1 Samiyɛle4tod_pbt

1Samiyɛle ɠɛni naama wooi laazeelizu Izilayɛle pɛ ma, nii é ɠɛni sɔlɔɔsu Ɠɔoɠɔ GALAGI ya. Minazeɠe kesui zeɠe vaiFilisiti nuiti bɛ Izilayɛle nuiti ti ɠulani ga ti Filisiti nuiti daaɠomi ga kɔɔi, Izilayɛle ná-kɔɔʋɛbɛi ʋuuni Eɓɛn-Ezɛɛl. Filisiti nuiti ti tɔnɔi ʋu Afɛke taazuʋɛ.2Filisiti nuiti ti lopele ɓɛtɛni kɔɔɠɔ vai ma, ti kɔɔi lɔɔzeini ta Izilayɛle nuiti. Kɔɔi ɓɔini ga gola, Filisiti nuiti ti zeelini Izilayɛle nuiti ma, ti nu waanaanigɔ (4.000) ɠɛɠala ʋaani ti zaama, kɔɔɠɔzuʋɛ.3Zɔiti ti ʋelani, naati ti ɠalegai ma ma kɔɔlaaɠai zu, Izilayɛle lotuɠɔiti ti ɠɛni ɓɔɠɔ ɠaazaɠasu ga: «Lee vaa zu Ɠɔoɠɔ GALAGI ade yɛga na Filisiti nuiti ti ɗa vɔni ade ma?» Ti ɠɛni ɓɔɠɔ ma: «Ade li Silo, ade ʋa ga Ɠɔoɠɔ GALAGI ná-minazeɠe kesui. Naa a ɠɛna ade zaama, toɠa ade ɠizo ade zili nuiti zeei ma.»4Ti numaa leʋeni Silo, Ɠɔoɠɔ GALAGI ná-minazeɠe kesui ɠalama, Fai-Pɛ-Maliɠii, nii é zeini seeluɓɛinti unda. Zalaɠa ɠula nui Eli ná-doun zunu felegɔiti Wofeni ta Fineyase ti yɛni minazeɠe kesui ʋolu, ti ʋa.5Ti zeeliai ma ga Ɠɔoɠɔ GALAGI ná-minazeɠe kesui kɔɔlaaɠai zu, Izilayɛle ɠɔɔʋɛbɛi wooɠulani ga koozunɛɛi, eyɛsu zooi ɓali ti wu, ʋɛ ti ɠɛni ná.6Filisiti nuiti ti zɔngɔ wooi naa mɛnigai ma, ti ɠɛni ɓɔɠɔ ɠaazaɠasu, ti ɗa ɠɛ ma: «Kpee wolai nii ʋoluʋɛ ɠa ga leeni, Eɓulu nuiti ta-ɠɔɔlaaɠai zu?» Ti mɛnini ga Ɠɔoɠɔ GALAGI ná-minazeɠe kesui ɠa ti ʋaai la Izilayɛle ná-kɔɔlaaɠai zu.7Ti wola luani, ti ɗa ɠɛ ɓɔɠɔ ma: «Ade maanɔɠɔa, tɔɔzei GALA ge ʋa Eɓulu nuiti ta-ɠɔɔlaaɠai zu, é la ɠɛa ɠana pɔlɔma.8Ade maanɔɠɔa-o! Ɓɛ ɠa a ade ɠula zɛbɛsu ɠalagi niiti zea? Galagi tɛiti ka ti maanɔɠɔi ma zii mɔinmɔin seini Ezipete nuiti ma, teʋebai zu.9À zasulo! Filisiti nuiti, wo ɠɛ ga zunu ɓɔɠɔɓɔɠɔ! Wo mina ʋa lɔɔzu duɔlai zu, Eɓulu nuiti zea, eɠɛʋelei ti ɠɛa la wo ya duɔlai zu, naa ɠa é ba, à zunuyai ɠɛna, wo kɔɔi ɠɔ.»10Filisiti nuiti ti kɔɔi lɔɔzeini, ti vɔnini Izilayɛle ma, ɛsɛ pɛ ge ɗa ɓizɛ ga lɔɔɠua ná-seɠe ɠotai wu. Ti vɔnini Izilayɛle ma ga gola, nu waaʋuusaʋagɔ (30.000) ɠa é zaani Izilayɛle ʋa.11Filisiti nuiti ti GALA ná-minazeɠe kesui zeɠeni, Eli ná-doun zunu felegɔiti ma, Wofeni ta Fineyase, naati ti za kɔɔi zu.

