ESODƆS15
Mose Ku Miriam Onu
1Ninfɛ di Mose ku Israel batii lasa onu wɔ mmle baata SAATE nwu alɛ:“Kamasa onu nta SAATE nwu,diekye ɛɛtaka katoo osie kanya.Pɔnkɔ ku siɛtɛ nɔɔ,eefuki eekpee di lekpo kamɛ.2SAATE nwu ninle mi osie ku onu nii;atookple mi didiki.Yaa nii ale, nioso kamatansa nwɔ,teemi Yaa ale, nioso kamatakatɛsa nwɔ katoo.3SAATE nwu ninle kpɛtɛ;SAATE ninle nwɔ leyooto.4Farao bakeke ba di bapɔnkɔ nnanfi nii, ku bakpɛtɛ nɔɔeefuki ma eekpete di lekpo kamɛ.Farao banɔɔfotii nwaalefe Lekpo Sɛɛle.5Ntu kyofole nwu latĩi ma;baamɛɛ baasifi ntu kasɔ fɛ difuɔ.6“Oo SAATE, fɛɛyɔ koletanɛɛ lɛfɔosie feekpee suoto dibu.Oo SAATE, koletanɛɛ lɛfɔlebibiɛ balo lɛfɔ.7Di osie kplɛ lɛfɔ nwu nkpo kamɛni fɛɛyɔ fɛɛpɛ mba niɛtaka bayɛ fɔ ni di suoto nɛ.Fɛɛnyɛɛnɛ ɔblɔ filale lɛfɔ nwu;kuofiɛ ma fɛ sibuu.8Di onwu lɛfɔ kamɛ ninwunani di ntu nwu lasiisa suoto nɛ.Ntu be nikobiɛ ni ku osie lataka diayila fɛ oyiyiɛ;ni di ntu nwu kakyofolekɔ di lekpo nwu ntɛɛ lanii diawɛ osie nɛ.9“Lo nwu latakatɛsa suoto katoo aabuɛ alɛ,‘Kamatikanko ma, nnaamufũ ma.Kamayɔ kapamii nii mbuo ma di suoto.Nse ntoolenkee ma leloo,kamasɛ lɛsaawɛ lɛma nwu nkpo.n-yɔ n-ya ninlɛ mi nii.’10Kafɔɔ faanwuna faakpete ma di suoto,ni di lekpo nwu layɔ ma nɛ.Ni baamɛɛ fɛ lɛbɔɔsaa nutũledi ntu nwu kplɛ kamɛ nɛ.11“Oo SAATE, owe ninte fɛ afɔ di bayaa kamɛ?Owe ninte fɛ afɔalenke di leklekle kamɛ,di lɛyɛkɛ ku dibu ntika nwɔ di suoto,ɔɔbla sɛkpɛ se niɛbla ni ɔkpɛ?12Fɛɛtakatɛsa koletanɛɛ lɛfɔ katooni kaasɔ lamɛ balo lɛfɔ nɛ.13“Di lɛbɔmbɔ lɛfɔ le ninaa ni kaloo kamɛfɛɛkpaa batii ba feediki nii.Di osie lɛfɔ nwu kamɛ fabaleko ma katũfanaabuoko kasiɛkɔ lɛfɔ nwu klekle.14Nnle bamba batii manu lɛyɛkɛ mpɛ ma;Filisti batii kamakpɔkpɔtɔ.15Difu kamapɛ Edom batii baka,lɛyɛkɛ mamufũ Moab batunletɛ,Kanaan batii kamabla biɔɔ.16Lɛyɛkɛ ku difu mapɛ ma.Kɔnɛɛ lɛfɔ nwu osiemata ma mante kloklo fɛ difuɔOo SAATE, dialaase di obe wɔ baatii lɛfɔ nwu lafe nii,batii lɛfɔ nwu faadiki ni di sɛlanle kamɛ di Egipte.17Fabakpaa ma fanwako, fanta ma mansiɛdi kobokote ko ninle fɔ ni kole suoto,Oo SAATE, di lɛba le feelolaa falɛ faasiɛ nii,Oo SAATE olekatakɔ nwu, di nnɛɛ lɛfɔ letofo nii.18SAATE nwu male sɛkadinaa ni kaloo.”19Di obe wɔ di Farao bapɔnkɔ ku bakeke ba di bapɔnkɔ nnanfi ni ku bapɔnkɔ basiɛtɛ nɔɔ labuo ni di lekpo nwu kamɛ, SAATE nwu lata lekpo ntu nwu lakple diabayɔ ma, kafɔɔ Israel batii lakyɛ baafe di lekpo nwu kamɛ di kasɔ kosole suoto.20Ninfɛ di Miriam Yaa ɔlaa buɛtɛtɛ-sanko, niale ni Aron obilɛma sankobi layɔ lɛkasa aakle kɔɔnɛɛ, ni di basanko bamuu latikanko nwɔ ku akasa baatootũ nɛ.21Ninfɛ di Miriam lasa onu wɔ mmle alɛ,“Sa sinu fata SAATE nwu,diekye eelenkee osie kanya.Pɔnkɔ ku siɛtɛ nɔɔeefuki eekpee di lekpo kamɛ.”SAATE Nwu Lata Ntu Lonle Lakple Ntu Nwaa
22Ninfɛ di Mose lakpaa Israel batii aadieko di Lekpo Sɛɛle nwu nkpo baasifi Sur Ɔfaafuu nɛ. Baakyɛ di ɔfaafuu nwu nkpo kamɛ ayi atiɛ, batatũ ntu kunwii.23Di obe wɔ baaladu ni Mara, ntu lawɛ ninfa kafɔɔ batafuo ntu nwu nkpo onyi, diekye ntu nwu nkpo lawɛ olo. (Nkpo oso bɔɔlɛɛ lɛba nwu nkpo alɛ Mara nɛ.)24Nioso batii nwu nkpo lakakatɛ di Mose suoto baabuɛ alɛ, “Belɛsaa nfɛ bubanyi?”25Nioso Mose lapɛ ɔlaa aata SAATE nwu osie kanya, ninfɛ di SAATE nwu latuo nwɔ owoso onwii nɛ. Ni aayɔ owoso nwu aakpee di ntu nwu kamɛ, ninfɛ di ntu nwu nkpo lakple ntu biene nɛ.Nfa nfɛ di SAATE nwu lata ma kufiofa ku sɛsaabla nɛ. Ni aayɔ aasɔ ma aanyu nɛ.26Ni aatɔkɔ ma alɛ, “Nse biɛkyɔɔ SAATE Yaa nwu ɔlaa atoko nwaa, biɛbla lɛsaa le ninlɛ ni di anu nɔɔ, biele kufiofa nɔɔ, biɛbla di sɛsaabla nɔɔ se simuu eekpee ye ni di nnɛɛ kamɛ, ni namata sifiɛ se lata siapɛ ni Egipte batii kuonwii kuwa ye di suoto. Diekye, Ami ninle SAATE wɔ ninyɔɔsa ye ni sifiɛ.”27Obe wɔ di Israel batii ladie ni di Mara, ni baasifi lɛba le manlɛɛ ni Elim nɛ. Nfa baalaanya ntu ntaakɔ lefosi nnyɔ ku awɔsɔ afosi akuɛnsĩ nɛ. Ni baasiɛ ninfa baatɛɛtɛɛ ntu nwu nkpo nɛ.
The Seed Company