YESAYA43
Yaa Labuɛ Aatɛ Alɛ Abadiki Batii Nɔɔ
1Kafɔɔ nunua, nnya ɔlaa wɔ di SAATE nwu kobuɛ ni-nnwɔ niɛbla ni afɔ Yakob,nwɔ nieloso ni afɔ Israel:“Tanyɛkɛ diekye ntoodiki fɔ;ntɔɔlɛɛ fɔ ku leyooto nlɛ; ole mi fale.2Nse fasi di ntu kamɛ,kamasiɛ ko fɔ;nse fasi di sekle kamɛ,silabayɔ fɔ.Nse fasi di ɔtɔ kamɛ,flabafiɛ;ɔtɔ ɔflɛɛ nwu dilabafiɛ fɔ.3Diekye ami ninle Saate nwu, Yaa lɛfɔ,Israel Klekletɛ Nwu, Dikitɛ lɛfɔ;layɔ Egipte lata ta afɔ oso,Kus ku Seba lata di disi lɛfɔ.4Di obe wɔ feefũ ni kɔya di anu nii, di dibu ntika fɔ ni di suotonimbɔmbɔ fɔ ni kafɔɔ oso,kamayɔ batii nta di disi lɛfɔ,n-yɔ nnle kafɔɔ nta ta nkpa lɛfɔ oso.5Tanyɛkɛ diekye nsiko fɔ;kamakpaa babi lɛfɔ nkyeko kufĩ katunkɔnsiisa ye kafɔɔ nkyeko di kufĩ kamɛɛkɔ.6Kamatɔkɔ katoo kasɔ nlɛ, ‘Diɛ ma!’Kala kasɔ kafɔɔ nlɛ, ‘Tanmufũ ma faase.’Kpaa babisuɔtɔbi nii fakyeko fanfa fawakoku babisankobi nii fakyeko nsɔ nyɛntɛlekɔ-7otii lele bɛɛlɛɛ ku leyooto nii,nnwɔ lɛbla lɛta ni dibu nii,nnwɔ leloso lɛbla ni kafɔɔ fawakoe.”Israel Nwu Ninle SAATE Kamaayilatɛ
8Kpaa mba ninkpe ni anu kafɔɔ bɔlɔɔnya ni fawako,bakpe ni atoko kafɔɔ boloonu ni.9Nnle nwu mmuu disiisa bawobatii nwu kafɔɔ basi.Owe kaamɛ lɛma nimabuɛ nle mmleantɔkɔ wo kafɔɔ sekofolaa se nintɔɔwa siɛbafe ni?Bakpaa kamaabayilatɛ lɛma bawako baababuɛ alɛ siate nkpo,mmle okle baabamba kanu mambuɛ alɛ, “Kute nkpo.”10Saate nwu niebuɛ alɛ, “Aye ninle mi kamaabayilatɛ,ku bakpɛmblatɛ nii ba lediki nii,alɛ biatofo, minfũ mi kafɔɔ minnuminnu kasɔ kafɔɔ alɛ ami ninle nnwɔɔ.Yaa kuonwii diele mi katũ,kuonwii kafɔɔ dilabasinwa sɛɛmaa nii.11Ami, nwaako Ami, ninle SAATE nwu,Ami kamaa, dikitɛ kuonwii nsinnaa.12Ladiki latuo, ni ladiki ye nɛ, ni labuɛ latɔkɔ kayi nɛAmi, diele kasɔ bamba afiɔ kaamɛ lee.Aye ninle mi kamaabayilatɛ,” SAATE nwu niebuɛ alɛ, “Ami ninle Yaa.13Nwaako, diɛyɔ ni di saa obe Ami ninle nnwɔɔ.Kuonwii dilaafuo otii ofũ di nnɛɛ nii kamɛ.Nse lɛbla lɛsaa, owe nimafuo ni omunikĩisa?”Yaa Labuɛ Aatɛ Alɛ Abadiki Batii Nɔɔ Di Babilon
14Nnya ɔlaa wɔ di SAATE nwu-Dikitɛ lee, Israel Klekletɛ nwu kobuɛ ni:“Aye oso kamakyese batii mankyɛ Babilonmantikanko Babilon batii ɔtɔ ɔtɔdi seklo se suoto mankanta nii.15Ami ninle SAATE nwu, Klekletɛ lɛfɔ nwu,Israel blatɛ, Ɔka lɛfɔ.”16Nnya ɔlaa wɔ di SAATE nwu kobuɛ ni-nnwɔ nindiki ni osuku di lekpo kamɛ,kafenkɔ di sekle kplɛ kamɛ,17nnwɔ niata ni bakeke ba di bapɔnkɔ nnanfi ni ku bapɔnkɔ,bakpɛtɛ ku basientɛ bamuu,mannɔɔ ni kɔyaa di ntu kamɛ, manansinfuo ni ɔtaka kafɔɔmannii ni fɛ kandiɛ okũ:18“Biyee asaa ya nintɔɔwa ɛɛbafe ni;bitansimbu nya disi.19Binyu, nfɛ kamabla lɛsaa fɔle!Nfɛ diɔkyɔɔ, biinya ni?Kodiki osuku di ɔfaafuu kasɔkɔta ntu ntaa di kasɔ ka nintookpi ni suoto.20Babɔkɛɛ ba ninkpe ni kobe kamatɛɛ dibu,lepoo kamɛ baweewee ku asukusuku,diekye lɛta ntu di ɔfaafuuku sekle di kasɔ kpile suoto,kɔta batii nii ntu, mba lediki nii,21batii ba lɛbla lɛta ni suotoalɛ baadiki katansa nii mambuɛ.22“Oo Yakob, kafɔɔ fatalɛɛ mi,Oo Israel, fatata dibuo fɔ di suoto nii23Fatawakoe bafoso fata ofiɛ asaaɔta,ee fakpee mi dibu ku oleɔta.Ntakpee fɔ kubuɛ ku alesaa asaaɔtaee nkpee fɔ dibuo di olufui ɔkaalɛ suoto.24Diidii fatayɔ koto lɛfɔ faya olufui fatɛɛ,ee fayɔ babɔkɛɛ oleɔta lɛla famiɛsɛɛ.Kafɔɔ fɛɛyɔ sikpile lɛfɔ fookpee mi kubuɛfoodiki mi ninwuna kafɔɔ ku ɔtanlolaa ɔbla lɛfɔ.25“Ami, nwaako ami, nimayɛɛsa,ɔtanlolaa ɔbla lɛfɔ ta ami omu leyooto oso,namasinyuma sikple lɛfɔ kafɔɔ diidii.26Nyumasɛɛ sɛmaa ɔlaafaata bunanfi ɔlaa nwu buta baawo;faabuɛ ɔlaa nwu di ole fɔ kuwɛ.27Ɔwa lɛfɔ kasale labla okpile;Kanya bafuntɛ lee lataka baayila mi di suoto.28Nkpo oso kamakpee olekatakɔ lee banɔɔfotii sinunsɔ,kamadiki Yakob nta kawɔɔIsrael kafɔɔ nta sinunsɔ.The Seed Company