Eli ta ná-doun anzai ti zaa vai

12Naama volo ɠilagi nɔ, zunu ɠila ge ɓizɛni, é ɠula kɔɔlaaɠai zu, é ɠɛni ga Ɓɛnzamɛn mavofodai zu nui ta, é ʋaani Silo, ná-seɠeiti baliʋaliai ga, fufiligi nɔungi pɛ unma, kidaaʋiligi maaʋele ma.13Tɛai ma taazuʋɛ, Eli ɠɛni zeini ná-kpɔkpɔgi ɠa, pele ɠobaʋɛ, é ɗa maaɓɔungi wo, tɔɔzei zii ɠɛni zoolɛzu ga GALA ná-minazeɠe kesui ma vai. Zunui tɛi paai ma, é nuuma wooi wo taazuʋɛ, nuɓusɛiti pɛ ti kpeei ɠulani bu.14Eli naama ɓeei mɛnigai ma, é gaazaɠagi woni ga: «Lee ma ɓee ɠa é loozu?» Zunui tɛi ge ʋaani, ga é naama vai laazeeli Eli ma.15Naama ziɛgi zu, Eli zii ma voloi ɠɛni ga kona ʋuutaaʋuu maazu lɔsaʋa (98), gaazuɠoleni niina.16Zunui ɠɛni Eli ma: «Pèlaʋɛ, gè zeɠe kɔɔɠɔzuʋɛ za nɔ.» Eli ɠɛni ma: «Leeni ɠa kɛai, dòun zunu?»17Keelai gooɠaaʋoteni, é ɠɛ ma: «Izilayɛle ɓizaa Filisiti nuiti ba, gi looʋɛ bu ga gola. È-loun zunu felegɔiti saaʋɛ vɔlɔ kɔɔi zu, Wofeni ta Fineyase. GALA ná-minazeɠe kesui ɓalaagi zeɠeʋɛ Filisiti nuiti bɛ.»18Siɛgi zu keelai ɓɔɛni la, é ʋilɛ GALA ná-minazeɠe kesui ʋa, Eli ɠulani ná-kpɔkpɔgi ɠa, é ɓudɛ ɓɔɠɔ maazu, é loo kpogi ɠobaʋɛ, kpoɓoi woloni, é za. Mazɔlɔɔ, Eli wɔlɔzaɠani niina, é wuini ɓɔɠɔ ma ɓalaa. Eli Izilayɛle lukpɔɠaaleʋeni kona ʋuunaanigɔ (40) laawu.19Ná-doin, Fineyase anzai ɠogi ɠaawɔɔni niina. É mɛnigai ma, ga ti GALA ná-minazeɠe kesui zeɠeʋɛ, naa ʋoluma, kɛɛmɔɔin ta sinigi ti zaa, anzanui nii zeini ɠɔɠɔʋolu, é doin zɔlɔɔ, tɔɔzei koozuwanai soni gaamanɔ.20Tɛi é ɠɛnina zaazu, anzanui niiti ti ɠɛni koba, naati ti ɠɛni ma: «Mina lua, mazɔlɔɔ è zunu loun zɔlɔɔga.» Kɛlɛ é la vɔlɔ ɠɛni woiloni naa ma, é ʋa ta zeɠe ba ti ʋɛ.21É doin laasei pɛɛni ga I-Kaɓɔde (nii poluʋɛ ga «lɛbiya la mɔ ná»). Mazɔlɔɔ é ɠɛni ma: «GALA ná-lɛbiyai zeɠea Izilayɛle ʋa.» Kɛai ma naa wosu, é ɠisiɛni, é ʋilɛ GALA ná-minazeɠe kesui ʋa, nii Filisiti nuiti ti seɠeni, ta kɛɛmɔɔin ta sinigi ti zaa vai.22É wooɠulani, é ɠɛ ma: «Ungo, lɛbiyai ɠula Izilayɛle ʋa, mazɔlɔɔ Izilayɛle zili nuiti ti lia ga GALA ná-minazeɠe kesui.»
expand_more
Search