Yeremia36
Baruk Laka Kukũ Nwu Di Olekatakɔ Kamɛ
1Di Yuda ɔka Yehoiakim wɔ niale ni Yosia obisuɔtɔbi sɛka ole lɛlɛɛ naafa kamɛ yi, ɔlaa wɔ mmle lakye SAATE nwu nfũ kuata Yeremia alɛ:2“Yɔ kukũ faakpana sɛlaa se simuu latɔkɔ fɔ lakyeko ni Israel, Yuda ku nnle bamba mmuu suoto fakpee kaamɛ, diayɔ ni di obe wɔ lakyekasɔ latɔɔkakatɛ latɔɔta fɔ ni di Yosia sɛka olebee kamɛ diɛbadu ni di kanunua.3Loobia nse Yuda batii lenu sɛlaa kpile otũ biala latɛ nlɛ kamayɔ n-wako ni di suoto lɛma yi, obiala lɛma kamakyi di amumu osuku nɔɔ suoto; ni kamayɔ amumu lɛma ɔbla ku sikpile lɛma nwu nkyɛ ma.”4Nioso Yeremia lalɛɛ Neria obisuɔtɔbi Baruk, di Yeremia labuɛ sɛlaa se simuu di SAATE nwu latɔkɔ nwɔ ni yi, ni di Baruk lakpana sĩ aakpee di kukũ nwu kamɛ nɛ.5Ni di Yeremia latɔkɔ Baruk alɛ, “Beetĩi mi osuku; namafuo SAATE nwu olekatakɔ ɔkyɛ.6Nioso, afɔ kyɛ SAATE nwu leyo di kanya onii dii suoto, faalaaka SAATE nwu sɛlaa se faakpana faakyeko ni kukũ nwu kamɛ fɛ mmle labuɛ ni fata batii nwu. Ka sɛlaa nwu fata Yuda batii ba bamuu ninkye sekpoo lɛma man-wa ni.7Loobia babayɔ ɔlaa ɔpɛ lɛma manwako di SAATE nwu anu, di obiala lɛma nkyi di sisuku kpile nɔɔ suoto, diekye SAATE nwu ɔblɔ ku lɛblɔfiɛ yakayaka le eebuɛ ni di batii ba mmle suoto lemuɔ.”8Neria obisuɔtɔbi Baruk labla lɛsaa biala le di ɔlaabuɛtɛtɛ Yeremia latɔkɔ nwɔ alɛ abla nii; aaka SAATE nwu ɔlaa aakyeko kukũ nwu kamɛ di SAATE nwu olekatakɔ.9Di Yuda ɔka Yosia obisuɔtɔbi Yehoiakim sɛka ole lɛlɛɛ nɔnle di Israel batii kɔwɛntɛ naasinle kamɛ yi, baayie lɛkya di kanya onii di SAATE nwu anu baata Yerusalem batii bamuu ku batii ba niakye Yuda sekpoo baawa nii.10Diayɔ ni di kukũ kpanatɛ, Safan obisuɔtɔbi Gemaria leyo le niawɛ ni di katoo lɛkyɛ kaflɔnkɔ di olekatakɔ Kayoko Fɔle kanya yi, Baruk laka Yeremia sɛlaa aakyeko kukũ nwu kamɛ aata batii nwu bamuu di SAATE nwu olekatakɔ.Baaka Kukũ Nwu Baata Banɔɔfotii
11Di Gemaria obisuɔtɔbi Mikaia wɔ ninle ni Safan ɔwa, lanu ni SAATE nwu sɛlaa simuu di kukũ nwu kamɛ yi,12ni aasoo aakyɛ kukũ kpanatɛ nwu kayoee di lɛkayo, di lɛba le di banɔɔfotii nwu bamuu lasiɛ nii: Kukũ kpanatɛ Elisama, Semaia obisuɔtɔbi Delaia, Akbor obisuɔtɔbi Elnatan, Safan obisuɔtɔbi Gemaria, Hanania obisuɔtɔbi Sedekia ku banɔɔfotii nwu bamba bamuu lawɛ ninfa.13Di Mikaia latɔkɔ ma ni ɔlaa biala wɔ aanu Baruk laka aakyeko ni kukũ nwu kamɛ aata ni batii nwu aaloo ni yi,14ni di banɔɔfotii nwu bamuu lakpee Netania obisuɔtɔbi Yehudi, wɔ niale ni Selemia ɔwa, aale ni Kusi ɔwatɛtɛ, alɛ balaatɔkɔ Baruk alɛ, “Yɔ kukũ ko fatɔɔka fɛɛta ni batii nwu fawako.” Nioso Neria obisuɔtɔbi Baruk laklee kukũ nwu di kɔnɛɛ nɔɔ aakyɛnko ɔkyɛ lɛma.15Ni baatɔkɔ nwɔ alɛ, “Lekoto, siɛ kaasɔ, faaka kukũ nwu fata wo.”Nioso Baruk laka kũ aata ma.16Obe wɔ baanu ni sɛlaa se mmle simuu yi, ni baanyu bawo di anu di lɛyɛkɛ kamɛ ni baatɔkɔ Baruk alɛ, “Dikpeni buɔlaabuɛ sɛlaa se mmle simuu buɔtɔkɔ ɔka.”17Ninfɛ baakaalɛ Baruk alɛ, “Tɔkɔ wo, lɛ fɛɛbla fɛɛwa fɛɛbakpana asaa ya mmle nwu amuu? Yeremia niebuɛ sĩ fɛɛkpana?”18Ni di Baruk ladiki kanya alɛ, “Yii, nnwɔɔ niabuɛ sɛlaa se mmle simuu aatɔkɔ mi, ni layɔ kakpanawesee lakpana sĩ lakpee di kukũ nwu kamɛ nɛ.”19Ni di banɔɔfotii nwu latɔkɔ Baruk alɛ, “Afɔ ku Yeremia, bitɔɔkyɛ biɛlaawofa. Bitanta otii kuonwii latafo lɛba le bikpe nii.”
