Read Lukas 2

Lukas2

¹Po waktu ta néi, reni kolano ta pélóy isó po Roma, ngósno Agustusé. Nfasópén parenta po férimé bótén ta i nkawasa po dunia wlólo né, bo rlefo férimé kyaté-kyaté né ngósnori.²Nete tagare rfamdié po pemerentah Roma bo rlefo férimé kyat po waktu Kireniusé ndadi gubernur po bótén Siria né.³Se férimé kyaté né mare rfan po riri pnuw ta tatubé lima riri déluté né rtolno lo né bo rlefo ngósnori pocé.

⁴Fajé nóté re Yusufé, i ntolén po kota Nazaret, po bótén Galilea. Se i mare nfan po Daudé ni kota ta ngósno Betlehem, po bótén Yudea né, sababta i ma kolano Daudé ni ntu re gbu i nóté.⁵Yusufé i re mépin ta bo néfsóo i njé ngósno Maria. Si dórén luwé ma rfané bo rlefo ngósnori ntéli po kota Betlehemé. Po waktu ta néi, Maria re npe lapo.

⁶Po waktu ta si kota Betlehemé né, re nwómo ni ngénngan ta Maria bo nmawyóyé ro.⁷Se nmawyóyé né ni ntu njé món I, yomya ta ténlóy I. Pocé tabóngo néyémo keé I re ngalépé ga nfabóyé keé I po haiwané né róri mnóm góo lo, sababta férimé umé né re nbékbako re kyaté se reni géwgów pana.

⁸Po bótén ta nérakén kota Betlehemé né, reni kyaté-kyat ta réjaga riri domba né po waktu dorémé.⁹Pocé télél be rémnaw Jou ni nénan ta i yama soroga njé nfaftulo i néli po si ni, bóngo Jou Lahatala ni manano né tadélé nmanano sogado nfarfura keé si, se tadélé rémtaté.¹⁰Mayta Jou ni nénané njé nécegé si faje, “Ma fémtat na! Flongé fafié, sababta ya kwóm lima nte bo kfébingo mew Habar ta fié. Habar ta njéi nase npe férimé kyat ta rlongé né tadélé rcéngé.¹¹Habar ta nfié njé ta dolo faje: po ngénngan ta nte i, Kyat ta bo nfasalamaté kyaté njé re ntubé. I re ntub po Betlehemé, po kolano Daudé ni kota njé ni. I ta njé i, ta kyaté né rkakmo I Kristus, Kolano ta Jou Lahatala néjaji bo nfasalamaté mewé njé. I ta njé i, Jou óro.¹²Iga bo fémnaw I, ni faféyalé né ta dolo faje: Néli, mewé nase fémnaw Yomya isó réyémo I re ngalépé ga rfabóyé keé I po haiwané né róri mnóm góo lo.” Jou ni nénan yama soroga rfébingé Yesusé re ntubé

¹³Néceg fajé rewóré, télél be reni Jou ni nénan ta nésé nóté rwóm yama soroga wlólo tadélé rfélé. Si re nénan isó ta re nwómé ntubé njé rtail Jou Lahatala se réceg faje,¹⁴“Tail re tcuba Jou Lahatala ta I po Soroga!Re po dunia wlólo nte, I nase npo wlo ta nténgén po kyaté-kyat ta mgo wlo si né.”

¹⁵Rtail Jou Lahatala rewóré, tabóngo rpólén si nmulé po soroga. Se kyaté-kyat ta réjaga domba nesté rfalécego faje, “Lima tfan po Betlehemé bo témnaw sói ta Jou Lahatala re nécego it péséwé né.”

¹⁶Tabóngo rbablé se rfan po Betlehemé. Néli faje, rfapdipén re Maria i re Yusufé, bóngo rémnaw yomya galól ta rfébóyé keé I po haiwané né róri mnóm góo lo né.¹⁷Pocé rémnaw yomya njé, tabóngo férimé ta Jou ni nénané nesté re rfébingo si né, réféténé keé po férimé kyat ta pocé né.

¹⁸Se rherané, rlongé ta réféténé né.¹⁹Mayta Maria maduga nisén re nénuta be po wlo wlólo férimé ta re ndadi i né.²⁰Rewóré ta néi, kyaté-kyat ta réjaga domba nesté rpólén si nmulé po riri domba nesté ni. Ta si rarenfane né, rtail re rfapélóy Jou Lahatala, sababta farimé ta Jou ni nénané nesté rfabingo si né, fatuwé ndimé.

