YOSUA6
Yeriko Kalookɔ
1Obe nwu baasɛɛ Yeriko n-yoko kpinkpĩ ta Israel batii oso. Kuonwii ditadie aafe kayi, kuonwii kafɔɔ ditabuo kaamɛ.2Ninfɛ di SAATE nwu latɔkɔ Yosua alɛ, “Nyu, ntɔɔyɔ Yeriko, baka nɔɔ ku basuɔtɔ bakpɛtɛ nɔɔ lekpee di nnɛɛ lɛfɔ.3Bikyɛ bikyi okpoo nwu ninwii ku basuɔtɔ bakpɛtɛ bamuu. Bibla nkpo ayi akuɔ.4Ta olebatatɛ bakuɛnsĩ baklee akunumuu akya akyukyoo, di kanya ninii lɛlakaa nwu sitũ. Di dii kuɛnsinle suoto, bikyi okpoo nwu sikuɛnsĩ, di olebatatɛ nwu batɔɔfɛ akyukyoo nwu.5Nse bienu ma bɛɛfɛ dikyukyoo diɛklɛ yi, faata batii nwu bamuu bafaa osie kanya; nse okpoo nwu oyoyiɛ ntoobiɛ, di Israel batii bakata babuo, osuɔtɔ biala abuo nwu kamɛ.”6Nioso Nun obisuɔtɔbi Yosua lalɛɛ olebatatɛ nwu aatɔkɔ ma alɛ, “Bikɛnkɛ SAATE nwu kanya ninii lɛlakaa nwu di olebatatɛ bakuɛnsĩ baklee akyukyoo nwu di lɛlakaa nwu sitũ.”7Ni aatɔkɔ batii nwu alɛ, “Bikyɛ sitũ! Bikyɛ bikyi okpoo nwu, di akpɛsaa bakleetɛ bale SAATE nwu lɛlakaa katũ.”8Obe wɔ di Yosua lakakatɛ aata ni batii nwu aloo nii, olebatatɛ bakuɛnsĩ ba niaklee ni akyukyoo akuɛnsĩ di SAATE nwu anu lafe sitũ, baatɔɔfɛ akyukyoo lɛma, ni di SAATE nwu kanya ninii lɛlakaa latikanko ma nɛ.9Akpɛsaa bakleetɛ lale olebatatɛ ba niatɔɔfɛ ni akyukyoo katũ, ni di sɛmaa, banyuntɛ latikanko lɛlakaa nwu nɛ. Obe nwu nkpo omuu kamɛ akyukyoo nwu kanya latoodie.10Kafɔɔ Yosua latɔkɔ batii nwu alɛ, “Bitanwi kakpɛ kaku, bitantakatɛsa sɛlɔ lee katoo, bitambuɛ ɔlaa kuonwii dilaase di dii le lɛtɔkɔ ye nlɛ bifaa nii. Ni biɛfaa!”11Nioso Yosua lata baatuka SAATE nwu lɛlakaa baakyiko okpoo nwu, baakyi nwu ninwii. Ninfɛ di Israel batii nwu lakple baasifi kasiɛkɔ lɛma baalaate ninfa ku kakyɛ nwu nɛ.12Ni di Yosua lataka kaleesɛ kuyitatũ ninfɛ di olebatatɛ nwu layɔ SAATE nwu lɛlakaa nɛ.13Olebatatɛ bakuɛnsĩ ba niaklee ni akyukyoo akuɛnsĩ nwu lafe sitũ, baakyɛ di SAATE nwu lɛlakaa anu baatɔɔfɛ akyukyoo. Akpɛsaa bakleetɛ lale ma katũ, ni di sɛmaa, banyuntɛ latikanko SAATE nwu lɛlakaa, obe wɔ di akyukyoo nwu kanya latoodie nii.14Nioso dii nyɔɔfa baakyɛ baakyi okpoo nwu ninwii ni baakple baasifi kasiɛkɔ lɛma nɛ. Baabla nle mmle ayi akuɔ.15Di dii kuɛsinle, baataka ku kolesɛtũ baakyɛ baakyi okpoo nwu sikuɛnsĩ di osuku nwu okle kanya, kafɔɔ di dii nwu lete baakyi okpoo nwu sikuɛnsĩ.16Di dikyi kuɛnsinle