HESEKIEL34
Israel Bafosobakpatɛ
1Ni di SAATE nwu ɔlaa lawa kuatɛɛ alɛ:2“Otii obi, buɛ ɔlaa fatɛ di Israel bafosobakpatɛ suoto; buɛ ɔlaa fatɛ faatɔkɔ ma falɛ: ‘Nnya ɔlaa wɔ di SAATE Kplɛ nwu kobuɛ ni alɛ: Israel bafosobakpatɛ ba nikonyu ni suoto lɛma lete, bayɔɔsa! Diele bafosobakpatɛ ninkpa bafoso?3Minle babɔkɛɛ lɛla, min-yɔ bafoso sinwini minkaa akpeele minkpee, minlo kafɔɔ babɔkɛɛ ba ninsi ni lɛla. Kafɔɔ biloololaa bafoso nwu binyu.4Bitakpee mba niakpiɛkpiɛ ni osie ee biabla mba niatoofiɛ ni kɔfa ee bianii mba niafefee ni nkɔ. Bitakplesa mba niayu ni osuku biawako ee biawolaa mba niayu nii. Biayɔ kakuo ku amumu biakpa ma.5Nioso baasasami, diekye bafosokpatɛ kuonwii ditawɛ, ni baakple alesaa baata lepoo kamɛ babɔkɛɛ di obe wɔ baasasami ni nɛ.6Bafoso nii lakyɛ baakyikyii abokote amuu ku lekpenkpe takale biala suoto. Baasasami baakpete di kasɔ nwu kamuu suoto, kuonwii kafɔɔ ditakaalɛ ma disi ee awolaa ma.7“ ‘Nkpo oso, aye bafosobakpatɛ, binu SAATE nwu ɔlaa wɔ eebuɛ ni alɛ:8Nwaako lɛnya nkpe ni nkpa yi, SAATE Kplɛ nwu niebuɛ, ta di babɔkɛɛ nii nnaa ni bafosokpatɛ oso beemufũ ma, beekple kafɔɔ alesaa bɛɛta babɔkɛɛ ba bamuu ninkpe ni kobe, diekye bafosobakpatɛ nii ditawolaa ni bafoso nii, kafɔɔ baanyu ni suoto lɛma asi, ditale ni bafoso nii asi baanyu ni oso yi,9nkpo oso, Oo aye bafosobakpatɛ, binu SAATE nwu ɔlaa:10Nnya ɔlaa wɔ di SAATE Kplɛ nwu kobuɛ ni alɛ: Lɛtaka n-yɛ di bafosobakpatɛ suoto, kamakaalɛ bafoso nii ɔlaa nkyeko nnɛɛ lɛma. Kamata ma mandiɛ bafoso ɔkpa, di mmle di bafosobakpatɛ nwu dilɔbasinfuo ni suoto lɛma asi onyu. Kamadiki bafoso nii di nnya lɛma, bafoso nwu dilɔbasinle alesaa ata ma.Bafosokpatɛ Biene
11“ ‘Diekye nnya ɔlaa wɔ di SAATE Kplɛ nwu kobuɛ ni alɛ: Ami omu kamawolaa bafoso nii, ninnyu ma disi kafɔɔ.12Fɛ mmle di bafosokpatɛ nnyu ni bafoso nɔɔ ba niɛsasami ni disi, nse akpe ku mma yi, nkpo kamanyu bafoso nii disi nɛ. Kamadiki ma nkyeko aba ya amuu di nfũ baasasamisa ma baakpee ni di alokonkyɛ ku ditunu dii nwu suoto.13Kamakpaa ma ndieko di nnle nwu kamɛ, ninsiisa ma kafɔɔ nkyeko nsɔ nwu suoto, ninkpaa ma n-wako mma bamu kasɔ suoto. Kamata ma man-wee sɛfa di Israel abokote suoto, di kɔwɛ kamɛ ku sekpoo nwu simuu kamɛ di kasɔ nwu suoto.14Kamakpa ma di sɛfa kaweekɔ biene kamɛ, Israel abokote takale nwu kafɔɔ kamale ma sɛfa kaweekɔ. Nfa babate di sɛfa kaweekɔ biene nwu kamɛ nɛ. Nfa kafɔɔ babawee sɛfa bokoboko di Israel abokote suoto nɛ.15Ami omu kamakpa bafoso nii, nta ma kafɔɔ mante kaasɔ buɛɛ, SAATE Kplɛ nwu niebuɛ.16Kamawolaa mba nieyu nii, ninkplesa