YESAYA21
Odiki Otuo Di Babilon Obiɛ Suoto
1Ɔlaa di Ɔfaafuu wɔ ninte ni di Lekpo kotoko:Fɛle mmle di kakitikɔ nfiɛ kankye ni kala-kasɔ kamafe nii,nkpo di lo nkye ɔfaafuu,di kasɔ yɛkɛle nɛ.2Odiki otuo siene beediki beetuo mi:Otii kalɔ kututɛ kodiki batii anta, leyo biɛtɛ kafɔɔ koyu asaa.Elam, taka kakpɛ! Media, mana nwu fakyi!Kamata atuuni ya amuu ɛɛta ni nloo.3Di nle mmle oso suoto nii konu dibuo,dibuo yakayaka lemufũ mi, fɛle nse ɔsanko kɔkpɛ kolofo;ntɔkpɔkpɔtɔ di sɛlaa se konu nii,ntooyu di nle kɔnya nii.4Otu nii kɔkpa,lɛyɛkɛ kɔtɛɛ ntũtũkũ;kɔtɔɔfɔ ko konyu osuku nta nintookple difu diɛtɛɛ.5Beetũ sipunu,beefukuti abula beetika,beele, beenyi!Bitaka, aye banɔɔfotii,biekpee kubiafunsaa nnɔnyi!6Nnya ɔlaa wɔ di SAATE nwu lɛtɔkɔ mi ni alɛ:“Kyɛ, falaase okpoo siɛtɛfaata abatɔkɔ fɔ lɛsaa le ɛɛnya ni.7Nse ɛɛnya bakeke ba di bapɔnkɔ nnanfi niku bapɔnkɔ banyɔ banyɔ,babɔkɛɛ ba ninte ni fɛle bapɔnkɔ basiɛtɛ nsi di babɔkɛɛ ba ninte ni fɛ bapɔnkɔ suoto yi,ee kapu bapɔnkɔ basiɛtɛ nsi di kapu bapɔnkɔ suoto,faatɔɔ alolaa anyu,alolaa anyu nwaa.”8Ni okpoo siɛtɛ nwu ayiisa kudu alɛ,“Saate nii, dii biala leyila di lɛba takale nwu;kakyɛ biala nwɛ di kayilakɔ nii.9Nyu, osuɔtɔ onwii kɔwa di keke wɔ di bapɔnkɔ nnanfi ni kamɛku bapɔnkɔ banyɔ banyɔ.Oobuɛ kafɔɔ ankyesee alɛ:‘Babilon ntoobiɛ, atoobiɛ!Afiɔ nɔɔ nwu amuubeebiɛ nya bɛɛtɛ kaasɔ!’ ”10O batii nii, beebiɛ ma bɛɛtɛ di kamɔɔ kapɛkɔ,lɛtɔkɔ ye ɔlaa wɔ lanulakyeko ni SAATE wɔ Ninlenke ni,Israel Yaa nwu nfũ.Ɔlaa Di Edom Suoto
11Ɔlaa di Duma suoto:Otii onwii lalɛɛ mi aakyeko Seir alɛ,“Asaa nyuntɛ, be niebu di kakyɛ nwu?Asaa nyuntɛ, be niebu di kakyɛ nwu?12Asaa nyuntɛ nwu ladiki kanya alɛ,“Olesɛ kɔwa, kafɔɔ kakyɛ kamakple kanwa.Nse fabakaalɛ, ni kaalɛ;faakple fawa fabakaalɛ.”Ɔlaa Di Arabia Suoto
13Ɔlaa di Arabia suoto:Aye Dedan batii asaa basunsuntɛ dikudi,ba niesi ni di Arabia lepookuu kamɛ,14biyɔ ntu biwako mba di otukɔnsɔ nkle ni,aye ba ninsi ni di Tema,biyɔ alesaa biwako mba nietoso ni kakpɛ.15Beetoso di kapamii kanya,di kapamii ka bɛɛbɔkɔtɛ ni di kopoo kamɛ,beetoso di kɔtaa ko beebonsa ni kanyadi kakpɛ ka nintoofila ni kamɛ.16Nnya ɔlaa wɔ di SAATE nwu lɛtɔkɔ mi ni alɛ: “Di lɛlɛɛ ninwii kamɛ, fɛ mmle di kpɛmblatɛ nnyu ɔkpɛ nɔɔ ambla nii, Kedar batii suoto katoo ɔtakatɛsa nwu omuu kamawa kaloo.17Kedar batii kɔtaa bataatɛ bakpɛtɛ nwu nimabu mansiɛ ni nkpa, kafii babale.” SAATE, Israel Yaa nwu, niebuɛ.The Seed Company