1Lɔɠɔ ʋagɔi vizɔgɛ gulɔ maku nɛɛnɛgi ʋa,nui zaa voloi ʋagɛ, é leʋe sɔlɔɔ foloi ʋa.2Fizɔgɛ nu li saa wɔlɔ wo pɛlɛi wu,è mina li fɛti ɠula ʋɛlɛi wu.Saai ɠa é ga ɛsɛ pɛ gaaɓelazuʋɛ,ta fizɔgɛ ga ɛsɛ pɛ ge ɠizɛ su.3Gaazuɠilii vizɔgɛ ɲɛɛi ʋa,toɠa ɗa nui ɠaazuʋɛ ɲɔu, kɛlɛ ziimaʋɛ ʋagai.4Ɠima nui ná-kisiɛi ɠa ɗa ɠɛ saa wɔlɔ wo pɛlɛi wu,ɠimalala nui ná-kisiɛi ɠɛ koozunɛ ʋɛlɛi wu.5Fizɔgɛ nu woilo ɠima nui ná-zelilomai ma,è mina woilo ɠimalala nuiti ta-maamusɛi ma.6Mazɔlɔɔ ɠimalala nui ná-ɲɛɛi ɠulaʋɛ ga kpataɠalagi ɠala lugi diɠii wu.Naa ɓalaa ka ga wafuun faa nɔ.7Telebotalai ɠa ɗa ɠima nui ɠɛ ga ɠimalala nui,vebɛanii ɠa ɗa nu ɠɛ ga sɔletala nui.8Fai ɠaaɓelasu vizɔgɛ tɔɔzeizuʋɛ ʋa,fizɔgɛ nu è maaɓɔungi wo, kɛlɛ è mina ɠɛ ga waso nu.9È-yii mina ɠula fala,ɠimalala nuiti nɔ ɠa ti-yii ɠa ɗa ɠula valafala.10Mina ɠɛ ma: «Leeni ʋe mɔun foloiti pagai niizu geleiti ba?»Mazɔlɔɔ ɗa-ɠaazaɠagi naa la ga ɠima ɠaazaɠa.
Ɠimalai ná-faa ʋagɔiti
11Ɠimalai vizɔgɛ pogani ʋa, ɛsɛ pɛ ná-kulanuma ɠa su.12Ɠimalai ɠa nui makɛsu ga ʋelei walii kɛɛzu la, kɛlɛ kulanuma ɠa ɠimalai ʋa, naa ɠa ga toɠa ɗa naama nui yɛnvui makɛ, nii é zea.13GALA ná-kɛɛwotiiti pɛtɛ dɛɛ, ɓɛ ɠa a naa zɔle, nii é kpiligai?14Ɠoozunɛ undaanɛ voloiti su, kpalai ɠa ʋaana, ɠisiɛ. GALA ge naama vaa zeizu felegɔiti pɛ kɛɛʋɛ, naa ɠa a kɛ, nuɓusɛi de mina kwɛɛ, nii é de luɠɔ.15Etea wafuungi nii gè kɛa, gè kaaʋɛ ga fai pɛ ka zoo ɠɛɛzu. Nui ɠa zaazu, anɛɛ ni telebogɛ, taɠili sii zuɠooza, anɛɛ ni siliʋɛ.16Ɗa-lelebodai mina leʋe kɛɛzu ʋa, ɗa-ɠimalai mina leʋe kwɛsuʋɛ ʋa. Leeni vaa zu ɗa li ɓɔɠɔ ɠoloɠolosu?17Mina zili, è ʋa leʋe kwɛda ʋa, mina ɠɛ ga ɠimalala nu. Lee ʋe ɗa li zaazu ma yeeluɠɔ?18Pagɛ ga è tɛnɛ goo felegɔi naati so, mazɔlɔɔ zɔi é luazu GALA ba, toɠa ziɛ ga ti felegɔ pɛ.19Ɠimalai ɠa ɗa ɠima nui zɛbɛi wɔɔlɔ, é leʋe kundiɠi puugɔ ʋa, ti taa ɠilagi zu.20Gaama ɠa ga naa, ga nu vulu nɔpɛ ge la pɔlɔʋɔlɔi maazu nii telebogai, é la koto ɠɛa.21Mina woilo wooi kpein ma, nuiti ti bosu, naa ɠa a kɛ è mina ʋa ɗa-wotiɠɛ nui woomɛnisu, é ʋa ɗa woo ɲɔi wo è ma.22Mazɔlɔɔ è kwɛni ga ná zeizu ɠɛa mɔinmɔin, ɗa ɓalaa è ɗa kpɔɛ ɲɔiti bo zɔiti ma.23Gè naa kpein poluʋɛtɛni ga ɠimalai, gè ɗa ɠɛ ɓɔɠɔ ma: «Nà ɠɛɛzu ga ɠima nu,» kɛlɛ ɠimalai mu maaɠoozaʋɛ bà.24Faiti gaaɠa vai maaɠoozaʋɛ nui ʋa, kpoma ɠoozaʋɛ, kpoma ɠooza ʋelei ma ga gola, nu la zooga zeelizu ma.25Gè ɠaaɓaani ga zìi pɛ, nii a kɛ gè ɠimalai maalɛlɛ, gè gaiziɛ, gè poluɠa, gè ɠɛ faiti kɛ ungi ɓalaa kwɛɛ, gè gaaɠa ɓalaa ga faa ɲɔi ɠa ga ɠimalala vaa, ta ɠimalalai ɠa ga ɓoloɠa vaa.26Gè fai ta ɠaaʋɛ ga wanai, é leʋe saai ʋa, naa ɠa é ga: anzanui nii zii ga balii ta tumɔi, zeeiti ti ga kɔlu yɔlɔɠɔi. Nui nii é luazu GALA ba, naa ɠa ɗa maala, kɛlɛ kotoba nui ɠa ɗa li, é lɔ zea.27Tɛnɛbo Nui ɠɛ ma: «Gè faiti pɛ pɛtɛgɛ ga gilagila, pɛtɛ nii gè kaai:28Tɔun vɔlɔ nà dɛ gaiziɛzu, tama gè la dɛ kaani, gè unfema zunu ɠila kaaʋɛ zunu waagila (1.000) saama, kɛlɛ gè la dɛ gila kpalaa kaani anzanuiti kpein saama.29Faa ɠila kpegi gè gaaɠaai, naa ɠa ga nii: GALA ge nuiti kpɛtɛʋɛ, ti zɔlegai, kɛlɛ tiya ɓɔɠɔi ti faazupuiti gaiziɛʋɛ ga mɔinɗa.»