Ɔka Lakpee Kukũ Nwu Ɔtɔ Aafiɛ
20Baayɔ kukũ nwu baatɛ ni di kukũ kpanatɛ Elisama kayoee kamɛ baaloo ni yi, ni baakyɛ ɔka nfũ di leyo nwu kaflɔnkɔ baalaatɔkɔ nwɔ lɛsaa biala nɛ.21Ninfɛ di ɔka lakpee Yehudi alɛ alaayɔ kukũ nwu awako nɛ. Ni di Yehudi lasifi aalaayɔ kũ di kukũ kpanatɛ Elisama kayoee nwu kamɛ aawako aabaka aata ɔka ku banɔɔfotii ba bamuu niayila nwɔ ni di ɔlɔɔkɔ nɛ.22Kɔwɛntɛ naasinle di Israel batii awɛntɛ kamɛ diale, ɔka kafɔɔ lasiɛ di kɔkyɛɛ obe leyo kamɛ, di ɔtɔ latɔɔkɛsɛɛ ni di ɔtɔ dibukii kamɛ di anu nɔɔ.23Nse Yehudi lɛka kukũ nwu ele etiɛ ee ɛna yi, ɔka n-yɔ kukũ kpanatɛ kapamii an-kya kũ andiki ankpee di ɔtɔ dibukii nwu kamɛ, dialaase di obe wɔ di kukũ nwu kumuu lafiɛ ni di ɔtɔ nwu kamɛ.24Ɔka nwu ku bakpɛmblatɛ nɔɔ bamuu ba nianu ni sɛlaa se mmle simuu ditatuo lɛyɛkɛ kuninwii, ee babɛbɛɛ akpeele lɛma.25Nu di Elnatan, Delaia ku Gemaria latɔkɔ ɔka alɛ atanfiɛ kukũ nwu yi, atakyɔɔ ma atoko.26Kafɔɔ, ɔka latɔkɔ, ɔka nwu obisuɔtɔbi Yerahmeel, Asriel obisuɔtɔbi Seraia ku Abdeel obisuɔtɔbi Selemia alɛ bamufũ kukũ kpanatɛ nwu Baruk ku ɔlaabuɛtɛtɛ Yeremia bawako. Kafɔɔ SAATE nwu lawofasa ma.Yeremia Lakpana Kukũ Bamba
27Di ɔka nwu lafiɛ ni kukũ ko di Baruk lakpana ni di Yeremia ɔlaa kanya aaloo ni yi, ni di SAATE nwu ɔlaa lawa kuata Yeremia alɛ:28“Yɔ kukũ bamba faakpana sɛlaa se simuu niasiɛ ni di kukũ kasale kamɛ fakpee ninkũ kamɛ, nko di Yuda ɔka Yehoiakim lafiɛ nii.29Tɔkɔ Yuda ɔka Yehoiakim kafɔɔ falɛ, ‘Nnya ɔlaa wɔ di SAATE nwu kobuɛ ni alɛ: Faakpee kukũ nwu ɔtɔ faafiɛ, ni faabuɛ falɛ, “Obe oso fɛɛkpana feekpee ninkũ kamɛ falɛ nwaako Babel ɔka kamawa aamawɔɔsa kasɔ ka mmle, an-wɔɔsa kafɔɔ batii ku babɔkɛɛ andiki ninka suoto?”30Nkpo oso, nnya ɔlaa wɔ di SAATE nwu kobuɛ ni di Yuda ɔka Yehoiakim suoto alɛ: Ɔlɔbawɛ otii kuonwii asiɛ di Dawid lɛkakpomii suoto; Babayɔ kpi nɔɔ manfuki man-yu, kufĩ kamapɛ nwɔ di kakũ, oblokyi kafɔɔ kamakpete nwɔ di kakyɛ.31Kamananfi nnwɔɔ ku babi nɔɔ ku bakpɛmblatɛ nɔɔ kootoko di amumu lɛma ablasaa nwu suoto; kamayɔ sɛlaa kpile otũ biala labuɛ ni di suoto lɛma n-wako di batii ba ninsi ni di Yerusalem ku Yuda suoto, ta batakyɔɔ ni atoko oso.’ ”32Nioso Yeremia layɔ kukũ bamba aata kukũ kpanatɛ Neria obisuɔtɔbi Baruk. Nioso fɛ mmle di Yeremia latoobuɛ ni yi, Baruk lakpana di kukũ nwu kamɛ sɛlaa se simuu di Yuda ɔka Yehoiakim lafiɛ ni di ɔtɔ kamɛ aakpee di kukũ nwu kamɛ. Ni aakple aabuɛ sɛlaa nwu nkpo okle kpinwu aakyakaa di nsinkpo suoto nɛ.The Seed Company