YOB23
Yob Lakple Aadiki Kanya
1Ninfɛ di Yob ladiki kanya alɛ:2“Bia mmiɛ kɔkà ɔlaa nii ntika osie kanya;nu kotunni, kɔnɛɛ nɔɔ nkpe onutũ di suoto nii.3Nse fɛle n-ye lɛba le kamanyɔɔ nii;nse fɛle kafuo kasiɛkɔ nɔɔ ɔkyɛ!4Ntabayɔ ɔlaa nii ntɛ di anu nɔɔ,nin-yiisa kanya nii kafɔɔ ku sɛlaa ɔnanfi.5Ninnyu mmle abadiki ni ɔlaa nii kanya,nintofo obe ababuɛ.6Abakpɛkoe ku osie kplɛ?Oowo, ɔlɔbayɔ ɔlaa di suoto nii.7Nfa di otii tinini kayɔ ɔlaa nɔɔ antɛ nwɔ di anu nɛ,ni abadiki mi di kantɛ nii nnɛɛ dinaa ni kaloo.8“Kafɔɔ nse lɛkyɛ kufĩ katunkɔ, anaa ninfa;nse lɛkyɛ kufĩ kamɛɛkɔ, ninnu nwɔ lɛkpanko.9Nse akpe di ɔkpɛ kamɛ di katoo-kasɔ, nin-nyɔɔ;nse eemunikĩi eefe kala-kasɔ, nimmpɛ nwɔ anu.10Kafɔɔ aye osuku wɔ ninfe nii;nse ɛɛsɔ mi eenyu, abanya alɛ lɛbla klekle fɛ koto sɛɛle.11Nkpaa nii latikanko nnafukpaa nɔɔ nwaa;lakyɛ di osuku nɔɔ alɛ ntamunikĩi lafe ɔlɔɔkɔ.12Nindiɛ anyasibi nɔɔ afiofa;kanya nɔɔ sɛlaa lɛfũ mi kɔya silenke dii biala nii alesaa.13“Kafɔɔ an-yila lete nɔɔ, owe nimafuo nwɔ osuku otĩi?Ambla lɛsaa lele niesiɛko nwɔ.14Amblako lɛsaa nɔɔ le ɛɛtɛ ni ɔbla di suoto nii anloo,n-ya mmle kpinwu eekple akpe disibu ɛɛta nɛ.15Nkpo oso di difu lɛpɛ mi di anu nɔɔ nɛ;nse lebu n-ya mmle amuu disi yi, nyɛkɛ nwɔ.16Yaa lɛta otu nii lɛkpa;Nnwɔ Ninlenke ni lɛkpee mi difu.17Kafɔɔ nimaasa kanya ta ditunu oso,ditunu tunutunu nwu nietĩi ni anu nii.The Seed Company