Read Koreeg nà moog‑e 6

Koreeg nà moog‑e6

¹É gara jag duig ada əə̌níigǐ e talg addeeg‑ool‑e eg koo ɲalg ɲeeg.²Jaalgeen é Tela nà fuuig‑i e tùr ɲalga é jag duig asam ná wiəgíig‑i, e dòos e wàr nà ɲəwsíig‑i.³Aneenda Məi Tel e bee: “Kuuz əənə â far é jen dui iiŋ ləŋ pad wa é kora jen duin tirǐ‑i. Â bii jen dui ẽ adda taw e denoog duug inəgin ẽ koydo 120 wa.”

⁴É naag naadinə Nafilimgə anagǎn addeeg‑ool é gara jaalgeen é Tela nəgsíigǐ èg ɲalg é jag duigi e bel jaalge. Egan ɲelǎná kaadelge juund‑i.

⁵Məi Tela e tur asam ná əniid é jen duin əssǐ é mada addeeg‑ool‑e, o ná koreeg nà diilg‑i èg nà dë bonaag‑e əngíigi naag kay‑e.⁶Məi Tela e pəd diiŋ é kora təldǐ jen dui addeeg‑e, ë bon e ad e ən əndəg.

⁷Məi Tela e bee: “Â cində jen duin tui addeeg‑ool te ná a təlǐ èg lewdaga kay‑e, èg jeg nà bàlda tad addeeg‑ool‑e èg miig é aweelg‑e, de a pəssə dəəŋ é kora a taldeegě.”⁸Gəl Nowa e mane een ná gəmsí cuwəd gar é Məi Tel‑e.

⁹Cawr nii é Nowa. Nowan taǎn jerad jisə̌n kor man ná ən‑i wa, é jag nà é mun iinin‑i, e tall èg Tele jerad.¹⁰Nowan e doos e koo jaalgeen ozo, man e bel Saam, yaan e bel Aam, yaan e bel Yafas.

¹¹Addeega asséega paras é jisig ruig èg məəliig é Tel‑muu.¹²Tel tursu asam ná ruid pərsí addeeg‑ool‑e, é kora jogo kərdəŋ àda jisə̌níigǐ ruig dë kor‑e.¹³Tel e bee Nowan: “Aan â cində jaga addeeg‑oolo kay‑e, é kora addeega parsǐ é məəl iyəni. Â waja ã cindiigə èg addeeg‑e.¹⁴Jis poor man ö ŋalgan é guldu ná segar, û kuu wisəgə dë eelga û liwə̂nú iilg nà é ceeg‑e èg nà tuu‑i é laad ã padda fega ná ã wəidíigǐ é ceeg‑e.¹⁵Â rimdũn asam ná û jisə̂ní ni: Poor ë beɲja ná jaar‑e taa lud bəlgi ã adda 450 dumuun dë kabar jerad, ë bomard gara duurin luug bəlgi 75 dë beɲaag, gara jaar dumuun taw‑e lud bəlgin 45.¹⁶Û bijə folo dum é səgəf iiŋə dora fand man. Û bijə ë muun dë beɲj. Deelga e taa garga ozo fand tawma.

¹⁷Â waja ã cugũn maagg addeeg‑ool ẽ jəddə jega kay nà den wag‑e. Jeg kay addeeg‑oolo ê tir.¹⁸Â tif meed əənə èg doone. Oon û kuijúu poor‑eelg èg jaalgeeg unugu nà fuuig‑i èg od uuni èg ozoog é jaalgeeg uyugi.¹⁹Oon û wər jeg nà denoog‑e biig dhaag dhaag èg doone ã dedda wag èg doone nà ɲeeg èg nà fuuig.²⁰Miig ë muugu kay dhaag dhaag dë beegee‑ne èg lewdag kay dhaag dhaag dë beegee‑ne èg jeg nà balda tad addeeg‑oolen‑e â adân duuŋ ã dedda wag èg doone.²¹War namsaga ná nəməsí kərdəŋ èg doone ã adda ũnu ã adda ĩgən namees‑e. Û məlin tad ê ada ũgun nameese ũnu o ĩgən.”

²²Nowan e jis asam ná Tel kursĩní‑i kay.

Pioneer Bible Translators

https://app.library.bible/content/a230cccfbf4362be