1Giya Loi iŋa ŋgora iyake:“Kaiwae Mowab gharɨgharɨniye thɨ vakatha valaŋa tharɨmane ya mwana njogha lo ghatemuruke weŋgi.Kaiwae va thɨ tɨghɨvoreŋa Idom lenji kiŋ wokiwokiniye na thɨ ŋambu. (Ŋgoreiye ghɨmu.)2Iya kaiwae ne ya variya ŋɨghe Mowab,na i ŋambwa Kiriyot gha ŋgoloŋgolo vurɨvurɨghegheniyeko wolaghɨye. Na Mowab gharɨgharɨniye ne thiya mare mbaŋa thɨ loŋwegaithɨ laiye na ragagaithɨ thɨ yaro na mema ghalɨŋanji.3Ne ya unɨgha Mowab gharambarombaro na gha randevivako wolaghɨye.”Giya Loi iŋa.
Juda
4Giya Loi iŋa ŋgora iyake:“Kaiwae Juda gharɨgharɨniye thɨ vakatha valaŋa tharɨ,mane ya mwana njogha lo ghatemuruke weŋgi,kaiwae va thɨ botewayatho lo vavaghare na ma thɨ ghambugha lo mbaro,na kaiwae thɨ ghambu thavwiŋgiya loi kwanɨkwan/vatavatadɨ orumburumbunji va thɨ ghambuŋgi.5Iya kaiwae ne ya variya ndɨghe i nja Judana i nda Jerusalem gha ŋgoloŋgolo vurɨvurɨghegheniye.”
Loi le ghatemuru weŋgiya Isirel
6Giya Loi iŋa ŋgoreiyake:“Kaiwae Isirel gharɨgharɨniye thɨ vakatha valaŋa tharɨmane ya mwana njogha lo ghatemuru weŋgi,kaiwae vo thɨ vakuneŋa ŋgiya ghɨmoghɨmoru rumwarumwaruniye na thɨ tabo rakakaiwobwagakaiwae ma valɨkaiwanji thɨ vamodo ghanji ghaga,na mbinyembinyeŋgu iya ma valɨkaiwanji thɨ vamoda ghanji ghaga nasiye gheghenji/gheghe ghae modae.7Thɨ vuruvaulule ŋgiya ranjavovo na ma e lenji vurɨgheghe,na thɨ ghɨmararawe ŋgiya mbinyembinyeŋgu.Amala weiye ramae thɨ loŋga weinji rakakaiwo bwaga mbe yeunda eŋge,na ma thɨ yavwatata wanaŋgo.8E lenji ghamba kururuŋgi ghɨmoghɨmoru Thɨ ghena e kwamakwama thɨ mban weŋgiya mbinyembinyeŋguiya thaŋwethaŋwe winyimariyeko.Lenji Loi ele Ŋgolo Boboma thɨ muna waen thɨ mbana weŋgiya thavala e ghanji ghaga mane ina weŋgi.9Iyemaeŋge ya mukuwo ŋgiya Amori gharɨgharɨniye e maranji/ghamwanji,ghɨmoghɨmoruko iya lenji molamolao ŋgoreiya umbwa sida na lenji vurɨvurɨgheghe ŋgoreiya umbwa ouk.10Va ya vaŋgu raŋgiyaŋga Ijipt e tɨnena ya viva e ghemi e njamnjam bwa theghathegha ghwevarɨ e tɨnena ya giya Amori lenji thelauke e ghemi lemi ghamba yakuyaku.11Va ya tuthi ŋgiya lemi ŋgaŋgana vavana thɨ tabo ghalɨŋae gharautu nathethegha vavana thɨ tabo Najarait.I emunjorako, Isirel gharɨgharɨniye?”Giya Loi iŋa.12Giya Loi mbowo iŋava:“Ko iyemaeŋge u vakatha ŋgiya Najarait thɨ muna waenna u dagetenɨŋgiya ghalɨŋae gharautu thava thɨ utuŋa ghalɨŋaŋgu.13Iya kaiwae ne ya mbiye njoŋaŋge e thelauko ŋgoreiya waŋga momod i mbiye njoŋa mbaŋa thɨ dowevanjara e wit.14Ghemi iya hu maya e rukurukuna mane hu voitete,thavala thɨ vurɨgheghe ne thɨ njavovona ragagaithɨ vurɨvurɨghegheniye mane valɨkaiwanji thɨ ndetenɨtena ghanjimberegha.15Thela i gaithɨ e mbwenara mane i ndeghathɨ ele ghamba ndeghathɨ,thavala thɨ vurɨgheghe mane thɨ vogha,thavala thɨ gaithɨ e hosɨ mane thɨ vogha e yawayawalinji.16Thela ragagaithɨ vurɨvurɨghegheniye nevole e mbaŋako iyako i bigiyatho le gaithɨ bigibiginiye na i voghɨ.”Giya Loi iŋa.