पवित्र आत्मायि आगमान
1जब पेन्तिकोसयि ङिन लेप्ते, हतिबा पोरो सा झिला झोमदे त्येतु।2तेहि तेङलाने हो:प्तामेला मुक्पा छोम्मुवा झिकि क्ये च्वरा झि लेप्सोङ, राङ हतिबा ताताति खिम पोरो राङ खाँसोङ।3मेयि मेरतो च्वरा हतिबे तेहा थोङसोङ, राङ भागभाग च्युङदे हतिबा पोरोयि थोला त्येसोङ।4तेहि पोरो पवित्र आत्मायि खाँसोङ, राङ पवित्र आत्मायि हतिबाला पिपिना क्ये तोतोना च्वरा हतिबा स्यान क्येला ताम नाला छेलसोङ।5तेङलायि हअला होएता देश पोरो कजसुबायि भक्ता यहुदि हति भेलाला यरुश्लेमला ताताता धु।6तेहि हतितुइना धि क्ये थोइरे मियि तुम झोमसोङ। हतिबा हा:लाइसोङ, चिचालानाना पोरोयि राँ राँसि क्येला हतिबा ताम नाङान थोइसोङ।7हतिबा पोरो हा:लाइसोङ, राङ हा:लाइरे नाला छेलसोङ, “च्हि धि ताम नाङानबा पोरो गालिलितेबा मानाइ च्हि?8ता च्हिरु क्याइरे हतिबा पोरोयि रेँ क्येला ताम नानाइबा ङि थोयिन धुइ?9हु ङिहा पार्थीतेबा, मादियातेबा, एलामि, मेसोपोटामियायि, यहुदियायि, कापाडोकियाला पोन्टस, एशियाला त्येएङान तेबा।10फ्रिगिया, पामफिलिया, मिश्र र कुरेनीला परि होङान लिबिया छेत्रतेबा राङ रोमने लेलेबि यहुदितेबा राङ यहुदि मत मानि किङान ङिकार होतो।11यहुदि राङ यहुदि मान्ते मि ङिकार यहुदिया च्युङसोङ। क्रेटला त्योएङानतेबा राङ अरबितेबा याङ होतो, तेहि ङे राँ राँसि क्येला कजसुबायि हा:छेयायि लाइयि टाइक्ये हतिबे क्याक्याइबा थोयिन्दु।”12हतिबा पोरो हा:लाइसोङ राङ आच्या माच्याला चिकि स्यान झिला नाइसोङ, “धि खुँ च्हि ना?”13हिन्नाङ स्यानतेबे कुँरे क्याइरे नाइसोङ, “हतिबा सारबा अंगुरयि खुवायि सिदु।”पत्रुसयि लोन
14हिन्नाङ पत्रुसयि च्युच्यि ङ्याबो लाँरे क्ये छेया किङगा हतिबाला नाइसोङ, “यहुदियायि मितेबा, राङ यरुश्लेमला त्योएङान मितेबा पोरो, खेला धि ताम छ्या सअ, राङ ङाहि ताम ङ्योन।15चिचालानाना खि ठानि क्याक्याइबा च्वरा धिबा स्यिस्यिया मेता, चिचालानाना थाल्ला नामेयि नौ बजे मात्र च्युच्युङा होतो।16हिन्नाङ योएल ङोन्सेखिलङान यि लाम्ला नानाइबि ताम धि राङ ना,17‘सिनि ङिनतेबाला धि च्वरा होङान ना नाइरे कजसुबा ने्न्दु, ङा मि पोरोयि थोला ङाहि आत्मा झ्योज्याइ, राङ खि पिजातेबा, राङ हतिबे पुमोतेबे ङोन्सेखिलङान ना, राङ हतिबे स्यारातेबे दर्शन थोङान ना, राङ हतिबे काप्पोतेबे मुलाम थोङान ना,18हिना, ङा ङारि यक्मुवा यक्पुवातेबे थोला हति ङिनतेबाला ङाहि आत्मा झ्योज्याइ, राङ हतिबे ङोन्सेखिलङान ना।19थोकि पान्नाङला ङा हा:लाइयापयि लाइ राङ हअ पृथ्वीला हा:लाइयापयि लाइतेबा तोनङान ना, अर्थात ठा, मे, राङ तुप्पि मुस्लो।20कजसुबायि छेया राङ हा:लाइयापयि ङिन होङयापले ताङला ङिमा मुन्नाला राङ धा: ठाला परिनत होङान ना।21तेहि सुइ कजसुबायि मिन खेरकिन, हतिला थारथोनयाप खुङान ना।’”22“इस्राएलि मितेबा, धि तामतेबा ङ्योन, नासरतयि येशु धि च्वरा मिना, काङला कजसुबायि शक्तिशालि लाइतेबा, हा:लाइयापयि लाइतेबा राङ हा:लाइयापयि लाइतेबाने खि धुनला साछि पिपिना होतो। ख्योए छ्या होतो माने कि कजसुबायि खि उइला धि लाइतेबा ख्युइ लाम्ला क्याक्याइबा ना।23कजसुबायि थाकच्योए क्याक्याइबि थारका योजाना राङ ताङमे छोइ च्वरा थेथेबा धि येशुला राङ तिक्पा किङानयि मितेबे लाकि लाम्ला खि क्रुसला तारे स्येसोङ।