2 Samiyɛle23tod_pbt

Davide ná-woo ɠaaɓelagiti

1Davide ná-woo ɠaaɓelagiti kaa:
«Davide ɓɔɛ wooi, Izayi ná-doun zunui,tosuba nu wolai ɓɔɛ wooi,nii Zakɔɓe ná-GALAGI yiimazeɠeai la, é gulɔi ziaai ma,Izilayɛle yiima wuye loo nui.
2«Ɠɔoɠɔ GALAGI ná-Zɛnvui ɓɔɛa ga màaʋele,é daawooi ʋua dà.3Izilayɛle ná-GALAGI ɓɔɛa,Izilayɛle ná-fasai ɠɛni mà:‹Zɔi é masadai ɠɛɛzu nuiti unda ga telebogi,ta é kɛɛzu GALA gaazuluabai zu,4kulaʋɛ ga foloi, é ɠulazu sobui,é volozu geezuʋɛ, ʋɛ tonaɓiin ge la ná,ma zezei ta tonai ti ɗa tufai ʋɔnɔ zooi ma.›
5«Nà-pɛlɛyeɠei la ɠana ɓaa GALA gaazu?Tɔɔzei é ɠɔoɠɔ minazeɠe kɛɛʋɛ bɛ̀,é gaaɠula ba, é makɛ ga pagɔ.Toɠa ʋaazu ga nà-kizogi,é zìima vaiti daazeeli.6Kɛlɛ nu ɲakaiti kpein kɛɛʋɛ eɠɛ ɠaingiti ti ʋilisu ya,tɔɔzei nu la ti zeɠea ga yeaɲaka.7Zɔi é pɔ é ti zeɠe,kɛni é kɔlui ɓaa kpɛɛin ma wului zeɠe,ti ɠala abui zu náʋɛ nɔ.»

