YESAYA6
Yaa Lalɛɛ Yesaya Alɛ Ale Yaa Ɔlaabuɛtɛtɛ
1Di lɛlɛɛ le di Ɔka Usia lakpi nii, lanya SAATE nwu lasiɛ di lɛkakpomii kplɛ niɛtaka ni katoo suoto, di akpeelekyɔ nɔɔ atokosi layii ni Yaa olekatakɔ nwu.2Baserafi lɛwɛ di osi nɔɔ, obiala lɛma lawɛ afoko akuɔ: Baayɔ anyɔ baatĩi anu, baayɔ anyɔ baatĩi nkpaa, baayɔ anyɔ kafɔɔ baatɔɔflɛlɛtɛ.3Baatɔɔtɔkɔ bawo kafɔɔ alɛ:“Klekle, klekle, klekle ninle SAATE wɔ Ninlenke nii;kayi kamuu leyii pɔ ku lɛkpa nɔɔ.”4Di sɛlɔ lɛma nwu ladie nii, kayokontũ sewoso ku asɔse lenya latukũ, ni di kɔyɔ layii Yaa olekatakɔ nwu nɛ.5Ni lafaa labuɛ nlɛ, “Eyoo! Kutooloo mi! Diekye otii wɔ di anyasibi dieklekle ni nle, nsi ni kafɔɔ di batii ba di anyasibi dieklekle ni kamɛ, anu nii kafɔɔ ntɔɔnya Ɔka nwu, SAATE wɔ Ninlenke nii.”6Ninfɛ di baserafi nwu onwii laflɛlɛtɛ aawa ɔkyɛ nii ku lɛtɔkɔnii di kɔnɛɛ nɔɔ, aadiki ni di oleɔta akyikye suoto ku kɔmaasa nɛ.7Ni aayɔ ni aalɔɔfɔ mi kaanya aabuɛ alɛ, “Nyu, nle mmle ntɔɔkpanko anyasibi lɛfɔ; batootekete fɔ okpile di suoto, bɛɛta koto kafɔɔ di sikpile lɛfɔ suoto.”8Ninfɛ lanu SAATE nwu sɛlɔ kobuɛ alɛ, “Owe kakpee kɔtɔ? Owe kafɔɔ nimakyɛ anta wo? ”Ni labuɛ nlɛ, “Nnyɛɛ. Kpee mi! ”9Ni aabuɛ alɛ, “Kyɛ faalaatɔkɔ batii ba mmle falɛ:“ ‘Bibanu minkple minnu, kafɔɔ bilabanu kasɔ;bibanya minkple minnya, kafɔɔ bilɔbanya bitɛ nsũ.’10Bla batii ba mmle siɛtu siwɛ osie;ta atoko lɛma atĩifaata anu lɛma kafɔɔ abiɛ.Nse diele nkpo babanya ku anu lɛmamannu ku atoko lɛma,mannu kasɔ ku situ lɛma,mamunikĩi manwɛ kafɔɔ difiɛyɔɔ.”11Ninfɛ lakaalɛ nlɛ, “O SAATE, ninaadu ɔmɛmbe ?”
Ni aadiki kanya alɛ:“Diɛlaase di obe wɔ di okpoo kplɛ nwu lebiɛ kuote nidi batii diesinsi nwu ni kaamɛ,diɛlaase di obe wɔ di ayo nwu lete ni afukutidi afe lɛlalaa eekple ni kafɔɔ aputu,12diɛlaase di obe wɔ di SAATE nwu lekyesee ni obiala fanfabeediɛ kasɔ nwu bɛɛtɛ ni kolaa.13Kuntɛ batii dikyuu fosile niebu di kasɔ nwu,babakple mamalalaasa ma.Kafɔɔ fɛ mmle di kɔkpɛ ku lekpookpooake mbu anyila ni nse beebudi nya ni yi,nkpo diibi klekle nwu kamale leke di kasɔ nwu suoto nɛ.”
The Seed Company