Tɔ Sɛʋɛi Velesiɛi33tod_pbt

Moize tuya loo vaiIzilayɛle nuiti bɛ

1Tuyai ʋɛtɛ, nii GALA nui Moize tooni Izilayɛle nuiti bɛ, aisa é ʋa za.2É ɠɛni ma:Ɠɔoɠɔ GALAGI ʋaaʋɛ, é zeɠe Sinayi gizei ma,é wuzeɠeʋɛ ti ʋɛ, eɠɛ foloi, é zeɠe Seyiil yooi zu,toɠa volozu, é zo Palan ɠizei ma zoligɔ,paaʋɛ, é ɠula ná-geezuɠeela ɲadegai waawaagiti saama,tɔ sɛʋɛi ɠɛni zea, abui ba.3Ungo, nuɓusɛiti nɛɛʋɛ è ʋɛ,ɗa makɛsu naati ma, niiti ti ga ɗɔnɔiti,ta ʋuuni è ɠɔɠɔwu, ti ɗa è-laawooi mɛni.4Ada-vaa ɠa é tɔgi veeni la Moize ya,Zakɔɓe ná-nuɓusɛiti ti sɔlɔɔ ga tɔnɔ.5É ɠɛni ga masagi Yesulun unda,siɛgi zu nuɓusɛiti ta-ɠundiɠiiti ti maaɓɔni da,ta Izilayɛle wolodamaiti.
6Luɓɛn zii zuɠooza, é mina za,ná-nuɓusɛiti ti la mɔinni, naati yɛ ná ɠɔ.
7Wɛlɛ nii ɠa é boni, é lo Zuda ʋa:Ee, Ɠɔoɠɔ GALAGI, woilo Zuda wooi ma.Lo tuɠɔ, è lii la ná-nuɓusɛiti pɔ.Zeeiti ti maalobo,ɗa ɓɔɠɔi ɠɛ ga ná-kpɔba nui sili nuiti daalɔɠɔma.
8Levi letegi, é ɠɛni ma:Ee, Ɠɔoɠɔ GALAGI! È wuulimegi ta tumimegi veeni ɗa-lada wotiɠɛ nuiti zea, Levi mavofodaiti,niiti è ti ʋoluɠulaai Masa,è ti zakpe Meliɓa ɗɛiti pɔ bɛ.9Levi, nii é ɠɛɛzu kɛɛɠɛ ta dee ta-vaa ma:«Gè la wɛlɛzu ti ʋa!»Tɛigi é la zeelɔzɔɠɔzu ɠɛɛni ná-doun zunuiti ta kɛɛɠɛlointi zɔɠɔzu,kɛai ga wooɠɛɠila nu è-laawooi ɠila nɔ ʋɛ, ta ɗa-minazeɠegi.10Levi nuiti ta ɗa Zakɔɓe ná-nuiti kala ga ɗa-levei,ti Izilayɛle nuiti kala ga ɗa-lɔgi,ti ansansegiti gala è ʋɛ,ti gala zalaɠai ɠula ɗa-zalaɠa ɠulazuʋɛ.11Ee, Ɠɔoɠɔ GALAGI, ta ɓɔ ti-zɛbɛi ʋa,è tuya loo botii kpein ma, ti kɛɛzu ga yeei.Ti zili nuiti ta-ɠaaɓaai ɠoloɠolo,niiti kpein ti ti wɔinzeɠezu,tanɔpɛ ge mina ungi wuzeɠe mɔnɔ eyɛsu pɛ.
12Ɓɛnzamɛn letegi, é ɠɛni ma:Ɠɔoɠɔ GALAGI nɛɛbɛ nui, toɠa zeini ziilɛigi zu tɔun koba,GALA ka é makɛsu yeenɔpɛ,toɠa zeini ná-gizeiti saama.
13Zozɛfe letegi, é ɠɛni ma:Ɠɔoɠɔ GALAGI tuya looʋɛ ná-zooi ʋɛ,ga nɔɗa ʋagɔi é zeɠezu geezuʋɛ,ta zou wu ɗɛ wolaiti,14ta gulu waa ʋagɔiti, foloi ti ɓɔizu,ta gulu waai kpein nɛai, ti ʋɔnɔsu alu-o-alu,15ta vebɛani ʋagɔiti, gize wɔlɔzaɠagiti ti feezu,ta wɔlɔwɔlɔi zu ɠizeiti ta-lɔnɔ pagɔiti.16Tɔnɔgi nii fizɔgai gola, é zooi laavegai.GALA nii é ɠulani kɛlɛma kpɔvɔ goi zu,nii abui ɠɛni sosu ba, naa ná-faanɛɛi ʋa,é ɠɛ ga masa bɔɔlɔgi Zozɛfe unba, tɛigi ziimazeɠegi wogai da,é ɠɛ ga kɛɛɠɛlointi ta-ɠundiɠii.17Unfemai ɠa Zozɛfe ʋɛ!Suzeeliʋɛ eɠɛ nikɛ zinɛi.Minɛ felegɔi ɠa ba, eɠɛ wɔlɔwɔlɔ leɠui,naati ka a ɗa ziiti siɠa la,é ti laaʋili, é li ga tiye zou ɓela ga.Minɛi gilagi ɠa é ga Efelayime nuɓusɛ waawaagiti,zɔi ɠa é ga Manasé ná-nuɓusɛ mɔinmɔingiti.