Davide ná-kɔɔɠuluɓa wolaiti daaseigiti

8Wɛlɛ Davide ná-kɔɔɠuluɓa wolaiti daaseigiti ba: Ma mɔungi ɠɛni ga Yosɛɓe-Ɓaseɓɛte, Taakemɔn mavofodai, é ɠɛni ga kɔɔɠuluɓaiti ta-lotuɠɔi. Daa ɠɛni ɓalaa ga Ɛsenee nui Adino. Tɔ ɠa é nu undɔsaʋa (800) ʋaani ʋɔɔma kɔɔɠɔ laa ɠila su.9Tɔun polumai ɠɛni ga Dodo ná-doun zunui Eleazaal, Aɠoa nui ta ná-dounloin. É ɠɛni kɔɔɠuluɓa saʋagɔiti saama, niiti ti yɛni Davide ʋa, siɛgi zu ti malimasakɛɛi leʋeni la ga Filisiti nuiti, naati gaalɛai ma ba kɔɔɠɔ vai ma, naazu Izilayɛle ɠɔɔʋɛbɛi ɗa ɠula ʋolu, ti ɗa lɔɔɠu.10Kɛlɛ Eleazaal loni kpaan, é yɛni Filisiti nuiti paazu, zeei ɓata boɠa zɔkpɔi ʋa ga kpɔlɔi. Naama voloi Ɠɔoɠɔ GALAGI fɔnifaama wola veeni Izilayɛle ya, kɔɔʋɛbɛi maaɓuɠani Eleazaal ʋa nɔ ga ti poomaiti kɔligiti seɠe.11Tɔun polumai ɠɛni ga Sama, Ɠalaal nui Agé ná-doun zunui. Filisiti nuiti ti ɠaalɛɛni ba Leyi. Tɔɠɔ ɓelei ta ɠɛni náʋɛ, Izilayɛle nuiti ti ɠɛni ʋelazu Filisiti nuiti ba.12Kɛlɛ Sama loni kpalagi zaama, é ná zo ʋolu, é ɗa Filisiti nuiti paa. Ɠɔoɠɔ GALAGI fɔnifaama wola veeni Izilayɛle ya.13Yeeta molo leʋei lɔɔzeizuʋɛ, kɔɔɠuluɓa ʋuusaʋagɔiti (30) saama, nu saʋagɔ yeini Davide ɠoba Adulame ʋugi zu, siɛgi zu Filisiti ɠɔɔɓɔgi gila ge ɠɛni ɠaalɛɛzu la ba Lefayime ʋɛtugi zu.14Davide ɠɛni názu ná-dɔɔɠu wosuʋɛ, siɛgi zu Filisiti ɠɔɔɓɔgi gila ge zeini la Ɓɛteleyɛme.15Ani wɔin ta Davide zoni nɔ sa, é ɠɛ ma: «Ɓɛ ɠa a ʋa bɛ̀ ga Ɓɛteleyɛme taa loaʋɛ ma ziɛyeɠei zu ɗɛi ta pɔ̀, gè kpɔle?»16Kɔɔɠuluɓa saʋagɔiti ti lɔɔni Filisiti ɠɔɔlaaɠai zu, ti ziɛi zaɠa ziɛyeɠei zu, é Ɓɛteleyɛme taa loaʋɛ. Ti ʋaani la, ti fe Davide ya, kɛlɛ é la ɠɛni kɛɛni, é ʋa kpɔle. É feeni Ɠɔoɠɔ GALAGI ʋɛ, é pu ya zooi ma.17É ɠɛni ma: «Ɠɔoɠɔ GALAGI kìzo nii ɠɛɠala vai ɠɛɛ vai ma! Kulaʋɛ eɠɛ nà ɠɛ naama nuiti ma ɲamai ɓɔlezu, niiti ti ɠikulaai ti-yɛnvuiti su, ti li.» É ɠɛlɛni kpɔle vai ʋa. Lɔɠɔɠula faa wolai ɠana kɔɔɠuluɓa wola saʋagɔi naati ti kɛɛni.18Zoaɓe kɛɛɠɛloin Aɓisayi, Seluya ná-doun zunui ɠa é ɠɛni ga nu saʋagɔiti ta-ɠundiɠii. Tɔ ɠa é nu unsaʋagɔ (300) ʋaani ga ná-kpɛɛin. É lɔɠɔ zɔlɔɔni naazu nu saʋagɔiti saama.19Tɔɠɔɠulani ti saʋagɔ zaama, é ɠɛ ga ta-ɠundiɠii, kɛlɛ é la ɠɛni zeelini nu saʋagɔ mɔungiti su.20Ɓenaya, Yeɠoyada ná-doun zunui, é ɠɛni ga kɔɔɠuluɓa wolai ta ná-dounloun, nii é ɠɛni ga Kaɓeseyɛle nu, é lɔɠɔɠula faa wolaiti kɛɛni. Ɓenaya naa ɠa é Moaɓe ɠɔɔɠuluɓa wola felegɔ ʋaani. Tɔ ɠa ɓalaa, kɔɔlɛ vukɔi yɛni ʋuuzu foloi ta, é yeini ziɛyeɠei ɓomaʋɛ, é zalai ʋa.21Tɔ ɠa mɔnɔ é Ezipete nui ta ʋaani, nii gola maayikini, kpɛɛin zoni zea. Tukpɔ nɔ ɠa é ɠɛni zoni Ɓenaya ya, é ʋili Ezipete nui naa ma, é naa ná-kpɛɛin ɠula zea, é paa la.22Lɔɠɔɠula faa wolaiti kana Ɓenaya kɛɛni, Yeɠoyada ná-doun zunui, é lɔɠɔ wola zɔlɔɔni kɔɔɠuluɓa wola saʋagɔ ɠiligi niiti saama.23É lɛbiya wola zɔlɔɔni nu ʋuusaʋagɔiti (30) pɛ ba, kɛlɛ é la ɠɛni zeelini nu saʋagɔ mɔungiti su. Davide seini tɔ ɓɔɠɔi makɛ zalaʋusuiti unda.24Niiti ɓalaa ti ɠɛni nu ʋuusaʋagɔiti (30) saama: Zoaɓe kɛɛɠɛloin Azayɛle, Ɓɛteleyɛme nui Dodo ná-doun zunui Ɛlɛɠanan,25Sama ta Elika, Ɠalɔde nu felegɔiti,26Pelɛte nui Ɠelɛse, Tekoa nui Ikese ná-doun zunui Ila,27Anatɔte nui Aɓiyezɛɛl, Ɠusa nui Meɓunayi,28Aɠoa nui Salamon, Netofa nui Maɠalayi,29Netofa nui Ɓaana ná-doun zunui Ɠelɛɓe, Liɓayi ná-doun zunui Itayi, Giɓea nui Ɓɛnzamɛn yooi zu,30Pilaton nui Ɓenaya, Naɠalé-Gaase nui Yidayi,31Aalaɓa nui Aɓi-Alaɓon, Ɓaaleɠume nui Azamavɛte,32Saaleɓon nui Eliaɓa, Ɓené-Yasɛn, Zonatan,33Ɠalaal nui Sama, Alaal nui Salaal ná-doun zunui Ayiyame,34Aɠasebayi ná-doun zunui Elifelɛte, Maaka zunui ta dounloun ɠɛni de, Gilo nui Ayitofɛle ná-doun zunui Eliyame,35Kaalamɛle nui Ɠɛselayi, Alaɓe nui Paalayi,36Soɓa nui Natan ná-doun zunui Yigeyale, Gade nui Ɓani,37Amɔn nui Selɛke, Ɓeyelɔte nui Naalayi, nii é ɠɛni Seluya ná-doun zunui Zoaɓe ná-kɔɔɠɔ zɔɔlaiti seɠezu,38Ila ta Galɛɓe, Yetɛɛl nu felegɔiti,39ta Ɠɛte nui Ilii. Ti pɛ kpɔga ɠɛni ga nu ʋuusaʋa maazu lɔfela (37).
expand_more
Search