Eɓulu5tod_pbt

1Zalaɠa ɠula ɠundiɠi wolai nii zeelobai ɠɛni wosu da nuɓusɛiti saama, ti seɠe ga é botii ɠɛ GALA bɛ ta-vaa ma, naa ɠa a kɛ é vebɛaniiti ta zalaɠaiti kula kotoiti ma vaa ma.2Toɠa zoo é faaɠwɛtala nuiti ta faaɠaaza nuiti ma vai ɠaaɠa, tɔɔzei tɔ ɓɔɠɔi, é ná-zɛbɛsulalai ɠwɛɛ.3Tɔɔzei tɔ ɓɔɠɔi zɛbɛ la zea, kɛni é zalaɠai ɠula tɔ ɓɔɠɔi ta nuɓusɛiti ta-ɠotoiti faa zu.4Nu nɔpɛ ge la naama losuʋɛ ma unfemai ɠɛa ga ɓɔɠɔ nɔnɔ, kɛni zɔi GALA ge toligai, eɠɛʋelei Aalɔn ɠɛni la.5Kilista ɓalaagi la ɠɛni naama unfemai zeɠeni ɓɔɠɔ ʋɛ nɔ, ga é ʋa ɠɛ ga zalaɠa ɠula ɠundiɠi wolai, kɛlɛ é sɔlɔɔni GALA zea, nii é ɠɛni ma:«Ɗa ga dòun zunui. Za, gè è ɠɛa ga dòin.»6Zenɔ ɠana bogai la adaʋɛ ga:«Ɗa ga zalaɠa ɠula nui eyɛsu ɠɔ,eɠɛʋelei Mɛlekizedɛke ɠɛni la.»7Yesu ɠɛai ma eteai zu, é falii ta maanɛɛnɛ wooiti daazeelini, é kpeei loo gola, gaazuɗɛiti ti ʋu, é daazeeli GALA ma, nii a la zoo é kizo saai ma. GALA ge gooɠaaʋotegi veeni zea, ná-woozogi maaʋele ma.8Anɛɛ ni é ɠɛni ga GALA Doun Zunui, é woozogi ɠalani ga naama vaiti maaʋele, é ɓɔlɔni ti zu.9Tama tɛi daazeelini é zeeli ɠwɛgi ma, naa kɛɛʋɛ ga ɠɔoɠɔ kizogi vee nui naati zea, niiti ti ɠolozu tɔun bɛ.10GALA ge seini ga zalaɠa ɠula ɠundiɠi wolai eɠɛʋelei Mɛlekizedɛke ɠɛni la.

À dama, wa ʋa ɠɛlɛ kidaaleʋei ʋa

11Faa mɔinmɔin ka gi ɠisu, gá zoo bosu naama vai zu, kɛlɛ kpaaʋɛ gi ʋa ti-ʋoluʋɛti bo wo ma, tɔɔzei wo la pɔ wo ʋa faiti gaaɠa fala.12Kaite wo maanɛɛni wo ɠɛ ga kalamɔinti, kɛlɛ wo ɓɛdɛi ɠa ba ga nu wo ɠala dɛ ga GALA ná-faiti ma lɔɔzei koiti, wo ɠɛa mɔnɔ ga nuiti ti ɓɛdɛi ɲiimiɗɛi ɓɔle vai ʋa, wo la ziɛzu daamiani kitei wu.13Zɔi ma é ɲiimii ɓɔlezu, naa ɠa dɛ ga doungoi, é la telebo kpɔɛiti zɔɠɔzuɠwɛɛ.14Kɛlɛ tama, daamiani kitei ɠa ga nui naati tɔnɔ, niiti ti ga nu ɠiteiti, ti zoogai faiti zɔɠɔzuɠulazu, faa ʋagɔi, ɓaa faa ɲɔi.
expand_more
Search