Ts'etta ıxhaynbı30tkr_ibt

1Raahileysse Yaaq'ubıs uşax uxas dəxəmee, məng'ee yuçeys paxılıyvalla haa'a. Məng'ee adamiyk'le eyhen: – Zas uşax hele, deşxhee, qiyk'asda!2Yaaq'ub Raahileylqa qəllamışxha eyhen: – Nya'a zıne vas uşax hidele, nya'a zı Allahne vor?3Raahilee eyhen: – Yizda nukar Bilyhan alert'e, məng'ı'ka g'alixhe. Məng'ee uşax uxumee zı mana alyart'u mang'us yedyvalla haa'as, zı uşaxdena imeexvacenva.4Raahilee cena nukar Bilyhan adamiys xhunaşşe yixhecenva heele. Yaaq'ubır məng'ı'ka g'ılexhana.5Bilyhan vuxhne ayxu, mang'us dix uxu.6Raahilee eyhen: – Allah məhkamee yizde sural ıxha, yizın nıq' g'ayxhı, zas dix huvu. Mançil-allad məng'ee mang'un do Dani (Mang'vee məhkamee havacesda) giyxhe.7Raahileyna nukar Bilyhan meer vuxhne eexva, məng'ee Yaaq'ubıs q'ör'esda dix uxooxa.8Raahilee eyhen: – Zı yuçeyka saç'iyku, Allahne kumagıka ğamiyxhana. Məng'ee mançil-allad uşaxın do Naftali (yizın saç'iykuy) giyxhe.9Leaysse sabara gahna uşaxar uxooxas vəvxü deş. Məng'ee mançil-allar cena nukar Zilypan Yaaq'ubıs xhunaşşe yixhecenva heele.10Leayne nukaree Zilypanee Yaaq'ubıs sa dix uxu.11Leayee eyhen: – Nimee xəbna xoşbaxtıyvallayiy! Məng'ee mang'un doyud Qad (xoşbaxtıyvalla) giyxhe.12Leayne nukaree Zilypanee Yaaq'ubıs q'ör'esda dix uxu.13Leayee eyhen: – Zı baxtivarır, yadaaşed zak'le baxtivarva eyhes. Məng'ee uşaxın do Aşer (baxtivar) giyxhe.14Ruvenık'le suk qiviyşalne gahıl çolead mandragorunala iveeke, mang'vee manbı yedis Leays adayle. Raahilee Leayk'le eyhen: – Yiğne dixee adıyn mandragorbışike zasıd helelan.15Leayee məng'ı'k'le eyhen: – Adamiy xılençe g'ayşuy ç'əvxha dişdee? Həşded dixen mandragorbıne g'ayşes ıkkan? Raahilee eyhen: – Həməxüdxheene, hasre dixene mandragorbışil-alla ine xəmdiys yizda adamiy vaka g'alixhecen.16Yaaq'ub exheeqana çoleençe qööng'ə, mang'unee ögeeqa Lea qığeyç'u, eyhen: – Ğu g'iyna zaka g'alixhas, yizde dixee adıyne mandragorbışis zı ğu alişşu. Yaaq'ub mane xəmde məng'ı'ka g'ılexha.17Allahık'le Leayna düə giviyxhena. Lea vuxhne ayxu, Yaaq'ubıs xhor'esda dix uxu.18Leayee eyhen: – Allahee zı yizda nukar yizde adamiys hiyvuy höötxüva, yizda hək' quvuna. Məng'ee uşaxın do İssaxar (Mang'vee hək' quvuna) giyxhe.19Leaye meer vuxhne eexva, məng'ee Yaaq'ubıs yixhır'esda dix uxooxa.20Məng'ee eyhen: – Allahee zas sa yugna pay huvu. Zı mang'us yixhıyre dix uxuva, həşde yizde adamee zas hı'rmat gyuvxhesda. Məng'ee uşaxın do Zevulun (hı'rmat) giyxhe.21Sabara gahıle məng'ee sa yiş yuxu, doyud Dina giyxhe.22Allahee Raahile yik'el qiyelee'e, məng'ı'na düə g'avxhu, uşax uxasın xhinne qee'e.23Mana vuxhne ayxu sa dix uxu eyhen: – Allahee zalin pisın do ak'anı'iyn.24«Rəbbee zas sayir dix helecenva» uvhu, Raahilee mang'un do Yusuf (Mang'vee sayir helecenva) giyxhe.

