HESEKIEL37
Odiki Otuo Di Akufi Kosole Ɔtaata Suoto
1SAATE nwu kɔnɛɛ latika mi di suoto, ni aakpaa mi adieko diafe ni di SAATE nwu Ninwuna suoto, ni aayɔ mi aalaatɛ di ɔtaata onwii ntɛɛntɛɛ nɛ; ɔtaata nwu layii ku akufi.2Aakpaa mi aafenko katoo ku kala di kamɛ lɛma, ni lanya akufi kpinwu di ɔtaata nwu kasɔ nɛ, akufi ya niatɛ aakoso ni nwaa.3Ni aakaalɛ mi alɛ, “Otii obi, akufi ya mmle kamafuo nkpa ɔwɛ?”Ni labuɛ nlɛ, Oo SAATE Kplɛ, lete lɛfɔ ninye.”4Ninfɛ aatɔkɔ mi alɛ, “Buɛ ɔlaa fatɛ fata akufi ya mmle, faatɔkɔ nya falɛ, ‘Akufi kosole, binu SAATE nwu ɔlaa!5Nnya ɔlaa wɔ di SAATE Kplɛ nwu kobuɛ antɔkɔ ni akufi ya mmle alɛ: Kamata ninwuna mbuo ye kaamɛ, minwɛ nkpa.6Kamakpee ye suoto sikũ, ninta sina nkaa ye di suoto, nimbla kafɔɔ suoto kukũ ntĩi ye suoto; kamanwuna ninwuna nkpee ye kaamɛ, minwɛ nkpa. Ninfɛ bibatofo bilɛ ami ninle SAATE nwu nɛ.’ ”7Nioso labuɛ ɔlaa latɛ fɛ mmle baatɔkɔ mi nii. Ninfɛ latoobuɛ ɔlaa latɔɔtɛ ni yi, kudu kunwii lawɛ, akufi nwu latɔɔsansa baawo, ni di akufi lakya baawo, dikufi ku dikufi nɛ.8Latɛ anu lanyu, ni lanya suoto sikũ ku sina ladie siakaa ma di suoto nɛ. Suoto kukũ kafɔɔ latĩi ma suoto, kafɔɔ ninwuna ditasiɛ ma kaamɛ.9Ninfɛ aatɔkɔ mi alɛ, “Buɛ ɔlaa fatɛ fata ninwuna nwu; otii obi, buɛ ɔlaa fatɛ, faatɔkɔ ni falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Oo ninwuna, die di afɛɛfɔ ana nwu kamɛ fawa, faabanwuna fakpete di bakpi ba mmle kamɛ, alɛ baawɛ nkpa.’ ”10Nioso labuɛ ɔlaa latɛ fɛ mmle aatɔkɔ mi nii, ni di ninwuna labuo ma kaamɛ nɛ; baawɛ nkpa ni baataka baayila di nkpaa lɛma suoto- baale bakpɛtɛ dikudi kplɛ.11Ninfɛ aatɔkɔ mi alɛ: “Otii obi, akufi ya mmle ninle Israel batii bamuu nɛ. Boobuɛ alɛ, ‘Akufi loo ntookoso, osuku loo onyu kafɔɔ ntooyu; batoobudi wo beeyu.’12Nkpo oso buɛ ɔlaa fatɛ, faatɔkɔ ma falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Oo batii nii, kɔwa sɛkya lee ɔbatikiti nindiki ye kafɔɔ nkyeko sĩ kamɛ; kamakplesa ye n-wako Israel kasɔ suoto.13Ni di aye, batii nii, bibatofo bilɛ ami ninle SAATE nwu nɛ, nse letikiti sɛkya lee lediki ye kafɔɔ lekyeko sĩ kamɛ.14Kamayɔ Ninwuna nii nkpee ye kaamɛ minwɛ nkpa, kamata ye kafɔɔ minsiɛ di aye bamu kasɔ suoto. Ninfɛ bibatofo bilɛ ami SAATE nwu niakakatɛ, ntɔɔbla ni kafɔɔ, SAATE nwu niebuɛ.’ ”
