1 Samiyɛle2tod_pbt

Ane ná-mama guyei

1Ane GALA falini ɠani:
«Zìi laavegɛ ga koozunɛɛi, Ɠɔoɠɔ GALAGI zaalai zu.Gè unbuzeɠei zɔlɔɔga Ɠɔoɠɔ GALAGI zaalai zu,nà zoo niina gè ɓɔɛ, gè sìli nuiti gooɠaaʋote,kòozunɛɛʋɛ, tɔɔzei GALA ge ɓɔga bà.2Ɠɔoɠɔ GALAGI ɠɛɠala la ná, tɔ ɠila kpe ka ɲadegai.É ɠula tɔun polu, gala kili ge la ná,gala kili ge la ná, é ʋa ɠɛ ga fasai, ga gɔnɔ ma ƓALAGI ɠɛʋele.3À wa-waso kpɔɛiti kpelana mu pele zu,ta poomu gooiti ti ɠɛa ɠulazu wo-laaʋɛti.Mazɔlɔɔ Ɠɔoɠɔ GALAGI ɠa ga GALAGI, nii é fai pɛ kwɛɛ,tɔ ɠa é nuɓusɛiti ta-ɠɛɛwotiiti buɲɛgi ɠɔɠɔsu.4Kɔɔɠuluɓa wolaiti ta-mɛɛinti ti ɠaleɠalea,kɛlɛ zɛbɛsulala nuiti ti zɛbɛi zɔlɔɔga.5Zɔiti ti yiɠoa ɠɛa de, naati ta laamiani gaiziɛzu.Kɛlɛ niiti mu pului ɠɛa ti ma, ti la mɔ ɓɛdɛni ga ti boti ɠɛ pɛ, ti ʋa ɠɔnɔ sɔlɔɔ.Doun zɔlɔɔtala anzanui doun lɔfela zɔlɔɔga, zɔi ma doin ɠɛa mɔinni zea, naa maaloga.6Ɠɔoɠɔ GALAGI ɠa a ɗa paai wo, é lati, é zɛnvui ve,tɔ ɠa a ɗa nui yɛnvui yei gɔvɛalaazu,tɔ nɔ ɠa ɓalaa a ɗa nui yɛnvui ɠula gɔvɛalaazu.7Ɠɔoɠɔ GALAGI ɠila kpe ka a ɗa baladai ve,é kpɛtɛi ɓalaa fe.Tɔ ɠa a ɗa nui maayei,kɛlɛ toɠa ɗa nui unbuzeɠe ɓalaa.8Toɠa ɗa bala nui wuzeɠe, é kula fufiligi zu,é zeaɲaka nui wuzeɠe, é kula kpoɠagi zu,é seizu ve ti ya, seizumaanɛgiti saama,é unfema losuʋɛ ve ti ya.Zooi ma ɓɛdɛgiti, ta ga Ɠɔoɠɔ GALAGI nɔnɔ,tiya ɠa é eteai zeini ti ma.9Ɠɔoɠɔ GALAGI ɠa ɗa ɓaa ná-wooɠɛɠila nuiti maazu, ti-ziɛzuʋɛ pɛ.Kɛlɛ faa ɲɔu ɠɛ nuiti undaa ɠa ʋili kpidii zu,mazɔlɔɔ nu nɔpɛ ge la vɔniga faa ma, ga tɔ ɓɔɠɔi zɛbɛi.10Zɔiti ti wuzeɠezu Ɠɔoɠɔ GALAGI laalɔɠɔma,ti kpein ti zu ɠa ɠoloɠolo.Ɠɔoɠɔ GALAGI ɠa yɛsu geeɠɔlɔgi zu, é ɓain ga tiye, eɠɛ geeɓadɛ lugi.Toɠa eteai lukpɔɠaaleʋe, é zeeli zou ɓela ga naa pɛ.Toɠa zobogi ve ná-masagi ya,nii é gulɔi ziaai ma, é ta ʋɛɛ sɛbɛi ʋa.»
11Naa pɛ poluma, Ɛlɛkana ɠaleni ma, ná-taazu Lama, kɛlɛ zunu loungoi Samiyɛle yɛni Silo, é ɗa botii ɠɛ Ɠɔoɠɔ GALAGI ʋɛ, zalaɠa ɠula nui Eli ɠobaʋɛ.

