SINU112
Otii Biene Suoto Lɛyɔɔ
1Bitansa Saate nwu.Suoto siyɔɔ otii wɔ ninyɛkɛ ni Saate nwu,aanya ni suoto lɛyɔɔ di afiofa nɔɔ suoto.2Babi nɔɔ kamale batii kplɛ di kasɔ nwu suoto;suoto kamayɔɔ mba situ niɛkpa ni banantii.3Lɛsaawɛ ku lɛlɛ nkpe di leyo nɔɔ,ɔsaabla tinini nɔɔ kafɔɔ mate dinaa ni kaloo.4Bia di ditunu kamɛ lɛkpa nwɛ ninta mba situ niɛkpa ni,ninta bienetɛ ku nyaaminyatɛ ku tininitɛ.5Dibiene mawa ninta nnwɔ ninkpe ni sifutulɛ anfɛnsa asaa anta ni batii ku otu biene,nnwɔ nimbla ni asaa nɔɔ di osuku kanya.6Nwaako ɔlɔbatũkũ diidii;babanyuma tininitɛ dinaa ni kaloo.7Ɔlɔbayɛkɛ ɔlaa kpile kuonwii;otu nɔɔ nte, antika Saate nwu disi.8Otu nɔɔ nnaa ole kuonwii, ɔlɔbayɛkɛ;di kayɛntɛkɔ abanya bakyiditɛ nɔɔ kanɔɔkɔ.9Atɔɔsɛ akyɛsaa nɔɔ ɛɛta bapiitɛ eekyiko,ɔsaabla tinini nɔɔ nkpe dinaa ni kaloo;babatakatɛ lɛkya nɔɔ katoo di dibu kamɛ.10Otii kpile nwu kamanya ɔblɔ nfiɛ nwɔ,abawee anyɛɛ nɔɔ an-yɛ kafɔɔ;kpiletɛ nwu abiesaa mabla kasakasa.The Seed Company