesu,ti ɗa ɓizɛ kpoloɗɛi ɠa.3Ziɛ wolai ɠaaʋɛ, niiti ti wolizu ziɛ wolai ɠobaʋɛ,ziɛ wolai Nile ɠobaʋɛ ma molo leʋei ɠɛni bɛ ga tɔnɔgi,naa ɠɛni ga zii ɠiligiti pɛ ta lɔɔɠɔi zu.4Ɠɛ unfegi zu, Sidɔn!Mazɔlɔɔ kpoloɗɛi ɓɔɛni,kpoloɗɛi ma lɔɔɠu wosuʋɛ ɠɛni ma:«Gè la taɓa zɔlɔɔni,gè la ɠɛni doun zɔlɔɔni,gè la doun zunua ɠulani su,gè la doun anzanua ɠulani su.»5Siɛgi zu ma wooi zeelizu la Ezipete yooi zu,toɠa wana ti ma gola,eɠɛ nɔ siɛgi zu ti naa mɛnisu danii seeliai Tiil taa wolai ma.6À kpoloɗɛi ɓudɛ, wo li Taalasise,wo kpalagi wo, wɔi wo zeini ziɛlaʋɛ.7Wa-laa wolai ɠa nɛi ɓaa,ʋɛ ná ɠaanɛɛni mɔungi,nii ná-faiti tɔɔzeiɗai wɔlɔwɔlɔ voloiti su,taai nii é liini ɠoozamaʋɛti seikɔɠɔmai ma?8Ɓɛ ɠa deɠɛmu é niima vaiti pɛ deveai Tiil taa wolai laalɔɠɔma?Tiil é masa bɔɔlɔgiti gaaɠwɛɛzu,ná-yaaɠoiti ka ti ɠɛni ga nu wolaiti,tiya la ɠɛni de unfemai ʋa ɠɛni ti ʋɛ eteai zu ná pɛ ɓaa?9Ɠɔoɠɔ GALAGI, Fai-Pɛ-Maliɠii ɠa é niima levei wogai,é wasogi ɠula ɓɔɠɔ lɛbiya ɠaiziɛ nuiti ba,é naati gaayei, niiti eteai unfemai veezu ti ʋɛ.10À li, Taalasise nuɓusɛiti,wo tii ɠɛ wa-yooi ʋa,eɠɛʋelei Ezipete nuiti ti kɛɛzu la ziɛ wolai Nile ɠobaʋɛ.Ɓato losu la mɔ wo ʋɛ.11Mazɔlɔɔ Ɠɔoɠɔ GALAGI yeewuzeɠea kpoloɗɛi laalɔɠɔma,é masadaiti suɓalia.É devei vea ga Kanaan yooi zu lɔɔɠuzuʋɛti pɛ ti wolo.12É ɠɛni ma: «Sidɔn nuɓusɛi, ɗɛi è ɠɛai eɠɛ anzanu loungoi ti koloɠologai,looɠona koozunɛɛi ʋa!Wuzeɠe, è ʋilɛ pelei zu,li, è zei Sipele, ziɛ zaama yooi ma laai zu,kɛlɛ anɛɛ miná ʋe, dooɠo nɔpɛ ge la ɠɛa ná è ʋɛ.»13Wɛlɛ Ɓaɓilɔne nui ta-yooi ʋa,naama nuɓusɛiti ti la mɔ ná.Asiili yooi naa ɠɛa ga teʋebai zu zuaiti seizu,ti pɛlɛ ɠaaɠoozagiti to, ga ti taai zei kɛlɛ su,ti masa pɛlɛiti kpalega ná, ti ti pɛ koloɠolo.14À kpalagi wona, Taalasise ɓato wolaiti!Mazɔlɔɔ wo-lɔɔɠuzuʋɛ ɠoloɠologɛ!15Naama volo ná, zeemai ɠa wo Tiil ma kona ʋuulɔfela (70) laawu, masa gilagi zii ma voloi liegɔi ɠana. Naama ɠona ʋuulɔfelai (70) laawu, naa ɠa ɠɛ ga Tiil, nii guyei bosu é lo koloɠolo anzanui ʋa ga:16«Li, è ɗa-ɠɔnigi zeɠe,è lati taai ma,koloɠolo anzanui zeemai wogai ma!Gɛin gola, guyei loo, guyei loo ʋolu,ga è nuiti kigi loo ɓɔɠɔ zu!»17Kona ʋuulɔfelai (70) a leʋena, Ɠɔoɠɔ GALAGI ɠa Tiil maalobo. Názu ɠa Tiil a ɠaaʋote da ná-naavolo zɔlɔɔgi ma, é ɗa koloɠologi ɠɛ la ta masadaiti kpein, ti eteai zu ná pɛ.18Kɛlɛ ná-tɔnɔgi ta ná-kulanumai, naati ta ve Ɠɔoɠɔ GALAGI ʋɛ, ti ɠaa la lɛa ba, ti ʋa makɛ, mazɔlɔɔ tɔnɔgi naati ta ɠɛ ga nui naati tɔnɔ niiti ti Ɠɔoɠɔ GALAGI ɠobaʋɛ, é ɠɛ ga ti-ɠɔnɔgi, ti mi, ti mɔtai yɛ, ti ɓɔɠɔ maaɠili ga seɠe maayikiyikigi naati.