Eli ná-dointi ta-vai

12Eli ná-doun zunuiti ti ɠɛni ga nu ɲakaiti, ti la ɠɛni unfesu Ɠɔoɠɔ GALAGI ma.13Wɛlɛ, ti-ziɛ ʋelei ɠɛni ga nii, nii ti ɠɛni kɛɛzu ga bɛbɛi: Nu nɔpɛ é ʋaazu ga zalaɠai kula vai ma, zalaɠa ɠula nui ná-botiɠɛ nui ɠɛni liizu, naama nui ʋɔ bɛ, siɛgi zu zalaɠa zuai ɠɛɛzu la abui ɠa, é ɗa ɠili, a ɠɛna lia sua zɔɔ mitɛ wolai ɠa zea, nii ɲiigai ga ga saʋagɔ.14É ɓena mitɛ wolai lɔ aniɲakai zu, nii é ga diɠii, ɓaa pɔlɔ liɠii, ni naa laade kokoi, nii nɔpɛ mitɛi naa a lɔɔna ba, naa ɠa é ga zalaɠa ɠula nui nɔnɔi. Naa ɠa ti ɠɛni kɛɛzu ga Izilayɛle nuiti kpein, niiti ti ɠɛni ʋaazu Silo zalaɠa ɠula vai ma.15Yeeta ɓena ɠɛle ɠite, ti ʋa ɠɛ ti zalaɠa zuai ma wulɔiti gala, zalaɠa ɠula nui ná-botiɠɛ nui ɓena ʋa, naama nui ʋɔ bɛ, é ɠɛ ma: «Zalaɠa ɠula nui ná-mɔ suai ve, mazɔlɔɔ é la ʋaazu giliai ta zosu, ma wundui nɔ ɠa é pɔ.»16Ni zunui nii ti ná-zalaɠai ɠulazu, naa a ɠɛna ma: «Zɛna dɛ, gi ɓe ga ma wulɔi ɠala, ɗa ʋa niina, nii nɔpɛ è pɔ, è naa zeɠe,» zalaɠa ɠula nui ná-botiɠɛ nui ɓena ɠɛ ma: «Ɓa, kɛni è fe niizu, è la na kɛɛni, nà ta zeɠe ga zeeɠaaɓaai.»17Niima zunu loungoiti sɔgi wola ɲɔuni, Ɠɔoɠɔ GALAGI ɠaazu, tɔɔzei vebɛanii niiti nuiti ti ɠɛni feezu Ɠɔoɠɔ GALAGI ʋɛ, zunu loungoi niiti ti ɠɛni naa ɠɛɛzu ga fuun gani.18Kɛlɛ doungoi Samiyɛle ɠɛni ná-botii ɠɛɛzu Ɠɔoɠɔ GALAGI ʋɛ, kɔba zeɠei ɠɛni ga zalaɠa ɠula zeɠei.

Samiyɛle ta sɔlɔɔ nuiti

19Kona kula laa ɠilagila, Samiyɛle dee ɓena seɠe maavɔnigi ɓɛtɛ bɛ, ta la ɠɛna lia ta sinigi Silo, zalaɠa ɠula vai ma, é ɠɛni liizu ga naama zeɠei ná-doin ʋɔ.20Eli tuya looni Ɛlɛkana ta anzai ʋɛ, é ɠɛ ti ma: «Ɠɔoɠɔ GALAGI va bu ga é doun ɠiligaa zɔlɔɔ è-anzai nii ʋa, niiti ta ɠɛ ga Samiyɛle ʋotogi, nii é fea Ɠɔoɠɔ GALAGI ʋɛ.» Naa ʋoluma, ti ɠaleni ma ta-laazu.21Ɠɔoɠɔ GALAGI Ane maawɔinɠaani, polu ɠɛ ga Ane zunu loun saʋagɔ, ta anzanu loun felegɔ ɠiligaa zɔlɔɔni ʋolu. Naama ziɛgi zu Samiyɛle ɠɛni ba, é ɗa wɔɔlɔ, Ɠɔoɠɔ GALAGI ɠaazu.

