Nətɨ sipsip təmuahrue nauəuə iətəm kəmaiu-aiu
1Nauəuə kəmaiuiu kəmuvan-ərain kau səpɨn Kəni əmeiko, iəmafu kig tətəharəg-pəri e rəhan jeə, kəni matos nauəuə kəti e nəhlmɨn maru iətəm kəmaiu-aiu, kəni nauəuə ko kəmətei=pən nati e nɨkalɨn pəti mil, kəni kəmaiu-aiu kuvan-ərain kau səpɨn məmə otaskəlɨm tiəkɨs.2Kəni iəmeruh agelo əsanən kəti tətagət əfəməh mətəni pətɨgəm məmə, “?Pəh u in təhmen məhruahru məmə otoh rəkɨs nati iətəm kəmuvan-ərain e nauəuə u lan, kəni migaru lan?”3Mətəu iətəmimi kəti tɨkə u ilɨs e negəu e neai, uə ləhtəni e nəhue nɨftəni, uə nɨki nɨftəni, kəti ko in təsəhruahruiən o nigaruiən e nauəuə u, mafin.4Kəni iəmətasək mətasək, mətəu-inu kəsehiən iətəmimi kəti iətəm təhmen məhruahru o nigaruiən e nauəuə u mafin.5Kəni eldə asoli mɨn u kəti iəhuitən təni=pa kəm iəu məmə, “!Sasəkiən! Məsal=pən-to meruh, Laion rəha Nəuanɨləuɨs rəha Juta,in nəukətɨ Tefɨt,in tɨnol win rəkɨs e nəluagɨniən rəhan. Tol lanəha, in təhruahru agɨn o nigaruiən e nauəuə kəha, kəni meatuv rəkɨs nati əha ilah səpɨn iətəm kəmuvan-ərain lan.”6Kəni əmeiko iəkafu Nətɨ Sipsip, tətəhtul əpəha e nəlugɨn e jeə rəha kig mɨne nati kuvət u kəutəmiəgəh mɨne nətəmi asoli mɨn nətəm kəmotəhuitən. Nətɨ Sipsip u, nəkafu məmə kəmohamu rəkɨs. Kəni rəhnəpati ilah səpɨn,kəni nəhmtɨn ilah səpɨn mɨn, ilah kəha, kəutəhtul o narmɨn rəha Uhgɨn ilah səpɨn iətəm təmahli pətɨgəm ilah kəhuvən e nəhue nɨftəni.7Nətɨ Sipsip əha, təmuvən meapən mos rəkɨs nauəuə u e rəhn maru kig iətəm tətəharəg-pəri e rəhan jeə.8Kəni nian in tɨnaskəlɨm nauəuə kəha, kəni nati mɨn əha u kəutəmiəgəh ilah kuvət, mɨne nətəmi asoli nətəm kəmotos nəhuitən ilah tuenti-fo, ilah kəutasiəulɨn nəulɨlah o Nətɨ Sipsip, moteiuaiu, nɨpənəgɨlah tatek nɨftəni. Ilah rəfin kautos hapmɨn mɨne pesɨn mɨn iətəm kəmol e aiən u kol tətoraip-oraip, təriauəh e nati pien-pien mɨn iətəm nəmiəvɨn təuvɨr. Kəni nati pien-pien u, in təhmen e nəfakiən mɨn rəha nətəmimi rəha Uhgɨn.9Kəni nati mɨn kəha kautəmiəgəh ilah kuvət mɨne nətəmi asoli nətəm kəmotəhuitən, kəmautani nəpuən vi kəti məmə,“Ik nəkəhruahru, məhmen agɨn o nələsiən nauəuə u,kəni meatuv rəkɨs nati mɨn iətəm kəmuvan-ərain lan,mətəu-inu kəmohamu ik,kəni məmos nəhmtɨ nətəmimi e nɨramməmə ilah rəha Uhgɨn.Kəni ilah kəmotsɨ=pən e nəuanɨləuɨs mɨn rəfin,mɨne nəghatiən mɨn rəfin,mɨne nɨtəni mɨne rəfin,mɨne nətəmi nɨlosɨlah tol pɨsɨn pɨsɨn mɨn,10kəni nəmol ilah kotatɨg ahgəl rəhan narmənɨgiən,kəni ilah rəham pris mɨn,kautol uək rəha Uhgɨn rəhatɨmah.Ilah okotarmənɨg e nəhue nɨtəni.”11Kəni iəkəsal-pen mɨn mafu, kəni mətəu mɨn nəuia nagelo mɨn tepət tepət, ko kəruru nafiniən. Kəmotəhtul, motɨtəlau e jeə rəha kig, mɨne nati mɨn iətəm kəutəmiəgəh, mɨne nətəmi asoli mɨn nətəm kəmotəhuitən.12Kəni ilah kəutani əfəməh nəpuən məmə:“!Nətɨ Sipsip iətəm kəmohamu,in təhruahru məhmen agɨn məmə kotəni-vivi in,mətəu-inu tatos rəfin nəsanəniən,mɨne nautə, mɨne neinatɨgiən,mɨne nahgin, mɨne nepətiən əhagəhag!!Təuvɨr agɨn məmə kautɨsiai in!”13Kəni iəmətəu mɨn natimnati rəfin iətəm Uhgɨn təmol e negəu e neai, mɨne nəhue nɨftəni, mɨne Ima Nətəm Kəmohmɨs Ikɨn, mɨne e nɨki nɨtəhi, mɨne natimnati mɨn rəfin iətəm kautatɨg e lah, ilah rəfin kautəni məmə:“Pəh nəni-viviən mɨne nɨsiaiən tatuvən o kig iətəm tətəharəg-pəri e rəhan jeə mɨne Nətɨ Sipsip,mətəu-inu in tatos nepətiən əhagəhag mɨne narmənɨgiən.!Pəh nəni-viviən mɨne nɨsiaiən tuvən o lau,kəni tatuvən, matuvən, matuvən, naunun tɨkə!”14Kəni nati mɨn kəha ilah kuvət u kəutəmiəgəh, kotəni məmə, “!Əuəh!” kəni nətəmi asoli mɨn nətəm kəmotəhuitən kotɨsin nəulɨlah ohni, məuteiuaiu, nɨpənəgɨlah tatek nɨftəni, məutəfaki kəm in.