HESEKIEL8
Afiɔ Kasumu Di Yerusalem
1Di lɛlɛɛ kuɔnle kamɛ, di kɔwɛntɛ kuɔnle dii nɔnle suoto, lasiɛ ni di leyo nii kamɛ, di Yuda banɔɔfo kafɔɔ lasiɛ ni di anu nii yi, SAATE Kplɛ nwu kɔnɛɛ labatika mi di suoto ninfa.2Ni lanyu nii, ni lanya lɛsaa ninwii fɛle otii letembi nɛ. Latɔɔnya lɛsaa le niate ni fɛ ɔtɔ̀ nɔɔ diasooko diɔwa ni kasɔ labla fɛle ɔtɔ, diayɔ ni ninfa kafɔɔ diasifi ni osi nɔɔ letembi lakpa fɛ lɛbɔɔsaa le niebe ni ɔtɔ bɔmbɔ.3Aananfi lɛsaa le niate ni fɛle kɔnɛɛ aakyɔɔ, ni aamufũ mi di disi nii sinwini nɛ. Ni di Ninwuna nwu lakɛnkɛ mi aasakasa di kasɔ ku osi obo nɛ. Ni aakpaa mi di Yaa odiki otuo kamɛ aasifiko Yerusalem nɛ, aasifiko mi kaflɔnkɔ ka kaamɛ di katookasɔ kayoko di lɛba le di afiɔ ya ninta ni sɛsɔfɔwo ɔkpɛ layila nii.4Nyu lo, Israel Yaa nwu leklekle lawɛ di anu nii ninfa fɛ odiki otuo wɔ lanya ni di kasɔ lakataa nwu kamɛ.5Ninfɛ aatɔkɔ mi alɛ, “Otii obi, nyu fafenko katookasɔ.” Nioso lanyu, ni lanya afiɔ ya mmle ninkpɛ ni sɛsɔfɔwo di oleɔta akyikye katookasɔ kayoko nɛ.6Ni aatɔkɔ mi alɛ, “Otii obi, fɔɔnya lɛsaa le bɔɔbla ni- ayududusaa kplɛ ya di Israel batii kɔbla ni ninfũ, asaa ya nimatososa mi ni fanfa andiki ni di kakleklekɔ nii? Kafɔɔ fabanya bia asaa ya nikɔkpɛ ni oyududu alenke nii.”7Ninfɛ aakpaa mi aawako kaflɔnkɔ nwu kayoko nɛ. Lanyunyu, ni lanya kutuɛ kunwii di oyoyiɛ nwu kamɛ nɛ.8Ni aatɔkɔ mi alɛ, “Otii obi, kutu oyoyiɛ nwu kamɛ.” Nioso lakutu oyoyiɛ nwu kamɛ, ni lanya kayoko osuku ninfa nɛ.9Ni aatɔkɔ mi alɛ, “Buo kamɛ faalaanyu asaa kpile ku ayududusaa ya bɔɔbla ni ninfũ.”10Nioso labuo kamɛ lalaanyu, ni lanya asaa ya baatá baatika ni di seyoyiɛ nwu simuu suoto, asaa ateate amuu ya ninkpɔkɔ nii ku babɔkɛɛ ba ninkpɛ ni oyududu ku Israel batii afiɔ amuu.11Israel batii banɔɔfo afosi akuɛnsĩ layila nya di anu, Safan obisuɔtɔbi Yaasania kafɔɔ layila kaamɛ lɛma. Obiala laklee olufui lɛfiɛsaa di kɔnɛɛ nɔɔ, ni di olufui kɔyɔ kɔnɔnkɔnɔ latoodie nɛ.12Ni aatɔkɔ mi alɛ, “Otii obi, fatɔɔnya lɛsaa le di Israel batii banɔɔfo nwu kɔbla ni di ditunu kamɛ, obiala di nnwɔɔ omu nɔɔ difiɔyo kamɛ. Boobuɛ alɛ, ‘SAATE nwu dilɔɔnya wo; SAATE nwu ntosĩ kasɔ nwu.’ ”13Ni aakple aabuɛ alɛ, “Fabanya ma bɔɔbla ni asaa ya bia niɛbla ni ayududusaa alenke nii.”14Ninfɛ aakpaa mi aawako SAATE nwu leyo katookasɔ kayoko, ni lanya basanko lasiɛ ninfa, baatoowi kaku baatɔɔta Tamus nɛ.15Ni aatɔkɔ mi alɛ, “Otii obi, fɔɔnya nle mmle? Fabanya ayududusaa ya bia ninlenke ni nle mmle.”16Ninfɛ aakpaa mi aawako SAATE nwu leyo kaflɔnkɔ ka kaamɛ nɛ. Di olekatakɔ kayokontũ, di lɛkpata ku oleɔta akyikye obo. Basuɔtɔ fɛ afosi anyɔ-banɔɔ lawɛ ninfa. Baayɔ mmaa lɛma baakyɔɔ SAATE nwu olekatakɔ, anu lɛma kafɔɔ lakyɔɔ kufĩ katunkɔ, baatɔɔwa kasɔ baatɔɔta kufĩ di kufĩ katunkɔ.17Ni aatɔkɔ mi alɛ, “Otii obi, fatɔɔnya nle mmle? Lɛsaa biibii dile alɛ Yuda batii kabla ayududusaa ya mmle bɔɔbla ni ninfũ? Dikaatɛ alɛ baayɔ amumu ɔbla kafɔɔ man-yisa kasɔ nwu, mantookpee mi ɔblɔ obe lele? Nyu mmle bootufa mi mankpee mi ni sinunsɔ!18Nkpo oso kamadieko ma ku ɔblɔ; namanya ma nyaami ee n-yɔ nkyɛ ma. Nu booyiisa kudu mankpee mi di atoko yi, namakyɔɔ ma atoko.”The Seed Company