Yuda Ku Israel Di Sɛka Kalekɔ Kanwii Kamɛ
15Ni di SAATE nwu ɔlaa lawa kuatɛɛ alɛ:16“Otii obi, yɔ kawesee faakpana asaa fatika ka di suoto falɛ, ‘Kawesee ka mmle nle Yuda ku Israel batii ku mba niɛbla ni onwii ku nnwɔɔ kale.’ Faayɔ kawesee bamba, faakpana asaa fatika ka di suoto falɛ, ‘Efraim kawesee nle Yosef ku Israel batii bamuu ku mba niɛbla ni onwii ku nnwɔɔ kale.’17Kyasa kowesee nwu baawo diɛbla kawesee kanwii, alɛ kuakple kanwii di kɔnɛɛ lɛfɔ.18“Nse okpoo lɛfɔ batii lɛkaalɛ fɔ alɛ, ‘Floodiki lɛsaa le mmle kasɔ fata wo?’19Tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Nfɛ kɔwa Yosef kawesee nwu ɔbayɔ- nka ninsi ni di Efraim kɔnɛɛ- ku Israel batii ana ya niɛbla ni onwii ku nnwɔɔ, ninkyasa ka di Yuda kawesee suoto, mbla ma kawesee kanwii, ni babakple onwii di kɔnɛɛ nii.’20Klee kowesee nwu fɛɛkpana asaa feetika ni di anu lɛma,21faatɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ: Kamadiki Israel batii nkyeko nnle be kamɛ baasifi nii. Kamasiisa ma nkyeko kakɔ biala, nkplesa ma n-wako mma bamu kasɔ suoto.22Kamabla ma kale kanwii di kasɔ nwu suoto, di Israel abokote suoto. Ɔka onwii nimawɛ di bamuu lɛma suoto, diidii blɔbasinle nnle nnyɔ ee basɛ di sɛkakalekɔ akyuu anyɔ.23Blɔbasin-yɔ afiɔ lɛma ku atembi nyakatãa nwu ee ɔtanlolaa ɔbla lɛma kuninwii bakpɔnɔfɔsa suoto lɛma. Diekye kamadiki ma nkyeko sikpile lɛma simuu se niefenko ma ni sɛmaa kamɛ, ninkleklesa ma. Babale batii nii, ami kafɔɔ kamale Yaa lɛma.24“ ‘Kpɛmblatɛ nii Dawid nimale sɛka di suoto lɛma, bamuu lɛma kafɔɔ kamawɛ bafosokpatɛ onwii. Babale afiofa nii, manlolaa kafɔɔ sɛsaabla nii manklee.25Babasiɛ di kasɔ ka lata ni kpɛmblatɛ nii Yakob, kasɔ ka suoto di bate lee lasiɛ nii. Mma ku babi lɛma ku bawa lɛma kamasiɛ ninfa dinaa ni kaloo. Kpɛmblatɛ nii Dawid kafɔɔ kamale ɔka lɛma dinaa ni kaloo.26Kamabla atoko ɔkyɛ ole kanya ninii ku mma; kabale kanya ninii ka ninaa ni kaloo. Kamata ma manyila kpinkpĩ, nta lɛpɔ lɛma nkpɛ ninkyakaa, kamayɔ kakleklekɔ nii kafɔɔ ntɛ di kamɛ lɛma dinaa ni kaloo.27Kasiɛkɔ nii kamawɛ ku mma; kamale Yaa lɛma, mma kafɔɔ babale batii nii.28Ni di nnle nwu kamatofo alɛ ami SAATE nwu niɛbla Israel Klekle, nse kakleklekɔ nii nsi di kamɛ lɛma dinaa ni kaloo nɛ.’ ”The Seed Company