Yaaq'ub karana eyxhe

25Raahilee Yusuf uxuyle qiyğa, Yaaq'ubee Lavanık'le eyhen: – Zı g'aykke, hasre yizde ölkeeqa, yizde cigabışeeqa əlyhəəs.26Havaasre, zı yizın xhunaşşeriy uşaxar alyapt'ı, əlyhəəs. Zı manbışil-alla vas iş g'avcu. Vak'lecad yugda ats'a, zı vas nimeena iş hav'u vuxhay.27Lavanee mang'uk'le eyhen: – Zı yiğne ulen aqqıxheene, yizde k'ane axve. Falıka ilyakkımee, zak'le Rəbbee zas val-alla xayir-düə huvuy g'acuyn.28Qiyğa meed eyhen: – Hək' nimeenayiy zak'le eyhe, zı qevles.29Yaaq'ubee mang'uk'le eyhen: – Zı vas nəxbiy iş hav'uva, yiğın syurıbıd nimee qeetxhava, vak'lecad ats'an.30Zı vasqa qalesse, vaqa çavra-vəq'ə k'ıldaniy vod, qiyğalemee xılece geed qıxha. Rəbbe zı vasqa qarıyka vas xayir-düə huvu. Manke zı mısane yizde xizannemee iş haa'as?31Lavanee eyhen: – Vas hucoona heles? Yaaq'ubee eyhen: – Zas vuççud himele. Ğu zas sa kar ha'asva cuvab huveene, zı meer yiğne syurıbışiqa ilyakka.32Hasre g'iyna zı yiğne gırgıne syurıbışde yı'q'neençe ılğeç'u, vəq'əbışdeyiy ts'e'bışde yı'q'neençe k'udananiy xornan vəq'əbıyiy ts'e'bı zas cura'as. Maadın k'aarın urgbıd zı alyaat'asınbı. Manab yizda hək' vuxhecen.33G'iyniyke şaqa zaqa qopkuna hək'va vasse ilyakkas əxə. K'uda deşde, xor deşde ts'e'ıle ğayrı, k'aarıne urgule ğayrı, mebna vak'le g'avcee, havaasre mana qööqüna xhinnee vuxhecen.34Lavanee eyhen: – Hasre ğu eyhen xhinnee ixhecen.35Qiyğa Lavaneeme manecad yiğıl k'udananiy xornan (cagvaran cigabınan) q'ınabıyiy ts'e'bı, k'aarın urgbı curı'ı, Yaaq'ubısqa deş, dixbışisqa qele.36Qiyğa vuc Yaaq'ubıke xhebne yiğee əlyhəəsda yəqmee əq'əna qexhe. Yaaq'ubeeme Lavanın mansa axuyn syuru uxhiyxhan ha'a ıxha.37Yaaq'ubee q'avaxın, badamın, çinarın tübəəbı hatq'ur, tübəəbışin q'abıx qişşu, cagvaran xorbı ha'a ıxha.38Qiyğad q'abıx qişşuyn tübəəbı syurıbışe xhyan ulyoğasde axurbışeeqa, həyvanaaşine ögiylqa giyxhe. Manbı qadı, xhyanbı ulyoğamee, mançis ı'mra abayle vuxha.39Mançis tübəəbı gixhxhiyne cigayne ögiyl ı'mra abımee, k'udananiy xornan balabı eyxhe ıxha.40Yaaq'ubee urgbı cura'anbı. Lavanne syuruneedın vəq'əbıd k'udananeyiy k'aarıne həyvanaaşine suralqa ilyakka'a. Mang'vee cun syuru Lavanne syuriyl alikka'a deş.41Gucnane həyvanaaşis ı'mra vüqqəmee, Yaaq'ubee axurbışde yı'q'neeqa man tübəəbı giyxhe ıxha, mançis ı'mra tübəəbınane cigayne ögiyl ablecenva.42Həyvanar zəı'fdanang'a, mang'vee man tübər giyxhe ıxha deş. Məxüd, gucukan həyvanar Yaaq'ubınbı, zəı'fınbıd Lavanınbı eyxhe.43Yaaq'ub məxür yiğ-yiğıle geed karnana eyxhe, mang'uqa geed syurıbı, həmbal adameriy həmbal zəiyfabı, devabı, əməler eyxhe.
expand_more
Search