Eli ta ná-dointi

22Eli wɔlɔzaɠani niina ga gola. É ná-doun zunuiti siɛ ʋelei ma woo mɛnini, é ʋilɛ Izilayɛle nuiti ba, é mɛnini ga ná-doun zunuiti ta vɔlɔ laazu ga anzanuiti, niiti ti ɠaalɛɛzu ba GALA daaɠomi seɠe ʋɛlɛi laaʋɛ.23Eli ɠɛni ná-doun zunuiti ma: «Leeni ɠa gè mɛnisu, é ʋilɛ wo ʋa? Ɛsɛ pɛ ka wo-lɔɠɔ ɲɔi wosu, tɔɔzei wo-ziɛ ʋelei la ʋani. Leeni vaa zu wo naa ɠɛɛzu?24Dòun zunuiti, à yeeɠula naazu, nii gè mɛnisu é ʋilɛ wo ʋa, naa la ʋani. Wa Ɠɔoɠɔ GALAGI ná-nuɓusɛiti diizu tɔ koloɠologiti ma.25Ni nui ta a koto ɠɛɛna bɔɔla nuɓusɛi ta laalɔɠɔma, GALA ka é ga tukpɔɠaaleʋe nui naazu, kɛlɛ zɔi é kotoi ɠɛɛzu, Ɠɔoɠɔ GALAGI ɓɔɠɔi laalɔɠɔma, ɓɛ ɠa a naama nui maavaawo?» Eli nii kpein boni, kɛlɛ ná-doun zunuiti ti la ɠɛni kɛɛni, ti ʋa ti-ɠɛɛ wooi zo, tɔɔzei Ɠɔoɠɔ GALAGI deveni niina ga ti za.26Samiyɛle ma zunu loungoi ɠɛni wɔɔlɔzu, é ɗa Ɠɔoɠɔ GALAGI ta nuɓusɛiti ziilaa.

