Yeremia5
Yerusalem Sikpile
1“Biyie, biesoo di Yerusalem akpaka bife,binyu bifenko biɛnya asaa,biewolaa di sebombo nɔɔ bifenko.Nse bibanya bia otii onwiininte ni tinini, antikanko ni onukwale,ni kamayɔ sikpile nkyɛ okpoo kplɛ wɔ mmle.2Kuntɛ mambuɛ alɛ, ‘Nwaako di SAATE nwu nkpe ni nkpa’ yi,sɛlaa ku afunu ntam lete bɔɔka.”3Oo SAATE, diele onukwale di anu lɛfɔ komiɛ?Fɛɛpɛ ma, kafɔɔ baanu dibuo;fɛɛwɔɔsa ma, kafɔɔ beesĩ lelolaa nwu.Bɛɛta anu lɛma nkpe osie alenke difuɔ,beesĩ kafɔɔ okyi di situ lɛma kamɛ.4Lanyu nlɛ, “Mba mmle bapiitɛ lete bale;banaa disi,diekye baaye SAATE nwu osuku,Yaa lɛma afiofa nwu.5Nioso kamakyɛ batunletɛ nwu nfũninaakakatɛ nta ma;nwaako mma baye SAATE nwu osuku,Yaa lɛma nwu afiofa.”Kafɔɔ bɛɛbla kanya kanwii, mma kafɔɔ beetekete atoo nwu bɛɛtɛni bɛɛblasa suoto nɛ.6Nkpo oso kyata di lepoo kamɛ kamadieko ma,ɔkplɛle niekye ni ɔfaafuu kamawɔɔsa ma,nɛɛfɔtɛ kamate ansoko ma di sekpoo-lɔɔkɔ lɛmaalɛ ababɛbɛɛ otii lele niɛnwaanii eedie kayi kɔkyɛɛkɔkyɛɛ,diekye otokopĩ lɛma nkpe osie,kamaa-okple lɛma kafɔɔ mpɔ.7“Obe oso kayɔ nkyɛ ye?Babi lee ntoosĩ mibɛɛka ntam kafɔɔ di bayaa ba ninanle ni bayaa nfũ.Lɛta ma asaa finle lɛma amuu,kafɔɔ beekpee asɔnɔmandie diikudi mankyɛ basɔnɔkpeetɛ ayo.8Bate fɛle bapɔnkɔsuɔtɔ ba di basanko nkle ni ɔkɔnsɔ,di suoto kɔfiɛtũ ni obiala di owo nɔɔ ɔsɔfɔ suoto.9Ntaananfi ma kootoko ta nle mmle oso?”SAATE nwu niebuɛ.“Ntaambla lakyisadi kale ka ninte fɛ nka mmle suoto?10“Bifenfe di awosobi afe nɔɔ kamɛ biɛwɔɔsa ma,kafɔɔ bitanwɔɔsa ma fɛɛ.Bibɛbɛlɛ sɛla nɔɔ,diekye batii ba mmle diele SAATE nwu bale.11Israel leyo ku Yuda leyoditale onukwale omuu baatɛɛ,”SAATE nwu niebuɛ.SAATE Nwu Lasĩ Israel
12Bɛɛlaa sɛlaa ku afunu di SAATE nwu suoto;beebuɛ alɛ, “Ɔlɔbabla lɛsalɛsaa!Okpile kuonwii dilɔbawa wo di suoto;bulɔbanya kakpɛ ee kɔkà dilɔbakpɛ diidii.13Kɔfɛɛfɔ di ɔlaababuɛtɛtɛ nle,ɔlaa nwu kafɔɔ diesi ma kaamɛ;nioso bita bayɔ nle boobuɛ ni babla ma.”14Nkpo oso nnya ɔlaa wɔ di SAATE Yaa wɔ Ninlenke ni kobuɛ ni alɛ:“Ta batii nwu lɛkakatɛ ni sɛlaa se mmle oso yi,kamata sɛlaa nii di kanya lɛfɔ mbla ɔtɔ,batii ba mmle kafɔɔ kamale ntɔɔni kubafiɛ nii.15Ao Israel leyo,” SAATE nwu niebuɛ,“Kɔwako kale kanwii di kakyonkɔ di suoto lɛfɔ-saa kale ku kale ka ninkpe ni osie,batii ba sele minan-ye