HESEKIEL19
Israel Baka Okunu
1“Afɔ yi, wola okunu di Israel baka suoto.2Sa onu nwu falɛ:“ ‘Ɔmɛ kyata-sanko di yaafɔ lale nkpodi bakyata-suɔtɔ kamɛ!Ante di bakyata abi kamɛan-nyu abi nɔɔ disi.3Aanyu dibi nɔɔ ninwii disi diamuɔ,ni diabakple kyata siene nɛ.Aatekete mmle mamufũ ni babɔkɛɛni aabɛbɛɛ batii nɛ.4Nnle nwu lanu nwɔ lɛkpanko,ni baakpa nwɔ baakpee di dibiɔ lɛma kamɛ nɛ.Baakpee nwɔ nkɔnii baakpaa nwɔbaasifiko Egipte kasɔ.5“ ‘Obe wɔ di kyata-sanko nwu lanya alɛ osuku onyu nɔɔ ntɔɔkpɔtɔɔ nii,di lɛsaa le oomiɛ ni ntooyu ni yi,ni aadiki dibi nɔɔ bambaaabla nwɔ kyata siene nɛ.6Ankumii di bakyata kamɛ,diekye nfɛ ale kyata siene.Aatekete babɔkɛɛ omufũ oweeni aabɛbɛɛ kafɔɔ batii nɛ.7Aabibiɛ n-wofakɔ lɛma aatɛ kaasɔaawɔɔsa kafɔɔ sekpoo lɛma.Nse eekumii yi, difu mpɛkasɔ nwu ku mba bamuu niasiɛ ka ni di suoto.8Ninfɛ di nnle nwu lataka nwɔ di suoto,mba niakye ni nsɔ be niamana nwɔ diakyi nii.Baafukuti asawu lɛma baatɛ nwɔ,ni aakpa aabuo di dibiɔ lɛma kamɛ nɛ.9Baananfi nwɔ ku nkɔnii baakpee di dikunyo kamɛ,ni baakpaa nwɔ baawako Babel ɔka nfũ nɛ.Baalaatɛ nwɔ di leyo katenkɔ,nioso batasinnu dikumii nɔɔ nwudi Israel abokote suoto.10“ ‘Yaafɔ late fɛle nta kowoso di nta awoso lɛfɔ kofe kamɛ;baapɛ ni di okle kotoko;kuatataa sɛla kpinwu kuatika abi kpinwuta ntu kuawɛ ni ntu kpinwu oso.11Sɛla nikũ lawɛ osie,sialɛ siata ni ɔka lɛkɔ.Siataka katoosialenkee lɛnwaakɛ,mannya ni katoo lɛtaka nikũku mmle di sɛla nikũ mpɔ nii.12Kafɔɔ baasifi nta kowoso nwu di ɔblɔ kanyani baafuki kũ baatɛ kaasɔ nɛ.Kufĩkatunkɔ kɔfɛɛfɔ lata kũ kuakoso,awosobi nikũ lakpakpaa;sɛla siene nikũ lakoso,ni di ɔtɔ lafiɛ nya nɛ.13Kanunua yi, ɔfaafuu kamɛ batɔɔsɔ kũ,di kasɔ kosole di ntu ɔlaa nkpe ni osie suoto.14Ɔtɔ lafiɛ kuakye ɔla nwu omu onwii suotokuabafiɛ awosobi nikũ.Ɔla siene kuonwii ditabu ninkũ suotokualɛ kunta ni ɔka lɛkɔ.’Nnwu ninle nyaami ɔlaa wɔ baablako ni ɔkpɛ fɛ okunu nɛ.”The Seed Company