mba nieyu ni osuku kafɔɔ nwako. Kamanii mba niefefee ni, ninkpee mba niekpiɛkpiɛ ni osie, kafɔɔ kamawɔɔsa mba ninsi ni lɛla ku mba ninkpe ni osie. Kamakpa bafoso nwu di osuku tinini suoto.17“ ‘Kafɔɔ aye, bafoso nii yi, nnya ɔlaa wɔ di SAATE Kplɛ nwu kobuɛ ni alɛ: Kamaka lɛka di foso ku foso bamba ntɛɛ, nka lɛka kafɔɔ di akunumuu ku batie ntɛɛ.18Alesaa nwu biole ni di sɛfa kaweekɔ biene nwu diɛpɔ ata ye? Ni dikaatɛ kafɔɔ alɛ biananafu sɛfa kaweekɔ lee bule nwu ku nkpaa lee? Ntu klenkle nwu bionyi ni diɛpɔ dita ye? Ni dikaatɛ kafɔɔ alɛ biakunsa ntu nwu bule ku nkpaa lee?19Dikaatɛ alɛ bafoso nii lele alesaa ya biananafu ni, man-nyi kafɔɔ ntu be biakunsa ni ku nkpaa lee?20“ ‘Nkpo oso nnya ɔlaa wɔ di SAATE Kplɛ nwu kobuɛ antɔkɔ ma ni alɛ: Binyu lo, ami omu kamaka lɛka di bafoso ba ninsi ni lɛla ku bafoso ba niekoso ni ntɛɛ.21Ta biɛyɔ sɛfankyi ku amuusi bietutukusa ni babɔkɛɛ ba niɛwa ni kasɔ, biewuwuo ni bafoso ba bamuu niekpiɛkpiɛ ni ku akya lee dialaase ni di obe wɔ biatososa ma baasifi ni oso yi,22kamafũ bafoso nii nkpa, blɔbasinmufũ ma kafɔɔ. Kamaka lɛka di foso onwii ku foso bamba ntɛɛ.23Kamayɔ fosokpatɛ onwii nse ma kaanya, kpɛmblatɛ nii Dawid, nnwɔɔ kafɔɔ nimakpa ma nɛ; abakpa ma, anle kafɔɔ fosokpatɛ lɛma.24Ami SAATE nwu nimale Yaa lɛma, kpɛmblatɛ nii Dawid kafɔɔ nimale ɔka di kamɛ lɛma. Ami SAATE nwu niɛkakatɛ.25“ ‘Kamabla atoko ɔkyɛ ole kanya ninii ku mma, ntososa kafɔɔ lepoo kamɛ babɔkɛɛ ba ninkpe ni kobe ndiki di kasɔ nwu suoto, di mmle baalaasiɛ ni di ɔfaafuu kamɛ, mante ni kafɔɔ di lepoo kamɛ di atoko ɔkyɛ ole kamɛ.26Kamawii ma lɛtɔtrɔ ku aba ya amuu niɛmana lekpenkpe nii eekyi nii. Kamata kanto wɛɛwɛɛ nnɔɔ di obe kanya; lɛtɔtrɔ kanto wɛɛwɛɛ nimanɔɔ.27Lepoo kamɛ awoso kamatika abi lɛnya, alesaa kafɔɔ kamalɛ di kasɔ nwu suoto; batii nwu kamawɛ atoko ɔkyɛ ole di kasɔ lɛma nwu suoto. Ni babatofo alɛ ami ninle SAATE nwu nɛ, nse letekete atoo lɛma nutũle nwu di suoto lɛma, lediki ma kafɔɔ lekyeko batii ba niayɔ ma baabla ni balanle nnɛɛ.28Blɔbasinle batii ba di nnle bamba lamufũ nii, ee babɔkɛɛ ba ninkpe ni kobe labɛbɛɛ ma. Babasiɛ di atoko ɔkyɛ ole kamɛ, otii kuonwii kafɔɔ dilɔbayɛkɛsa ma.29Kamata ma kasɔ ka ninlɛ kɛɛta ni alesaa ninya, blɔbasinle batii ba di kɔka kamakpɛ ni di kasɔ nwu suoto ee nnle bamba batii bama ma.30Ninfɛ babatofo alɛ ami, SAATE nwu Yaa lɛma, nsiko ma, ni mma Israel batii nwu kafɔɔ, bale batii nii nɛ, SAATE Kplɛ nwu niebuɛ.31Aye bafoso nii, sɛfa nii kaweekɔ bafoso, bile batii nii, ami kafɔɔ nle Yaa lee, SAATE Kplɛ nwu niebuɛ.’ ”The Seed Company