nii,batii ba lɛkakatɛ minoonu ni kasɔ.16Akpakyaa lɛma nte fɛle ɔkya wɔ nietikiti kute nii;bamuu lɛma nle bakpɛtɛ siene.17Babale kofe asaa ya biɛwɛ ni ku alesaa lee,mambɛbɛɛ babisuɔtɔbi ku babisankobi lee;babawee bafoso ku banankyue lee,manwɔɔsa owosobi afe ku abue awoso lee.Ku kapamii babawɔɔsasekpoo kplɛ siene se bietika ni disi.18SAATE nwu niebuɛ alɛ, “Kafɔɔ bia di ayi nwu nkpo kamɛ yi, namawɔɔsa ye fɛɛ.19Ni nse batii nwu lɛkaalɛ alɛ, ‘Obe oso di SAATE Yaa loo nwu lɛbla wo asaa ya mmle nwu amuu?’ yi, biɛtɔkɔ ma bilɛ, ‘Fɛ mmle biesĩ mi nii, biɛkyɛ biosumu ni bafɔɔ bayaa di kasɔ lee kamu suoto yi, nioso di kanunua bibasumu bafɔɔ di kasɔ ka ninanle ye ni kale kamu suoto nɛ.’20“Yie lɛkya di ɔlaa wɔ mmle fata Yakob leyo,faabuɛ nwu kafɔɔ di Yuda falɛ;21Binu ɔlaa wɔ mmle, aye ba ninaa ni disi ku batii ba ninan-ye ni lɛsaa,bikpe ni anu kafɔɔ bilɔɔnya ni,bikpe ni atoko kafɔɔ biloonu ni:22Bilɔbayɛkɛ mi?” SAATE nwu niebuɛ alɛ.“Bilɔbatũtũkũ di anu nii?Lɛyɔ ɔtɛnsĩa lɛbla kɔmɛ lɛta lekpo,kule ni kɔmɛ ko ninaa ni kaloo di lekpo dilɔbafuo ni ɔwaalɛ.Dibafuo ɔpɛ omunu, kafɔɔ dilɔbafuo kɔmɛ nwu ɔtaalɛ;dibafuo kudu oyiisa, kafɔɔ dilaafuo ɔtɛnsĩa nwu ɔwaalɛ ofe.23Kafɔɔ batii ba mmle nkpe otokopĩ ku onunsie situ;batoomunikĩi bɛɛkyɛ beesifi.24Blɔɔtɔkɔ suoto lɛma alɛ,‘Bita buyɛkɛ SAATE Yaa loo nwu,nnwɔ ninta ni kabiene ku kɔkyɛɛ kanto di obe kanya,anta wo ni alesaa obe lele di ayi akuɛnsĩ biala kamɛ.’25Ɔtanlolaa ɔbla lee nintɔɔta nle mmle lɛkyɛ diokyo nɛ;sikpile lee nintɔɔta dibiene leyu ye nɛ.26“Amumu batii nsi di batii nii kamɛ,bate kala fɛle mmle di batii nkyɔɔ ni bakansiɛ dikyĩbate ni kafɔɔ fɛle mba ninkyɔɔ ni batii sikũ mammfũ ma nii.27Fɛle lɛkansiɛyo le di bakansiɛ leyii ni pɔ,ayo lɛma leyii ku kakyɔnkyɔ asaa;batɔbakple asaa-bawɛntɛ ku basientɛ28ni batɔɔwɛ lɛla beemuɔ nɛ.Akpilesaa lɛma ablasaa nnaa kase;mammbuɛ ɔlaa onukwale kanya baata bakuɛbi lale lɛbɛ,mannkpɛ kakpɛ baata bapiitɛ.29Ntaananfi ma kootoko ta nle mmle oso?”SAATE nwu niebuɛ.“Ntaambla lakyisadi kale ka ninte ni fɛ nka mmle suoto?30“Lɛyɛkɛsaa ku ɔfɔɔasifisaantɔɔwa di kasɔ nwu suoto:31Ɔlaabubuɛtɛtɛ kobuɛ sɛlaa ku afunu mantɛ,olebatatɛ kole sɛka di mma bamu osie kanya,batii nii kafɔɔ mbɔmbɔ ni, di osuku wɔ mmle suoto.Kafɔɔ obe bibabla di kayɛntɛkɔ?The Seed Company