Nimizai é zeiniEli ná-pɛlɛyeɠei ma

27Yeeta GALA goo wo nui ta ʋaani, é ɠɛ Eli ma: «Ɠɔoɠɔ GALAGI wooi ɠaa: ‹È suɠwɛɛ kala, ga è-mɛmɛwolani kɛai ma Ezipete yooi zu, Falaɠɔn ná-pɛlɛi wu ga duɔiti, gè ɓɔɠɔ lɛɛni ga tiye, tiya-o, ta-ʋɛlɛyeɠeiti-yo.28Izilayɛle ʋɛlɛyeɠei kpein saama, è-mɛmɛwola Aalɔn ɠa gè yiimazeɠeni la, ga é ɠɛ ga nà-zalaɠa ɠula nui. É ɗa lo nà-zalaɠa ɠulazuʋɛ, é ɗa nà-zalaɠaiti daazeeli mà, é ɗa ansansegiti gala bɛ̀, ta é ɗa gàazaɠa. Gè ti-laamiizu veeni, tɔ-o, mavofodai-yo, gala zalaɠai ti-ma zuaiti ba, niiti Izilayɛle nuiti ti ʋaazu la.29Toɠa ɠale mu, wo bɛlɛ ɠulazu nà-zalaɠaiti ta nà-vebɛaniiti ba, nii gè ma levei veai, ga é ɗa ɠɛ nà-pɛlɛi wu? Lee vaa zu è è-loun zunuiti fizɔsu bà? Wo ɗa ɓɔɠɔ ɠɔnɔkula ga zalaɠa zuai ʋasuʋɛti, niiti nà-nuɓusɛiti, Izilayɛle nuiti, ti ʋaazu la pɔ̀?30« ‹Naa ɠa é ba, tɛi é ɠɛa ɠana, nɛ̀i gè ga Izilayɛle ná-GALAGI, gòoi ɠa é ga nii: Gè minazeɠeni è ʋɛ, ɗa-o, ɗa-ʋɛlɛyeɠei-yo, ta è-mɛmɛwolani tɔnɔ ma ʋɛlɛyeɠei ɓalaa, ga wa ɠa wo ga nà-botiɠɛ nuiti yeenɔpɛ eyɛsu ɠɔ. Kɛlɛ, nɔ̀un nà, Ɠɔoɠɔ GALAGI, nà bosu è ma ga minazeɠegi naa li poun. Mazɔlɔɔ nà ɗa ɠaazu unfegi ve naati bɛ, niiti ti dɛ̀bizu, kɛlɛ niiti ti bɛ̀lɛlalazu, unfegi ɠa ɗa yei ga tiye.31Foloi tanigaa ta ʋaazu, nà ʋaazu ɗa-ʋɛlɛyeɠei, ta è-mɛmɛwola nɔnɔ ma ʋɛlɛyeɠei zuvikɛi ɠulazu ti ya, naa ɠa a kɛ, nu wɔlɔzaɠa nɔpɛ ge mina mɔ ɠɛ ɗa-ʋɛlɛyeɠei wu.32Ɗa wɛlɛ, è è zili nui ɠa, é ɗa ɠaaɓa sèi ʋɛlɛi ma. Fai pɛ ka ɠɛ ga pagɔ Izilayɛle ʋɛlɛyeɠe ʋɛ, naama ziɛgi zu nu la mɔ kɛwola wɔlɔ nɔpɛ kaa, ɗa-ʋɛlɛi wu.33Naa pɛ ge ɠɛɛ ʋa, nà ʋaazu è-mavofodai gila makɛsu, nà-zalaɠa ɠulazuʋɛ ɠobaʋɛ, nii a kɛ é ɗa nimiza ɓɔɠɔ ma, ga toloi ta kiteʋei. Názu ma, ɗa-ʋɛlɛyeɠei wu nui mɔtaiti kpein ta za, ti-ma niinɛlai zu.34« ‹Nii é ʋaazu ɠɛɛzu ga è-loun felegɔiti, Wofeni, ta Fineyase, naa ɠa é ɠɛɛzu ga poogi è ʋɛ, ga nii gè bosu gaamai ʋe, tɔɔzei, ti felegɔ pɛ ta zaazu folo ɠila kpe.35Naa ʋoluma, nà yiimazeɠe ga zalaɠa ɠula nu ɓɔɠɔ ʋɛ, gè sei, nii a ɠɛ ga lada nu, toɠa ziɛ ga nà-kisiɛiti, ta zìimai vaiti. Nà mavofodai ɓɛtɛ ba, nii a yɛ ná ɠɔ, é ɠɛ ga zalaɠa ɠula nui, masagi ɠoba, nii gè yiimazeɠezu la, gè gulɔi ziɛ ma.36Zɔi a yɛ vulua è-mavofodai zu, naa ɠa ʋa zalaɠa ɠula nui naa ʋɔ bɛ, é ʋilɛ ɲiibiɠa kakala, nii a kɛ é ʋa wali ɠilagi zɔlɔɔ, ɓaa ɓulu ɓuɠa ɠila ko. Toɠa zalaɠa ɠula nui naa maanɛɛnɛ, é ɠɛ ma: Soma, è boti ve zèa, zalaɠa ɠulazuʋɛ, nii a kɛ gè ɓulu ɓuɠa go zɔlɔɔ ga kɔnɔgi.› »
expand_more
Search