HESEKIEL31
Baayɔ Egipte Baakaatɛɛsa Ku Sida Kowoso
1Di lefosi lɛlɛɛ kasale kamɛ, di Israel batii kɔwɛntɛ tiɛfa, dii kasale suoto yi, SAATE nwu ɔlaa lawa kuatɛɛ alɛ:2“Otii obi, tɔkɔ Egipte ɔka Farao ku batii nɔɔ ɔlambu nwu falɛ:“ ‘Owe babayɔ mankaatɛɛsa ku afɔ di sɛka ole kamɛ?3Nyu lo, Asiria late fɛle kowoso ko bɔɔlɛɛ ni sida di Lebanon di obe owo kamɛ,kuataka katooku sɛla se nialɛ ni onyu, kuabla ni oyududu di lepoo;sɛnya nikũ lataka katoo sialaadu kolo.4Ntu lata kũ kuamuɔ,ntu ntaakɔ kyofole lata kũ kuakaana;seklenyii lɛma labiɛ siafedi lɛba le baasɔ kũ ni nimuu siakyi,ni diata seklenyii ninwu labiɛ siakpetedi lepoo nwu awoso amuu kamɛ nɛ.5Nioso kuataka katookualenkee lepoo nwu awoso amuu;sɛla nikũ lamuɔ,ni siadie sɛla kaanale,siafukuti, ta kuawɛ ni ntu kpinwu oso.6Bakansiɛ bamuu di kɔfɛɛfɔ kamɛlabla ayo lɛma di sɛla nikũ kamɛ,lepoo kamɛ babɔkɛɛ bamuulalofo di sɛla nikũ kalɔ;nnle kplɛ mmuulasiɛ di oyududu nikũ kalɔ.7Nimuɔ nikũ lalɛ onyu,ku sɛla nikũ se niafukuti nii,diekye sidu nikũ lasoo siasifi kasɔsialaadu ntu kpinwu.8Sida awoso nwu di Yaa kɔba kamɛditafuo kũ ɔkasiiko,ee ɛfram awosoakyɛkyɛ ku sɛla nikũ,ee bayɔ kɔkpɛ́ awosobakaatɛɛsa ku sɛla nikũ-kowoso kukunwii di Yaa kɔba kamɛditawo kũ sɛlɛ.9Ami niabla kũ kualɛ onyuku sɛla kpinwu,alɛ awoso nwu amuu di Eden lakpɛ sɛsɔfɔwodi Yaa kɔba nwu kamɛ.10“ ‘Nkpo oso, nnya ɔlaa wɔ di SAATE Kplɛ nwu kobuɛ ni alɛ: Ta kuataka ni katoo, di sɛnya nikũ lataka katoo sialaadu ni kolo, kuakanta ni kafɔɔ ta lɛtaka nikũ oso yi,11lɛyɔ kũ lekpee di nnle nwu ɔka nnɛɛ, alɛ ablako nwɔ suoto ɔkpɛ di amumu nikũ kanya. Ntoofuki kũ lɛtɛ di ɔlɔɔkɔ,12bafɔɔ nnle be kafɔɔ niɛtɛ bakpe ni amumu balenke ni kamabudi kũ mantɛ kaasɔ, mankyɛ mandiɛ kũ. Sɛla nikũ kamafee sinte di abokote suoto ku sɛtaata simuu kamɛ; sɛla nikũ kamafefee sinte di kasɔ nwu kɔwɛ kumuu kamɛ. Nnle nwu mmuu di kasɔ suoto kamadie di oyududu nikũ kalɔ mansifi mandiɛ kũ.13Bakansiɛ ba bamuu di kɔfɛɛfɔ kamɛ kamasiɛ di kowoso nwu nimafee kunte ni suoto. Lepoo kamɛ babɔkɛɛ bamuu kafɔɔ kamasiɛ di sɛla nikũ kamɛ.14Nioso awoso bamba ya nin-yɛ ni di okle-lɔɔkɔ kukunwii dilɔbasintaka katoo di lɛkanta kamɛ diidii, atakatɛ awoso nwu sɛnya katoo silaadu kolo. Awoso bamba ya beekpete ni ntu nwaa kukunwii dilɔbasintaka katoo kulaadu lɛtaka nwu nkpo okle diidii; amuu n-yɛ ata kukpi, ayɛ ata kasɔ kaalɔ, di nkpa batii kamɛ, ku mba ninsoo mansifi ni ɔkya kamɛ.15“ ‘Nnya ɔlaa wɔ di SAATE Kplɛ nwu kobuɛ ni alɛ: Di dii le baasoosa kũ baakpee ni di ɔkya kamɛ yi, latĩi ntu ntaakɔ kyofole nwu ku kaku owi ɔta kũ; lata seklenyii nisĩ ditabiɛ siafe, lasɛɛ kafɔɔ ntu nimi kpinwu osuku. Ta nni oso, lanyukũsa Lebanon ku dibula wɛɛfɛɛ, ni di lepoo kamɛ awoso amuu layɔɔ nɛ.16Lata nnle nwu latũtũkũ di kasɔ nikũ ɔpɛ kudu oyiisa ladie ni di obe wɔ lasoosa kũ lakpee ni di ɔkya kamɛ, manko mba niasoo baasifi ni ɔkya kamɛ. Ninfɛ di Eden awoso amuu niawo ni nwaa ku Lebanon awoso ya nialɛ alenke nii, ku awoso ya amuu baakpete ni ntu nwaa, lawɛ kɔnɛɛ okpee kaafutu di kasɔ nwu kalɔ nɛ.17Mba niasiɛ ni di oyududu nikũ, basiɛwo nikũ, di nnle nwu kamɛ kafɔɔ ntoosoo beesifi ɔkya kamɛ ku nkũ, baalaakyakaa di mba baalo ni ku kapamii.18“ ‘Eden awoso amɛnle babayɔ mankaatɛɛsa ku afɔ di lɛklɛɛ ku sɛka ole kamɛ? Kafɔɔ, afɔ kafɔɔ, babawakosa fɔ kasɔ ku Eden awoso mankpee di kasɔ kalɔ; fabate di batii ba ninankyɛlɛnsa ni suoto, ku mba baalo ni ku kapamii kamɛ.“ ‘Nnya Farao ku batii nɔɔ ɔlambu nɛ, SAATE Kplɛ nwu niebuɛ.’ ”
The Seed Company