1Me a xei leliy bemeeng ti lam veil mamileeng. E xe lukepeind ne xoumeeng me lukanzek kanzek ne lim yuw is qelum-king xoumeeng toundei lek e lukepeind, me lei wei xel mi lukyak lek Anutu eno toundei lek lu titi.2Leliy bemeeng wei a xei yo xok ambei busip lepet, ekom e vaxa ne nambei leliy bea ti de mya ne nambei leliy layon ti mya. Wex ngandoung on wong e xe nikanzek ngandoung wou leliy bemeeng on me wong e xe siaking me wong lei ngandoung wei ghanaw veil eno wou e.3Leliy bemeeng on lu ti xok ambei xel leis e mey ekom lu wei xel leis e mey on wo nimzalek. Xomaxoneing tembuing tambak etek me betiwou leliy bemeeng on.4Xomaxoneing wo lalo wou wex ngandoung on en e wong nikanzek ngandoung wou leliy bemeeng me xel wo lalo wou leliy bemeeng is ambei nyon me teling, “Eti nambei leliy bemeeng? Eti teyeimbei bo vevek is e?”5Leliy bemeeng mya yon mi wo qayeeng wei toxeing lei me lukyak lek Anutu, de qou nikanzek bei bong kwa nambei nyon teyei lek dentouk 42.6E tax mya bei baluk yak lek Anutu, me baluk nol lek Anutu lei me e beeng me xel wei mindei eivek tyoung gheyapu yo.7Leliy bemeeng qou nikanzek ngandoung bei bo vevek wou xel vambuing me bong vevek ghanaw xel. Me e qou nikanzek ngandoung bei gyeiteyei veleivlei titi me xomaxoneing ninavi titi me vya titi me tembuing tambak titi.8Xomaxoneing dalus wei tembuing ne tyek bong lalo wo leliy bemeeng, xel dalus wei Anutu se byex xel leind eivek qapiya mapieing wei Sipsip Lingheing wei xel leis e mey eno xe, gyeik ingwei Anutu seng ghei toung tembuing tambakateiv o.9E wei nenyalis toundei lek e yo wong e liy nenya wou qayeeng.10Wangwei xelti Anutu beyal bei ena xeitueingyon tyek ena xeitueing.Wangwei xelti e beyal bei xel nyeis e mey en ngeyeing vevekyon tyek xel nyeis e mey en ngeyeing vevek.Nyei qes ambei nye, xel vambuing na mi bale nikanzek eivek nimaying me wongeingis.
Leliy bemeeng lam myayaing veil tembuing
11Woyom a xei leliy bemeeng nge lam myayaing veil tembuing. E xe lukepeind on yayuw nambei sipsip lingheing ti, ekom luk ambei wex ngandoung ti.12E wo xuk en nikanzek dalus wei leliy bemeeng tiwei tax o lek e lei, me wong xomaxoneing wei tembuing eno wo lalo wou leliy bemeeng tiwei tax o, wei e xe qatyex wei xel leis e mey yo yeivzeyi.13Me wong xuk ngandoung me dee wei lulvako yo me wong nenyex lam lox tyoung gheyapu me lam tembuing eivek xomaxoneing mendghalus.14En inye dee wei lulvako nelu nelu om e qou nikanzek ngandoung wou leliy bemeeng bei bong lulvako lek leliy bemeeng tiwei tax o lei, me tyoxe xomaxoneing sapa lek tembuing. E neil qayeeng nikanzek wou xel bei xel balax tenu ti bei na mi sanghoxe leliy bemeeng lei wei xel leis e mey nangya ngeyeing vevek ekom toundei mapieing o.15E qou nikanzek ngandoung bei bong mya laweeng wou tenu wei leliy bemeeng tiwei tax o, en kandek e teyei bei baluk me bong xel dalus wei se lewexe lek bei bong lalo wou tenu eno nyeis xel a mey.16E tendu xel sapa is ambei nyon, xel wei lei maeing, me leitata, me lulul ana, me xel kanyo, pok maeing me xukxe bandaing bei xel a qou telumek lek memend payeiv o lek dambamya.17En kandek xelti se bou o bo vateivek lek lulul qe ka na qou telumek bole, inyei leliy bemeeng lei o namba wei e lei yo.18Eti lupeyei ngandoung, tyek e gyeiwou. Wangwei xelti lupeyei ngandoung, wong e pyaw memawou namba wei leliy bemeeng o, en inyei namba wei xomaxoneing ti yo. E xe namba nei 666.