nwu, obe wɔ di olebatatɛ lafɛ ni dikyukyoo nwu, ni di Yosua latɔkɔ batii nwu alɛ, “Biyiisaa kudu! Diekye SAATE nwu ntɔɔyɔ okpoo nwu ɛɛta ye!17Biyɔ okpoo nwu ku asaa ya amuu ninsi nwu ni kaamɛ bibla n-ya bɛɛta ni SAATE nwu. Diediki Rahab, sɔnɔkpeetɛ nwu ku batii ba bamuu ninkpe ni di leyo nɔɔ ku nnwɔɔ lete babafũ nkpa, diekye aawofasa batii ba buakpee baabala kasɔ nwu.18Kafɔɔ biblasa suoto di asaa ya bɛɛyɔ bɛɛta ni SAATE nwu suoto, di mmle minamayɔ kawɔɔ biwako ni suoto lee di lɛsaa nwu lewo ɔyɔ suoto. Nse diele nkpo bibata kawɔɔ nwa di Israel kasiɛkɔ nwu, ninwako ɔlaa ninnwu suoto.19Koto fututu ku koto sɛɛle kumuu ku kɔbri asaa ku abɔɔsaa nle asaa klekle ɛɛta SAATE nwu, nioso dikpeni eesifi lɛsaawɛ nɔɔ katɛkɔ.”20Obe wɔ di akyukyoo kanya ladie ni, batii nwu layiisa kudu, di dikyukyoo kanya didiki ku batii nwu kudu diyiisa osie kanya yi, oyoyiɛ nwu labiɛ; nioso osuɔtɔ biala labuo nwu kamɛ, ni baafũ okpoo nwu nɛ.21Ni baayɔ okpoo nwu baakpee di SAATE nwu nnɛɛ nɛ. Ni baawɔɔsa lɛsaa biala ninkpe ni nkpa ku kapamii di kamɛ ninwu nɛ- basuɔtɔ ku basanko, babisɔ ku banɔɔfo, banankyue ku bafoso ku babɔkɛɛ ba nintuka ni atoo.22Ni di Yosua latɔkɔ basuɔtɔ banyɔ ba niakyɛ baalaala ni kasɔ nwu alɛ, “Bitɔɔkyɛ sɔnɔkpeetɛ nwu leyo biɛlaadiki nnwɔɔ ku mba bamuu ninle nwɔ ni bale, di ntam lee ku nnwɔɔ kanya.”23Nioso bakosopo ba nialaala ni kasɔ nwɔ lakyɛ baalaadiki Rahab ku ote ku ɔya ku babilɛma-suɔtɔbi ku mba bamuu niale nwɔ ni bale. Baalaadiki leyo nɔɔ batii bamuu, ni baayɔ ma baalaatɛ di Israel batii kasiɛkɔ sɛmaa nɛ.24Ninfɛ baafiɛ okpoo kplɛ nwu omuu ku lɛsaa biala ninnwu kamɛ nɛ, kafɔɔ baayɔ koto fututu, koto sɛɛle, kɔbri asaa ku abɔɔsaa baatɛ di SAATE nwu lɛsaawɛ katɛkɔ leyo.25Kafɔɔ Yosua lafũ Rahab, sɔnɔkpeetɛ nwu ku leyo nɔɔ batii ku mba bamuu niale nwɔ bale nkpa, diekye aawofasa basuɔtɔ ba di Yosua lakpee baalaala ni Yeriko- nioso asi di Israel batii kamɛ diɛbadu obe wɔ baakpana ni sɛlaa se mmle.26Di obe nwu kamɛ, Yosua laka ntam siene be mmle alɛ: “Otii wɔ nimakple antaka alɛ oose ni Yeriko okpoo wɔ mmle dibudi, bɛɛkpaani nwɔ di SAATE nwu anu:“Olele nimase nwu lɛsɔsedibite nɔɔ kamakpi;abaloo ni n-yoko ninwu ose yi,obi bisɔnle nɔɔ kamakpi.”27Nioso SAATE nwu lasiɛko Yosua, ni di leyooto nɔɔ lakyaka kasɔ nwu kamuu nɛ.The Seed Company