Yeremia18
Yeremia Lakyɛ Dibukiiblatɛ Leyo
1Nnya ɔlaa wɔ niakye SAATE nwu nfũ kuawa ni Yeremia ɔkyɛ alɛ:2“Soo fakyɛ abukiiblatɛ leyo, ninaatɔkɔ fɔ ɔlaa nii ninfa.”3Nioso lasoo lakyɛ abukiiblatɛ nwu leyo, ni lanyɔɔ ɔɔbla ɔkpɛ di kataata ka suoto mambla ni abukii nɛ.4Kafɔɔ dibukii le aayɔ kɔtɛ aatɔɔbla ni lalalaa di nnɛɛ nɔɔ; nioso abukiiblatɛ nwu layɔ kɔtɛ nwu aabla dibukii bamba, aamunumunusa ni fɛ mmle diakyɛkyɛ diatɔɔ ni kanya.5Ninfɛ di SAATE nwu ɔlaa lawa kuatɛɛ alɛ:6“Oo Israel batii, naafuo ye ɔyɔ ɔbla fɛ mmle di abukiiblatɛ wɔ mmle mbla ni?” SAATE nwu niebuɛ alɛ, “Oo Israel batii, fɛle mmle di kɔtɛ nte ni di abukiiblatɛ kɔnɛɛ kamɛ yi, nkpo bite di nnɛɛ nii nɛ.7Nse obe lele lebuɛ nlɛ baasifi kale ee sɛkakalekɔ kawo, baabiɛ ka batɛ kaasɔ, baawɔɔsa ka kafɔɔ yi,8ni nse kale nwu lasĩ ɔlaa lata ni lekyi di okpile nɔɔ suoto yi, ni kamadiɛ, nɔmasin-yɔ ɔlaa kpile wɔ nlɛ kamayɔ n-wako ni di suoto ninwu n-wako.9Ni nse di obe bamba owo kamɛ kafɔɔ lebuɛ nlɛ kamabla kale ee sɛkakalekɔ kawo nin-se ka kafɔɔ yi,10ni nse kale nwu lɛbla okpile di anu nii anankyɔɔ mi atoko, ni nɔmasimbla dibiene le latɛ nlɛ kamabla nta ka ni ɔbla.11“Nkpo oso kanunua tɔkɔ Yuda batii ku mba ninsi ni di Yerusalem falɛ, ‘Nnya ɔlaa wɔ di SAATE nwu kobuɛ ni alɛ: Binyu lo, komiɛ ɔlaa kpile otũ ku kanwumbe okũ nlɛ diwa di suoto lee. Nioso bikyi di sisuku kpile lee nwu suoto, obiala lee, bielolaa sisuku lee ku sɛsaabla lee.’12Kafɔɔ babadiki kanya bilɛ, ‘Diefĩ. Bubanwini mumbla di lɛsaa le di awo bamu buɛtɛ ni kanya; obiala loo kamatikanko otu kpile nɔɔ otokopĩ sɛsaabla.’ ”Batii Nwu Lasĩ SAATE nwu
13Nkpo oso nnya ɔlaa wɔ di SAATE nwu kobuɛ ni alɛ:“Biwolaa kamɛ bikyeko nnle nwu kamɛ:Owe nitoodinu ɔlaa fɛ nnwɔ mmle okle?Lɛsaa kpile nimunimudi Israel Kakpeelebitɛ ntɔɔbla nɛ.14Lebanon atubakanintoodiyɛ di afuɔnkpaa kyɛlɛlɛ ninya suoto?Ntu nyɛnɛnɛɛ nimi be niekye ni nkyekɔ fanfantoodidiɛ obiɛ ofe?15Kafɔɔ batii nii ntooyee mi;manfiɛ olufui manta afiɔ ya ninandie ni lɛsalɛsaa,ninta ma mantuula di sisuku lɛmaku saa nfenkɔ lɛma suoto.Manta ma mankyɛ di sisukuyĩiku sisuku se ninanle ni sisuku kplɛ suoto.16Kasɔ lɛma kamalalaa kante,kanle lɛmansaa ninte ni obe lele;dibabla batii ba bamuu ninwaalɛ manfe ni ninfa ɔkpɛmantũkunsa kafɔɔ asi lɛma.17Kamasamiisa ma di balo lɛma anu,fɛle kɔfɛɛfɔ ko niekye ni kufĩkatunkɔ;di ɔlaa kpile otũbee kamɛ yi,kamaa nii kamakyisa nta ma diele anu nii.”Kanwumbe Okũ Di Yeremia Suoto
18Ni baabuɛ alɛ, “Biwa, biɛta bukũ kanwumbe di Yeremia suoto; di mmle di kufiofa ko di oletatɛ ntuo ni dilɔbayu ni, ee numbentɛ kɔkà kuyu, ee ɔlaa wɔ niekye ni ɔlaababuɛtɛtɛ ɔkyɛ kuyu. Nioso biwa, biɛta budieko nwɔ ku sɛkplalomii loo alɛ bulakyɔɔ ɔlaa wɔ oobuɛ ni kuonwii atoko.”19Oo SAATE, kyɔɔ mi atoko;faanu ɔlaa wɔ di kanya babuditɛ nii kobuɛ ni!20Man-yɔ dikpile manta dibiene koto?Kafɔɔ batookutu dibiɔ bɛɛtɛ mi.Nyuma falɛ layila di anu lɛfɔlakakatɛ di disi lɛmaalɛ faakyisa ɔblɔ yakayaka lɛfɔ di suoto lɛma.21Nioso ta kɔka kukpɛ babi lɛma;faayɔ ma fakpee di kapamii osie nnɛɛ.Ta basɔfɔ lɛma babla balɛ̀ma ku bakpisɔfɔ;ta balo basuɔtɔ lɛma,bakosopo lɛma bakpi di kapamii kanya di kakpɛ kamɛ.22Ta banu kudu kanya bakyeko ayo lɛma,nse fɛɛkpaa asaa balalaasatɛ fɛɛwako di suoto lɛma di difua kamɛ,diekye batookutu dibiɔ bɛɛtɛ alɛ nkpa mbuo,ni bɛɛkyɔɔ dikyi kafɔɔ bɛɛta nkpaa nii nɛ.23Oo SAATE, kafɔɔ afɔ faye,kanwumbe lɛma nwu kamuu alɛ boolo mi nii.Tan-yɔ akpilesaa lɛma ɔbla faakyɛ maee faakpaa sinumpoo faatĩi sikpile lɛma nwu di anu lɛfɔ.Ta batakatɛsa ma bayu di anu lɛfɔ;blako suoto lɛma ɔkpɛ di lɛblɔfiɛ lɛfɔ obe kamɛ.The Seed Company