24खोला कजसुबायि स्यियापयि तुकाने थारथोनदु च्युक्ते सोम्बो सोइसोङ। चिचालानाना कालयि हअला खो होङयाप असम्भव ना।25चिचालानाना दाउदयि ख्युइ भारेला नेन्दु, ‘ङाहि प्रभुला बारतै ङाहि धुनला थोङसोङ, चिचालाना ङा खो माख्याम नाइरे खो ङाहि लाक्पा याइ यहला होतो।26हतिचाला ङाहि सम किप्पो राङ ङाहि च्ये कासोङ। हति अर्थात ङाहि स्हुयि याङ आशाला सोनङान ना।27चिचालानाना ख्युइ ङाहि उला हअलुला तोङान मानाना, न त ख्युइ रेँ पवित्र मियि स्हु रुलदु झ्युङान ना।28ख्युइ ङाला मिजेयि लाम स्येसोङ, ख्युइ ङाला रेँ उपस्थितियि लाम्ला आन्नद क्याइरे गदगद सोङान ना।’”29“भाइबा, हुइ ताङबुइ दाउदयि भारेला ङा ख्योएला थारका क्याइरे नाङ्युइकिन, कि खो स्यिरे राङ कुँरे, तेहि तिरिङयि ङिन थु ख्युइ तुर होए राङ होतो।30हतिचाला ङोन्सेखिलङान च्युच्युङाति, खोला छ्या होतो कि कजसुबायि ना क्याक्याला होतो कि ख्युइ छिमा पिपिबाने ख्युइ क्याल ठिला मिझिला कजसुबायि भोरङान ना।31ताङलाने राङ धि थोङदे ख्रिष्ट स्यिरे सोम्बो च्युङदे लाँलाबि भारेला नानाइबा नोम कि खो न हअलुला ताङोमका कि, न त ख्युइ स्हु राङ रुलदे।”32“हति येशुला राङ कजसुबायि सोम्बो सोइसोङ। धि तामयि ङे पोरो साछि होतो।33हतिचाला कजसुबायि लाक्पा याइ यहला खोला तेक्ते पोरसोङ, राङ आकेने पवित्र आत्मायि ना क्येलयाप खुँसोङ, राङ ख्युइ धि च्योच्युवा ना, काङ ख्योए ङ्यान किन राङ थोइकिन।34चिचालानाना दाउद ता तेङलाला माझिबा, हिन्नाङ खो खुरि नेन्दु, ‘कजसुबायि ङाहि प्रभुला नाइसोङ, ख्योए ङाहि लाक्पा याइ यहला त्योए35जब थु ङा ख्युइ टाला ख्युइ काङबि तिङबा मिसुवा।’”36“हतिचाला इस्राएलयि प्येरा पोरो धि पक्का क्याइरे हा:कुवा कि येशु सुला ख्युइ क्रुसला तारे, कजसुबायि खोला प्रभु राङ ख्रिष्ट सोइसोङ।”37धि ताम थोइरे हतिबे सम अल च्युङसोङ, तेहि पत्रुस राङ स्यान लोब्टुतेबाला हतिबे नाइसोङ, “ए भाइबा, ङे च्हि किच्याइ?”38पत्रुसयि हतिबाला नाइसोङ, “घ्योप्पा कि, राङ खि तिक्पा माप कियापयि चाला येशु ख्रिष्यि मिनला के पोरोयि बप्तिस्मा खेर, राङ खेला पवित्र आत्मायि बप्तिस्मा खुङान ना।39चिचालानाना ना क्याक्याला खि चाला, खि सन्तनयि चाला, घ्याबो घ्याबोला होएता पोरोयि चाला ना, पोरो सुला प्रभु हुइ कजसुबायि क्ये तोङिन।”40स्यान लेइराङ तामतेबे लाम्ला ख्युइ हतिबाला साछि पिन्सोङ, राङ जु नाइरे छोइ पिन्सोङ, “धि अल पालिने खे खिरि खेराङला क्योप।”41तेहि सुगेसुगे ख्युइ ताम ङ्यान्दे हतिबे बप्तिसमा खेरसोङ, राङ हति ङिन हा:लाम तोङ सुम जोम मितेबा ख्होए टाँगाला थपि च्युङसोङ।42हतिबा लोब्टुतेबे छोइ, सङ्गति राङ लोटा च्ययाप राङ मोनलामला भक्ति राङ ङ्याबो ढुन तोकिन।हिछेकिङानतेबे मिजे
43पोरोयि समला झिटा च्युङसोङ, राङ लोब्टुबे लाम्ला लेइराङ हा:लाइयापयि लाइ राङ होन तोरयापयि लाइ च्युङसोङ।44हिछे किङानबा पोरो ङ्याबो तोकिनलो, राङ हतिबे क्यु पोरो पिमा धु।45हतिबे रेँ सम्पति राङ क्युतेबा चोँरे सुगा सुगाला चिगाचिगा कोइबा हुन पोरोला हति घोकिन।46हतिबा सम च्हि च्युङदे मोनलाम क्यासि खिमला पोरो ङ्याबो हुन, राङ खिम खिमला लोटा च्यकिनलो, राङ हतिबा केनराङ सम चाङमा क्याइरे ढिक्ते सेनलो।47राङ कजसुबायि छे धेकिनलो, राङ मितेबा पोरने ल नायोङ नाइबा क्याइरे तोकिनलो। मुक्ति खुङानतेबाला प्रभुयि ङिन राङ हतिबे टाँगाला थपि क्याइसोङ।