ESRA6
Baanya Ɔka Kores Kufiofa Kukũ Nwu
1Ni di Ɔka Dario ladiki osuku, ni baawowola akũ ya baatɛ ni di asaa katɛkɔ di Babel nɛ.2Baanya kukũ kunwii di Akbatana okpoo kplɛ katanikokɔ di Media kasɔ suoto, nnya nle baakpana baatika ni ninkũ suoto:“Bɛɛkpana bɛɛtɛ alɛ:3“Di Ɔka Kores lɛlɛɛ kasale kamɛ yi, ɔka nwu lakpee kufiofa di Yaa olekatakɔ nwu suoto di Yerusalem alɛ:
“Bita base olekatakɔ nwu letofo fɛ lɛba le baata ni seleɔta, biɛta base asɔse nini kafɔɔ. Lɛtaka nini dibla nkpaa afosi-anaasĩ, lɛblɛfɛ nini kafɔɔ dibla nkpaa afosi-anaasĩ,4ku afuɔ kplɛ sitika sitiɛ, ditika ninwii kafɔɔ dile sewoso. Koto ko baablako ni ɔkpɛ nwu kukye ɔka leyo koto lɛlakaa kamɛ.5Diɛkyakaa nii, Yaa leyo koto sɛɛle ku koto fututu awansaa ya di Nebukadnesar layɔ ni di olekatakɔ nwu di Yerusalem aawako ni Babel yi, bakplesa nya balaase di aba ninya di olekatakɔ nwu di Yerusalem; bayɔ nya base di Yaa leyo kamɛ.
Ɔka Dario Lata Osuku Alɛ Ɔkpɛ Nwu Kukple Kutɔɔkyɛ Sitũ
6“Nunua yi, Tatenai, Okle-Kɛmaa abaa kanyayilatɛ ku Setar-Bosnai ku aye kasɔ nwu banɔɔfotii-wo lɛma, biblasa suoto ninfa.7Bitankpee kanya di Yaa olekatakɔ ɔkpɛ wɔ mmle suoto. Bita Yuda batii abaa kanyayilatɛ ku Yuda batii banɔɔfotii base Yaa leyo le mmle letofo di kasɔ nini suoto.8“Diɛkyakaa nii, kokpee kufiofa di lɛsaa le biabla minta ni Yuda batii banɔɔfo ba mmle di Yaa leyo le mmle otofo kamɛ:“Bata koto ko di basuɔtɔ ba mmle kamablako ni ɔkpɛ kumuu bakyeko ɔka koto lɛlakaa kamɛ, kukye Okle-kamaa batii akpooto kamɛ, di mmle di ɔkpɛ nwu dilɔbayila ni.9Lɛsaa lele niefĩ- banankyue-abi-suɔtɔ, akunumuu, afosobi-suɔtɔ diɛta ni ofiɛ asaɔta ɛɛta ni Yaa wɔ di osi ku kamɔɔ, mmba, nta ku nnɔnyi, fɛ mmle di olebatatɛ di Yerusalem lɛkaalɛ nii- dikpenii biɛta ma dii biala, bitansĩ nya ɔta,10di mmle baafuo ni oleɔta wɔ nikobuo ni Yaa wɔ di osi anu ɔta, mampɛ ni ɔlaa kafɔɔ manta ni ɔka ku babi nɔɔ lɛ̀lɛ suoto.11“Diɛkyakaa nii, kokpee kufiofa nlɛ nse otii owo lɛkyɛlɛnsa ɔlaa wɔ mmle yi, baananfi owoso badiki di leyo nɔɔ suoto batakatɛsa nwɔ katoo basaka di kapiɔpiɔnkɔ nini suoto. Ta okpile wɔ mmle oso yi, bayɔ leyo nɔɔ babla atɛnkudi ya besiisa ni.12Yaa wɔ niɛta alɛ Leyooto nɔɔ dite ni ninfa, atakatɛ ɔka lele leekpomii ee batii ba nimatakatɛ kɔnɛɛ mankyɛlɛnsa ni kufiofa ko mmle ee manlalaasa ni olekatakɔ ka mmle di Yerusalem.
“Ami Dario niekpee kufiofa nwu. Bita balolaa kufiofa nwu bale nwaa.
Baakleklesa Olekatakɔ Nwu
13Ni, ta kufiofa ko di Ɔka Dario lakyesee ni oso yi, Tatenai, Okle-kamaa abaa kanyayilatɛ, ku Setar-Bosnai ku bakpɛmblatɛwo lɛma lalolaa baabla di ɔlaa nwu suoto nwaa.14Nioso Yuda batii banɔɔfo lanwini baatootofo leyo nwu, baawɛ sitũ ɔkyɛ di Yaa ɔlaabuɛtɛtɛ Hagai ku Sakaria, Ido ɔnantii nwu lɛkya oyie kamɛ. Baaloo olekatakɔ nwu otofo di Israel Yaa kufiofa ku Persia baka, Kores, Dario ku Artasasta ɔlaa wɔ baabuɛ ni kanya.15Nioso baaloo olekatakɔ nwu otofo di kɔwɛntɛ ko di Yuda batii nlɛɛ ni alɛ Adar, dii tiɛfa suoto, di Ɔka Dario lɛlɛɛ kuɔnle kamɛ.16Ninfɛ di Israel batii- olebatatɛ, Lewi batii ku balanle nwu bule- lale Yaa leyo nwu okleklesa dii ku suoto lɛyɔɔ nɛ.17Di Yaa leyo le mmle okleklesa suoto yi, baata banankyue-suɔtɔ kɔlafa, akunumuu alafa anyɔ, afosobi-suɔtɔ alafa ana, ni baayɔ ntiekpaa lefosi-nnyɔ baata okpile asaaɔta di Israel batii bamuu disi nɛ, Israel kafaabi biala onwii.18Ni baase olebatatɛ di nfaabi lɛma kanya ku Lewi batii di akudi lɛma kanya alɛ baabla ɔkpɛ manta Yaa di Yerusalem, fɛ mmle kanya bɛɛkpana beekpee ni di Mose Kukũ kamɛ nɛ.Okpi Diisi Ofe Dii Ole
19Di lefosi dii naafa di Yuda batii kɔwɛntɛ kasale kamɛ yi, balanle nwu lale Okpi Diisi Ofe dii nwu.20Olebatatɛ ku Lewi batii nwu lakleklesa suoto lɛma ni di bamuu lɛma baabla klekle nɛ. Ni di Lewi batii nwu lalo Okpi Diisi Ofe lefosobi baata balanle nwu bamuu, babilɛma-suɔtɔbi olebatatɛ nwu ku mma bamu suoto nɛ.21Nioso Israel batii ba niakye ni sɛlanle kamɛ baawa ni lale alesaa nwu, manko mba bamuu niablasa ni suoto lɛma di mba ninanle ni Yuda batii bakaako ma ni sɛsaabla lɛma se ninanklekle ni suoto di mmle baawolaa ni SAATE, Israel Yaa nwu.22Ayi akuɛnsĩ baale dii nwu ku Bloblo wɔ di Lɛnyankasaa diesi ni kaamɛ di suoto lɛyɔɔ kamɛ. Diekye SAATE nwu layɔ suoto lɛyɔɔ aakpee ma kaamɛ di mmle aakyɛlɛnsa ni Asiria ɔka nwu ablasaa, alɛ aakyakaako ma ni di Yaa leyo ɔkpɛ nwu ɔbla ɔta Israel Yaa nwu.The Seed Company