Ezayi16tod_pbt
1À zou ɠundiɠii ná-baala ziʋoiti teʋe,é lɔɔzei Sela teʋebai ʋɔ pelei,ti ve Zuda masagi ya Siyɔn gizei ma.2Moaɓe anzanuiti ta loni ziɛ wolai Aalanɔn maaleʋesuʋɛ,eɠɛ wɔniiti ti ʋelazu,ti vazagai ti ma laɠagi ʋa.3Moaɓe nuiti ti ɠɛ ma:«Tɛnɛgi wo ga giye, faa ɠila deve!Foloi ɠa gaalɔna, ɗa-niinigi ʋɛɛ gi ma eɠɛ kpidii.Gá-ɠɔɔʋelaiti dɔɔɠu, mina pela nui yaava!4Moaɓe ɠɔɔʋelaiti ti zeezeibu zɔlɔɔ è ʋɔ bɛ!Ɠɛ ga ti-lɔɔɠuzu faa zuɠoloɠolo nui ʋa.»Mazɔlɔɔ, wɔinzeɠemai ɠa ɓe yeeta,toosu vai ɠa ɓesu,zɔi é toomai ɠɛɛzu,toɠa ɲɛɛlɛ, é ɠula zooi ʋa.5Masagi ta ɠa zei Davide ná-masadai unda.Ná-masa kpɔkpɔgi ɠa ɓaana, é lɛbi,mazɔlɔɔ toɠa masadai ɠɛ nuɓusɛiti unda ga nuɓɔɠɔlai ta wooɠɛɠiladai.Toɠa ʋilɛ sɔle fai ʋolu,suvilɛ telebodai ɠɛɛzu.6Gi Moaɓe ná-wasogi ma woo mɛnini,wasogi dateʋegai,ná-gaazumaanɛɛi ta ná-wasogi,ná-ziiɠaawanai ta koozu ɠisiɛ wafuungiti.7Tama Moaɓe nuiti ta kpee loonaama vaiti su Moaɓe yooi ti sɔlɔɔ su.Ti pɛ ta zɔngɔ, ti kpalagi wo, ti laavɔ,mazɔlɔɔ leezɛn vɔɔi ma ɓuungi é ɠɛni ɓɛtɛzu Kiil-Ɠalezɛte, naa la mɔ ɠɛa.8Ɠɛsɛɓon lɔɓɔiti ti vɔa,zou ɠundiɠiiti ti Siɓima leezɛn ɓeleiti ma lɔkulugiti koloɠologa,ti zuvieni Yazɛɛl,ti zeeli teʋebai zu, ti vaza ná,ma pɔnɔbaiti ti vaza poun Kpoloɗɛ Wanai ʋoluʋelei.9Naa ɠa é ba, nà wɔlɔzu Siɓima ná-leezɛn ɓelei maeɠɛʋelei Yazɛɛl wɔlɔzu ma la.Nà wo yɛɓɛzu ga gàazuɗɛi, Ɠɛsɛɓon ta Eleyalé,mazɔlɔɔ kɔɔɠɔ ɓeei zolooga wa-leezɛin ziɠa vai ma ta ma waa ɠula vai.10Koozunɛɛi ta undaanɛɛi ɠulaa gulu ɓelei ʋa,leezɛn ɓelei zu, guye la mɔ loozu, koozunɛɛ la ná.Leezɛin ziɠa nuiti ti la mɔ tatisu kɔɠɛi zu.Gè koozunɛ ɓain gooiti kwɛteʋea.11Naa ɠa é ba, sàsu ɠa ɓalizu Moaɓe ná-faa zu eɠɛ kɔnigi,zìi ɗa gala Kiil-Ɠelɛse ná-faa zu.12Moaɓe nuiti pɛtɛ, ti ɓɔɠɔ ɓɔlɔzu zalaɠa ɠula adaʋɛti,ti ɗa li ta-ɠɔɔɠɔ gani pɛlɛi wu,ti ʋa ta-ɠɔɔɠɔ ganigiti fali,kɛlɛ ti la ani nɔpɛ sɔlɔɔsu.13Wooiti kana Ɠɔoɠɔ GALAGI ti woni kaite Moaɓe ná-faa zu.14Za, Ɠɔoɠɔ GALAGI wooi ɠa é ga nii:«Aisa kona saʋagɔ ga daaɓa nɔ kpein,eɠɛʋelei botiɠɛ nui zala ɠonagi ɠaalusu da,Moaɓe yooi ná-lɛbiyai ɠa ɠɛ ga ɓaaɠulamai.Anɛɛ ni ná-nuɓusɛi mɔinʋɛ gola,nii goi a yɛ ná, é la ɠɛa ga ani nɔpɛ, gaa nɔpɛ ge la ɠɛa ba.»