YESAYA10
1Bayɔɔsa mba ninkpee ni afiofa ya ninansiɛko nii,ku mba ninwako ni sɛlaa se ninnyinka batii sintɛ ni kaasɔ,2mantĩi bapiitɛ sɛlaa lɛma ɔfɔtɔmantika kafɔɔ batii nii ba dinaa ni lɛbɛ kɔɔnɛɛ mantɛ,mambla ni bakpisɔfɔ nlekɔ lɛmamantafaa ni kafɔɔ bakuɛbi.3Be bibabla di dii le bɔɔnanfi ye ni kootoko,nse dikpile lekye fanfa diɛwa?Owe nfũ bibatoso minataninko?Ɔfɛ bibatɛ lɛsaawɛ lee nwu?4Lɛsalɛsaa dilɔbabu dilenkee alɛ bibatootuntula di mba beemufũ ni kamɛee minnɔɔ di mba beelo ni kamɛ.Kafɔɔ di n-ya mmle nwu amuu kamɛ, ɔblɔ nɔɔ diiyɔɔ,eekple eekplesa kɔnɛɛ nɔɔ katoo.
Asiria Ɔka Fɛ Yaa Lɛkpɛnsaa
5“Asiria yɔɔsa, ɔblɔ nii kawesee nwu,nnwɔ kɔnɛɛ kamɛ di ɔblɔ nii kawesee nwu nsi ni!6Lekpee nwɔ kale ka ninɔɔyɛkɛ ni Yaa nfũ,lɛtɔɔ nwɔ lekpee batii ba niekpee mi ni ɔblɔ,nlɛ aayu ma asaa, aafũ asaa lɛma kafɔɔ,annanafu ma kafɔɔ di lɛkpaka fɛle apatapata.7Kafɔɔ diele mmle ɛɛtɛ fiɛ,diele nle mmle ninle nwɔ disibu fiɛ;disibu nɔɔ ninle alɛ ɔɔlalaasa asaaanwɔɔsa nnle kpinwu.8Aakaalɛ alɛ, ‘Diele baka di Kakpɛ kanya bayilatɛ nii bamuu nle?9Ditawa di Kalno suoto fɛle Karkemis?Hamat lele ditate fɛle Arpad,Samaria lele kafɔɔ ditate fɛle Damasko?10Fɛ mmle di kɔnɛɛ nii layilasa ni sɛka nlekɔ be nintɔ ni afiɔsɛka nlekɔ be di afiɔ lɛma mpɔ alenke ni n-ya di Yerusalem ku Samaria-11ni ntambla Yerusalem nkpo ku afiɔ lɛmafɛ mmle labla ni Samaria ku afiɔ lɛma?’ ”12Nse Saate nwu ntooloo sɛkpɛ nɔɔ simuu ɔbla oyila di Sion Kobokote ku Yerusalem suoto yi, ababuɛ alɛ, “Kamananfi Asiria ɔka kootoko di suoto katoo ɔtakatɛsa ku lɛkanta nɔɔ.13Diekye oobuɛ alɛ:“ ‘Ku kɔnɛɛ nii osie lɛbla nle mmle,ku ninumbe nii kafɔɔ, diekye nkpe lɛsɔnu.Lekyisa nnle amɛ,lefũ lɛsaawɛ lɛma;fɛle lenkeetɛ lɛwakosa baka lɛma kasɔ.14Fɛ mmle di otii nwo antekete ni lɛkansiɛyo,nkpo di kɔnɛɛ nii lewo letekete nnle nwu lɛsaawɛ nɛ;fɛ mmle di otii nsiisa ni akansiɛfuɔ ya ɛɛtaka eediɛ nii,nkpo lesiisa nnle mmuu nɛ;kuonwii diɛpɛ kofoko,ee abɛ kanya awi.’ ”15Kafɛ kafuo suoto katoo ɔtakatɛsa olenkee otii wɔ nikɔblako ka ni ɔkpɛ,sɛɛ sáa katakatɛsa suoto katoo anlenkee otii wɔ nikɔblako nwɔ ni ɔkpɛ?Dite fɛ kawesee kalenkee otii wɔ nintakatɛsa ka ni katoo,sɛɛ kawosoku kawanyinsa otii wɔ ninanle ni owoso!16Nkpo oso, Saate nwu, SAATE wɔ Ninlenke ni,kamakyesee ofiɛ kpile di bakpɛtɛ nɔɔ nwu ninkpe ni suoto mankoso;leklekle nɔɔ nwu kamafiɛ asaafɛle mmle di ɔtɔ nfiɛ nii.17Israel Lɛkpa nwu kamakple ɔtɔ,Klekletɛ lɛma nwu kamakple ɔtɔ ɔkplalomii;di dii ninwii kamɛ kubayila kunfiɛ kafɔɔakuna nɔɔ ku siwuu nɔɔ.18Apoo nɔɔ nwu sɛlɛ ku afe bieneabalalaa fɛɛ,fɛ mmle di ofiɛ nlenkee ni fiɛtɛ.19Awoso ya nimabu ni di apoo nɔɔ kamɛ kamale asɛɛalɛ obisɔ kamafuo nya ɔka.Batii Basɛɛ Makple Manwa Saate Nfũ
20Di dii nwu nkpo Israel batii ba niebu ni,Yakob leyo batii ba nintakpi ni,dilɔbasintika nwɔ disinnwɔ niapɛ ma aatɛ ni kaasɔkafɔɔ nwaako babatika SAATE nwu,Israel Klekletɛ nwu disi.21Batii ba niabu ni kamakple manwa, Yakob batii ba niabu nikamakple manwa Yaa Sientɛ nwu nfũ.22O Israel, kuntɛ batii lɛfɔ, nte fɛle lekpo ɔtɛnsia,batii basɛɛ nimabu mankple manwa.Atoobuɛ kawɔɔ ɛɛtɛ,ɔsaabla tinini kafɔɔ ntoobiɛ kuofe.23Saate nwu, SAATE wɔ Ninlenke ni kamabladi kawɔɔ ka eebuɛ ni di kasɔ nwu kamuu suoto.24Nkpo oso, nnya ɔlaa wɔ di Saate nwu, SAATE wɔ Ninlenke ni kobuɛ ni alɛ:“O batii nii ba ninkpe ni di Sion,bitanyɛkɛ Asiria batii nwu,mba niapɛ ye ni ku kaweseebaatakatɛsa kawosoku kafɔɔ baakyɔɔ ye ni, fɛ mmle di Egipte batii labla ni.25Di obe kakuii kamɛ, ɔblɔ nii di suoto lee kamayɔɔkafutu nii kamɛ ɔtɔ kamamunikĩi kunkyɔɔ kawɔɔ lɛma.”26SAATE wɔ Ninlenke ni kamapɛ ma ku mpile,fɛ mmle aapɛ ni Midian batii aatɛ ni kaasɔ di Oreb difuɔ ɔlɔɔkɔ;abatakatɛsa ɔkyɛnwoso nɔɔ di ntu suoto,fɛ mmle aabla ni di Egipte.27Di dii nwu nkpo babatekete atoo lɛma nwu di amuusi lee,atoo lɛma di simu leebibasoosa atoo nwu mintɛdiekye bibamuɔ.Balo Nwu Ntoobuo Okpoo Bɔɔkpɛ
28Batoobuo Ayat okpoo;beefe di Migron;beediɛ asaa lɛma di Mikmas.29Batɔɔtaalɛ beefe di kobokote kalɔ osuku boobuɛ alɛ,“Bubasiɛ di Geba munte nfa.”Rama batii kotũtũkũ;Saul okpoo Gibea batii ntootoso.30O, Galim Babisankobi kowi mampɛ mmuntũ!O, Laisa batii, bikyɔɔ ma atoko!Anatof batii, bikpe nyaami!31Madmena batii ntootoso;Gebim batii biwofa.32Miɛ dii le mmle babayila di Nob;babatũkunsa lɛklɔklɔɛ lɛmadi Sion Obisankobi kobokote nwu,di Yerusalem lekpenkpe nwu suoto.33Nyu lo, Saate nwu, SAATE wɔ Ninlenke ni,kamabudi sewosola ku osie kplɛ.Ababudi awoso takale nwu an-yu,abawakosa atakale nwu kasɔ.34Ababudi lepoo awoso nwu antɛ kaasɔ ku kafɛ;Lebanon kamanɔɔ di Sientɛ nwu anu.The Seed Company