Yeremia42
Batii Nwu LatɔkɔYeremia Alɛ Apɛ Ɔlaa Ata Ma
1Ninfɛ di bakpɛtɛ banɔɔfotii nwu bamuu, diɛkyakaa ni di Karea obisuɔtɔbi Yohanan ku Hosaia obisuɔtɔbi Yesania, ku batii ba bamuu diayɔ ni di obisɔ dialaadu ni ɔnɔɔfo lakyɛ2ɔlaabuɛtɛtɛ Yeremia nfũ baalaatɔkɔ nwɔ alɛ, “Lekoto nu lekoto loo otikiti, faapɛ ɔlaa fata SAATE Yaa lɛfɔ nwu, fata batii ba mmle bamuu niebu basi ni nkpa. Fɛ mmle fɔɔnya ni kanunua, nu di obe nwu buapɔ yi, nunua basɛɛ loo lete niebu.3Pɛ ɔlaa falɛ SAATE Yaa lɛfɔ nwu katɔkɔ wo lɛba le buafe ni ku lɛsaa le buabla nii.”4Ni di ɔlaabuɛtɛtɛ Yeremia ladiki kanya alɛ, “Ntoonu ɔlaa lee. Nwaako kamapɛ ɔlaa nta SAATE Yaa lee nwu fɛ mmle biɛkaalɛ nii; kamatɔkɔ ye ɔlaa biala di SAATE nwu kamabuɛ nii, namayɔ kafɔɔ lɛsalɛsaa n-wofasa ye.5Ni baatɔkɔ Yeremia alɛ, “SAATE nwu ale onukwale kamaayilatɛ di suoto loo, nse buɔɔbla di ɔlaa biala wɔ di SAATE Yaa lɛfɔ nwu lekpee fɔ alɛ tɔkɔ wo ni kanya.6Obiene oo, okpile oo, bubakyɔɔ SAATE Yaa loo nwu atoko, nnwɔ nfũ buokpee fɔ ni, alɛ dialɛ ɔkyɛ ninta wo. Diekye bubakyɔɔ SAATE Yaa loo nwu kotoko.”SAATE Nwu Ladiki Kanya Aata Yeremia Ɔlaa Ɔpɛ
7Di ayi lefosi sɛmaa, SAATE nwu ɔlaa lawa kuata Yeremia.8Nioso aalɛɛ Karea obisuɔtɔbi Yohanan ku bakpɛtɛ banɔɔfotii ba bamuu niawɛ ni ku nnwɔɔ, ku batii nwu bamuu diayɔ ni di obisɔ dialaadu ni di ɔnɔɔfo aasiisa.9Ni aatɔkɔ ma alɛ, “Nnya ɔlaa wɔ di SAATE, Israel Yaa nwu, nnwɔ nfũ biakpee mi layɔ sɛlaa lee lakyɛnko ni, kobuɛ ni alɛ:10‘Nse biesiɛ di kasɔ ka mmle suoto yi, kamata ye minkpɛ, namabiɛ ye ntɛ kaasɔ; kamase ye sidu, namasifi ye, diekye sɛlaa kpile otũ se lɛyɔ lɛwako ni di suoto lee lɛtɛɛ lebuo sɛnyaami.11Bitanyɛkɛ Babel ɔka nwu, nnwɔ biɔyɛkɛ ni nunua. Bitanyɛkɛ nwɔ, SAATE nwu niebuɛ, diekye nsiko ye kamafũ ye, nindiki ye kafɔɔ di nnɛɛ nɔɔ.12Kamanya ye nyaami alɛ nnwɔɔ kafɔɔ aanya ye nyaami anta ye minsiɛ di kasɔ lee suoto.’13“Kafɔɔ, nse biebuɛ bilɛ, ‘Bulɔbasiɛ di kasɔ ka mmle,’ biesĩ kafɔɔ SAATE Yaa lee nwu kotoko ɔkyɔɔ,14ni nse biebuɛ kafɔɔ bilɛ, ‘Oowo, bubakyɛ munaasiɛ di Egipte, lɛba le munamanya ni kakpɛ ee bunu ni dikyukyoo ee alesaa kɔka dilaaklee wo ni,’ yi15ni Oo Yuda batii ba niebu ni, binu SAATE nwu ɔlaa. Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Nse biomiɛ bilɛ biosifi Egipte, biɛkyɛ bilasiɛ ninfa yi,16ni kapamii ka biɔyɛkɛ ni kamatũ ye ninfa, kɔka-ɔkpɛ wɔ kafɔɔ nikokpee ye ni difu kamatikanko ye kunwa di Egipte kasɔ suoto, nfa kafɔɔ bibakpi nɛ.17Nwaako, batii ba bamuu nikomiɛ alɛ boosifi Egipte maanasiɛ ni ninfa kamakpi di kapamii, kɔka-ɔkpɛ ku ofiɛ kpile kanya; kuonwii lɛma dilɔbawɛ nkpa ee atoso ɔlaa kpile otũ wɔ kamayɔ n-wako ma ni di suoto.’18Nnya ɔlaa wɔ di SAATE nwu, Israel Yaa wɔ Ninlenke ni kobuɛ ni alɛ: ‘Fɛ mmle lanyɛɛnɛ ɔblɔ ku lɛblɔfiɛ yakayaka nii lakpete ni batii ba niasiɛ ni di Yerusalem yi, nkpo kamanyɛɛnɛ lɛblɔfiɛ yakayaka nii nkpete ye di suoto nse biesifi Egipte nɛ. Bibale lɛkpaanisaa ku lɛyɛkɛsaa, kawɔɔ ku ditufasaa; bilɔbasinya lɛba le mmle diidii.’19“Oo Yuda batii ba niebu bisi ni, SAATE nwu ntɔɔtɔkɔ ye alɛ, ‘Bitansifi Egipte.’ Bitofo nle mmle bilɛ: Lesĩ ɔlaa lɛta ye miɛ20nlɛ biabla ɔtanlolaa ɔbla dibinte di obe wɔ biakpee mi ni SAATE Yaa lee nwu nfũ biabuɛ ni bilɛ, ‘Pɛ ɔlaa fata SAATE Yaa loo nwu fata wo; tɔkɔ wo ɔlaa biala eebuɛ ni, bubabla ninwu suoto.’21Ntɔɔtɔkɔ ye miɛ, kafɔɔ biɛɛkyɔɔ SAATE Yaa lee nwu kotoko di sɛlaa se simuu aakpee mi alɛ ntɔkɔ ye nii.22Nioso kanunua yi, bitofo nle mmle bilɛ: Bibakpi di kapamii, kɔka-ɔkpɛ ku ofiɛ kpile kanya di lɛba le biomiɛ bilɛ biɔkyɛ minaasiɛ nii.”The Seed Company