²¹Pocé ta Yomya njé re ntubé se ni ngané walé né, mare bo rcunat I, rdéréré agama Yahudi ni aturané. Pocé tabóngo rfangósno I Yesusé, nfamgo re ngósén ta Maria npe lapo pafule, se Jou ni nénané njé re nfébingo i né.

²²Fajé nóté ta Yesusé re ntubé se ni mnuo ngané yóféfóté né, Maria i re Yusufé mare rfan po kota Yerusalemé bo rfaberési riri diri, rdéréré aturan ta po Musa ni kitab abén limé lo né. Ta si rfané né, rut Yesusé bo rserakané keé I néli po Jou Lahatala ni.²³Sababta aturan ta rlefo po Musa ni kitab abén limé né tadolo faje,“Iga yomya món ta rténlóyé, mare rserakané keé si néli po Jou Lahatala ni bo rdadi I ni kyat si.”

²⁴Bóngo mare rpo mané tékukur fapasang ésó pari mané pombo ta myaku lesu né faséluwé bo rpeé riri sadaka, rdéréré aturan ta po Musa ni kitab abén limé lo né.

²⁵Waktu ta néi, po Yerusalemé né reni kyat isó ngósno Simeoné. I ta njé, ni hidupé né métegél po Jou Lahatala ni usno lo, re fatuw-fatuw ta ndéréré Jou. I néftón be waktu ta nase Jou Lahatala bo nfasalamat bangsa Israelé né, bóngo Jou ni Rohé njé ma tadélé nkawasa keé ni wlo njé.²⁶Se nfébingé ta i nase nmót pa, iga némnaw Mesias Kolano ta Jou Lahatala néjaji bo nfasalamaté kyaté njé pafule né.

²⁷Pocé, Jou ni Rohé njé nkawasa keé Simeoné ni wlo njé, se ncung némin po Um Sambayang ta npélóyé njé ni wlólo né. Néli faje, Yusufé i re Maria ma rcung néminé bo rserakan Yesus po Jou Lahatala ni, rdéréré aturan ta po Musa ni kitab abén limé lo.²⁸Pocé Simeoné némnaw Yomya njé, tabóngo nfan néli ga nyó keé I se nyépén I, bóngo ntail Jou Lahatala né néceg faje,²⁹“O Jou, tatubé lima né Awé re méjaji ya,se nte Anim jaji né re ndadi i po ya ni,ya ta kakénpe be sói néli ta Awé mané ya né.Se nte masike kmót ya óro, re wleg ta nténgéné.³⁰Sababta, re kémnaw I, kyat ta mané I nfasalamaté kyaté njé.³¹Awé mpo Kyat ta njé, bo férimé suku ma bisa rduk salamaté.³²Se I ni manano né, nase nfaftulo yéféné bo kyaté-kyaté né rdéréré Awé.I nfamanano kyat ta bangsa Yahudi si pa né, wlori bo si ma bisa rdéréré Jou Lahatala,sogado kyaté-kyaté né nase rtail re rfapélóy Jou Lahatala ni kyaté-kyat Israelé né.”

³³Yusufé i re Maria rlongé ta Simeoné néceg fajé né, tadélé rherané.³⁴Tabóngo Simeoné néror po Jou Lahatala ni bo npo ni féyfié né po Yusufé i re Maria re po Yomya njé ni. Pocé tabóngo Simeoné nécegé Yomya njé ni neke Maria faje, “Maria, mfatélolmo aw fafié. Yomya ta njé i kyat Israel félé ta nase rdélé I pa, se Jou Lahatala nase nhukumé keé si. Mayta nase reni kyat Israel félé ta rdélé I, se rduk salamaté. Iga kyaté né bo rdélé I pari tisé né nase féyal be po Yomya njéi ni. Mayta kyat félé nase rtarima I pa.³⁵Re ta dolo fajé né, ité nase bo tuné kyaté-kyaté né wlori. Se Maria, awé wlemé njé nase tadélé nkangelangé, sababta Yomya ta njé i. Nase tadolo ratusó nam yété po wlemé njé ni wlólo.”