18Zaɓulɔn letegi, é ɠɛni ma:Zaɓulɔn, ɠoozunɛ ɗa-ʋɔdi loo vaiti su.Isakaal, ɗɔun zei kpɛ ɗa-zeɠe ɠotaiti bu.19Wa nuɓusɛiti toli wa-ɠize ɠaaɠoozagi ma,wa zalaɠaiti kula ga telebodai,kpoloɗɛi ta ziɛlaʋɛ ɲaɠaegi ta ɠɛ ga zaɓu,wo naavolo mɔinmɔin sɔlɔɔ.
20Gade letegi, é ɠɛni ma:Maamusɛi ɠa Ɠɔoɠɔ GALAGI ʋɛ, nii é zou wolai veezu Gade ʋɛ.Gade ɠa looɠosu eɠɛ zala zaai,a ɗa ná-sua zogai ʋali ga, é so kɔɠɔiti ma, é li nɔunkalagi ʋɔ.21É yiimazeɠeni ga ma ʋagɔi,ʋɛ ná makɛgai bɛ, kundiɠi laamiizuʋɛ ɠana.Tɔ ɠa é loni nuɓusɛiti untuɠɔ,é telebodai ziɛ, eɠɛʋelei Ɠɔoɠɔ GALAGI pɔ la,é zoloo faa zɔlegaiti ma, ti wogai Izilayɛle ná-faa zu.
22Dan letegi, é ɠɛni ma:Dan ɠa ga zala ɓokpagi,nii é ʋilisu, é zeɠe Ɓasan yooi zu.
23Nɛfɛtali letegi, é ɠɛni ma:Nɛfɛtali yiɠoa ga faanɛɛi,é Ɠɔoɠɔ GALAGI ná-tuyaiti pɛ sɔlɔɔga.Ná-zooi é seɠezu ga nɔnɔ,toɠa zo folo ɠulazu, é li lɛkpɛma nu yeezazuʋɛ.
24Asɛɛl letegi, é ɠɛni ma:Asɛɛl ɠa ga tuya nu, Zakɔɓe ná-doun zunuiti saama.Undaanɛ ɠɛ bɛ yɛ, kɛɛɠɛlointi saama,kɔɠɔi ɠa lɔ gulɔi wu.25Ná-taazuʋɛ, sɔɠɔgiti ta ɠɛ ga kɔlui ta kɔlu ɓɔigi,ná-kɛdɛyai yɛ zea, sii ma voloi pɛ su.
26Ee, Yesulun, GALA pokɔɠɔma la ná!Toɠa geeɠɔlɔgi ɓotasu, é ʋa é ɓɔ è ʋa,maayikiʋɛ, toɠa tonaɓiingiti su.27Ɠɔoɠɔ GALAGI ɠa ga nu lɔɔɠuzuʋɛ,toɠa ga ɗa-ɓɔba nui ɠɔoɠɔ zooi ma.Toɠa è zili nui ɓɛ è luɠɔ,é ɠɛ è ma: «Suwuɠaaleʋe!»28Naazu Izilayɛle zeini ziilɛigi zu,Zakɔɓe ná-dointi ta-ɗɛungi ɠa ɠulazu ga pagɔ yɛ,zooi ná zu, ʋɛ moloi, é ga ɓeleegi, naa ʋɔnɔsu ná, leezɛn ɓelei ná,geezuʋɛ ɗa nɔɗai vaza ná ma.29Izilayɛle nuiti, wo undaanɛɛʋɛ! Ɓɛɛni ka ti wo ɠɛʋele,wɔi wo ga nuɓusɛiti Ɠɔoɠɔ GALAGI ti ɠizogai?Toɠa ga wa-ɠɔɔɠɔ zɛpɛgi, nii é ʋaazu é ɓɔ wo ʋa.Toɠa ɓalaa ga boɠa zɔkpɔi, nii wo pilɛ sɔlɔɔsu da.Wo zili nuiti ta ʋaana wo ʋɔ ga ɓɔɠɔmaayeii,wa ɠɔɠɔlo ta-ada ɠaaɠoozagiti kpein ma.
expand_more
Search