HESEKIEL29
Ɔlaa Obuɛ Ɔtɛ Di Egipte Suoto
1Di lɛlɛɛ fosile kamɛ, di Israel batii kɔwɛntɛ fosile kamɛ, di lefosi dii nyɔɔfa suoto yi, SAATE nwu ɔlaa lawa kuatɛɛ alɛ:2“Otii obi, yɔ anu lɛfɔ fakyɔɔ Egipte ɔka Farao suoto, faabuɛ ɔlaa fatɛ di suoto nɔɔ ku Egipte omuu suoto.3Kakatɛ fatɔɔ faabuɛ falɛ: ‘Nnya ɔlaa wɔ di SAATE Kplɛ nwu kobuɛ ni alɛ:“ ‘Egipte ɔka Farao, lɛtaka n-yɛ fɔ di suoto,afɔ kɔsanwu kplɛ yɛkɛle ko ninte ni di seklenyii lɛfɔ kamɛ.Fambuɛ falɛ, “Nil okle ole mi kule;ami niabla nwu lata suoto nii.”4Kafɔɔ kamayɔ badaduwa nkpee di n-yɛɛ lɛfɔ,ninta kafɔɔ kɔkpaku di seklenyii lɛfɔ kamɛ nnu kunkaa di apoo lɛfɔ suoto.Kamananfi fɔ ndiki di seklenyii lɛfɔ kamɛ,ku kɔkpaku ko kumuu nienu kuka ni di apoo lɛfɔ suoto.5Kamadiɛ fɔ ntɛ di ɔfaafuu kamɛ,afɔ ku seklenyii lɛfɔ kɔkpaku kumuu.Fabanɔɔ fante kaayi di lepoo kamɛ,blɔbasiisa fɔ batɛ ee basɛsɛɛ fɔ batɛ.Kamayɔ fɔ nta lepoo kamɛ babɔkɛɛ di kasɔ suoto ku bakansiɛ di kɔfɛɛfɔ kamɛfɛ alesaa.6Ninfɛ di mba bamuu ninsi ni di Egipte kamatofo alɛ ami ninle SAATE nwu nɛ.“ ‘Biale okpoku biata Israel batii.7Di obe wɔ baapaataa fɔ ni ku nnɛɛ lɛma yi, faafee amuusi lɛma, ni faabɛbɛɛ nya nɛ; obe wɔ baakpɛ fɔ ni di suoto yi, faafee ntaduu lɛma, ni diakɔnkɔ nɛ.8“ ‘Nkpo oso, nnya ɔlaa wɔ di SAATE Kplɛ nwu kobuɛ ni alɛ: Kamayɔ kapamii di suoto lɛfɔ nimalo batii lɛfɔ ku babɔkɛɛ lɛma.9Egipte kamakple kasɔ fukuti kanlalaa kante. Ninfɛ babatofo alɛ ami ninle SAATE nwu nɛ.
“ ‘Ta faabuɛ ni falɛ, “Ole mi di Nil okle nle; ni ami niabla nwu ni oso,”10nkpo oso lɛtaka n-yɛ fɔ di suoto, n-yɛ kafɔɔ di seklenyii lɛfɔ suoto nɛ. Kamabla kafɔɔ Egipte kasɔ nwu kan-wɔɔ, kante kafɔɔ kafukuti, kanlalaa diɛyɔ ni di Migdol diɛlaadu ni Siene, ninaadu bia Etiopia kɔmɛ kanya.11Otii kuonwii kɔkpaa ee bɔkɛɛ kɔkpaa dilɔbafe di kasɔ nwu suoto; kuonwii dilɔbasiɛ ninka suoto alɛɛ afosi ana.12Kamabla Egipte kasɔ kante kafukuti di nsɔ be niɛlalaa dite ni kamɛ. Sekpoo kplɛ nɔɔ kafɔɔ kamabiɛ sinte sifukuti alɛɛ afosi ana di sekpoo kplɛ se niɛwɔɔ site ni kamɛ. Kamasɛ Egipte batii nkpee di nnle nwu kamɛ, ninsamiisa ma kafɔɔ nkpete di nsɔ nwu kamɛ nfenko.13“ ‘Kafɔɔ nnya ɔlaa wɔ di SAATE Kplɛ nwu kobuɛ ni alɛ: Di alɛɛ afosi ana kalookɔ yi, kamasiisa Egipte batii nkyeko nnle nwu kamɛ, di nfũ baasamiisa ma baakpete nii.14Kamakplesa ma nkyeko sɛlanle kamɛ nwako, ninkplesa ma nsifiko Patros, bawa lɛma kasɔ suoto. Nfa babale sɛkakalekɔ biibii nɛ.15Kabale sɛkakalekɔ ka niebiibii kalenke ni di sɛkanlekɔ kamɛ, klɔbasinkple katakatɛ kafɔɔ suoto ninka katoo di nnle bamba suoto diidii. Kamatɛ nkpiɛkpiɛsa ka alɛ klɔbasinkple kale sɛka di nnle suoto.16Egipte dilɔbasinle disitikasaa bata Israel batii, kafɔɔ babale ninyumasa manta sikpile lɛma di lɛkyakaako le baakaalɛ baakyeko ni ɔkyɛ lɛma kamɛ. Ninfɛ babatofo alɛ ami ninle SAATE Kplɛ nwu nɛ.’ ”
Ɔka Nebukadnesar Kamalenkee Egipte
17Di afosi-anyɔ lɛlɛɛ kuɛnsinle kamɛ, di Israel batii kɔwɛntɛ kasale kamɛ di dii kasale suoto yi, SAATE nwu ɔlaa lawa kuatɛɛ alɛ:18“Otii obi, Babel ɔka Nebukadnesar ntɔɔta bakpɛtɛ nɔɔ lebuo di Tiro suoto osie kanya; disi biala lafini, nimuusi biala kafɔɔ lafifiele. Kafɔɔ nnwɔɔ ku bakpɛtɛ nɔɔ ditawɛ letota kuninwii baakyeko kakpɛ ka baakpɛ ni Tiro kamɛ.19Nkpo oso, nnya ɔlaa wɔ di SAATE Kplɛ nwu kobuɛ ni alɛ: Kamayɔ Egipte nkpee di Babel ɔka Nebukadnesar nnɛɛ, abalɛ kafɔɔ lɛsaawɛ nɔɔ ansifiko. Abafũ nwu, an-yɔ kafɔɔ kasɔ nwu kakpɛ kamɛ asaa fɛ letota anta bakpɛtɛ nɔɔ.20Ntɔɔyɔ Egipte kasɔ lɛtɔɔ fɛ letota di kɔnyaabe ko aakpee ni oso. Diekye nnwɔɔ ku bakpɛtɛ nɔɔ niabla ɔkpɛ nwu baatɛɛ, SAATE Kplɛ nwu niebuɛ.21“Di dii nwu nkpo kale, kamata lɛkyà nyila ninta Israel leyo, nimbɛ kanya lɛfɔ kafɔɔ di kamɛ lɛma. Ninfɛ babatofo alɛ ami ninle SAATE nwu nɛ.”The Seed Company