³⁶Pocé po Um Sambayang ta npélóyé njé ni ma reni mépin isó tadélé re npagelé, ngósno Hana. I ta njéi nabi ta nanénfawómo Jou Lahatala ni faftóté po kyaté-kyaté njé. I ni moke njé ngósno Fanuelé, i lima suku Asyer. Hana njé, re néfsów nuéncó se i re ni légaé rfaltolné si né ni mnuo taun nuén fité,³⁷mayta ni légaé njé re nmóté, se re nbalo. Ni umuré né, taun yóféwal re pafóté. Ntolén i po Um Sambayang ta npélóyé njé ni, se dorém re ngénngané né ncuba re ntail be Jou Lahatala, bóngo npuasa.³⁸Po waktu ta Simeoné nméiténé ndé Yusufé i re Maria lesu né, Hana nwóm pocé se ntail Jou Lahatala bóngo nfébingé Yomya njé po férimé kyaté-kyat ta si pocé né. Kyat ta néi ta raréftón Kolano ta Jou Lahatala néjaji nwómé bo nfabebasé keé kyaté-kyat Israelé né.

³⁹Pocé tabóngo Yusufé i re Maria re rfakéwelo Jou Lahatala ni aturan ta mare si bo rpe po Musa ni kitab abén lima né rewóré ndimé, tabóngo férimé rpólén si nmulé po riri um ta po pnuw Nazaret, po bótén Galilea né.⁴⁰Tabóngo Yesusé nbóng ta npélóyé re nkuaté, re nbóng ta nuné lebe félé nóté, bóngo Jou ni féyfié né ma re pélóy po I ni.

⁴¹Étné be taun né, Yesusé ni déluté nesté rfan po Yerusalemé bo rdéréré agama Yahudi né riri ngénngan Paska. Po ngénngan ta néi, si rfatélolmo ta Jou Lahatala re n'gali se nfabebasé keé riri délut tatubé lima ta kyat Mesiré né rpe keé riri béyak si né.⁴²Ta Yesusé re ni umur taun yófésó re paluwé né, ni déluté nesté ruté keé I se rfan po Yerusalemé, rdéréré riri ngénngan ta pélóyé, ta dolo ngané fis lima se riri ta kyat Yahudi raréndéréré né.⁴³Pocé rdéréré ngénngan ta pélóyé né rewóré ndimé, tabóngo réléy si po Galilea. Runé pa ta Yesusé ntolén I po Yerusalemé lesu né.⁴⁴Sababta si racogoma re nfané nfadéréré re kyaté-kyat ta félé né. Se re rfan nganésó wlólo, ga taga rfaléyówé I po fténori, rémóri re kyaté-kyat ta rféyal si ta rfané rfadéréré né.⁴⁵Mayta rduk I pa. Se rpolén si nmulé po Yerusalemé bo réyówé I ntéli.⁴⁶Si réyówé I sogado ngané telé wlólo, ga taga rduk I po Um Sambayang ta npélóyé njé ni lapo lo né. Ntolén I po guru-guru agama Yahudi né riri fapéluné, se nlongé ta rméiténé né bóngo I ma nanénutné si nóté.⁴⁷Se férimé kyat ta rlongé I ni méiténé né rherané se rcéngé, sababta tadélé re nuné keé ndimé, re sói ta rutné I né, ncóngélé né ma mgo ndimé.⁴⁸Yesusé ni déluté nesté rémnaw I né, rherané. Bóngo ni neke njé nécegé I fajé, “Yesusé, ya re nim moke tadélé re kémtaté, se kéyówé Aw néli re lima. Pe sói se mpe am fanfajé né?”

⁴⁹Tabóngo I nécegé si faje, “Moke, aw re neke, ma féyówé Ya na. Sababta mewé nase re funé, Ya nte mare Ya i po nik moke njé ni umé lo.”⁵⁰Mayta ni déluté nesté rcae pa, ni ngale sói ta I nécegé né.

⁵¹Rewóré ta néi, Yesusé I re ni déluté nesté réléy si po Nazareté, bóngo tadélé nlongé ni déluté nesté fié. Mayta ni neke njé nanénuta be ta Yesus nécegé né ni ngale sói.⁵²Yesusé nbóng ta npélóyé, se re nuné ta lebe félé nóté. Bóngo Jou Lahatala ni mésié né ma nbóng ta pélóy po I ni, re kyaté-kyaté né ma rbóng tadélé wlori ncuka I. Yesusé I re guru agama né, si po Um Sambayang ta npélóyé njé ni

The Seed Company

https://app.library.bible/content/5130dfe848263b6b