ƆLAABUƐTƐ1
Nkpa Diele Lɛsalɛsaa
1Asaatuotɛ nwu, Dawid obisuɔtɔbi wɔ niale ni ɔka di Yerusalem sɛlaa ninle n-se nɛ:2Asaatuotɛ nwu alɛ,“Kasakasa! Kasakasa!Nwaako kasakasa!Lɛsaa biala nle kasakasa.”3Obe di otii n-wɛ ankyeko sɛkpɛ nɔɔ simuu kamɛdi otufu wɔ ootufu ankpa ni di kufĩ kalɔ?4Banantii kunwii obe n-wa kumafe, babamba n-wa,kafɔɔ kasɔ nte dinaa ni kaloo.5Kufĩ ntũ, kufĩ mmɛɛ kafɔɔ,ni kumpɛsɛwa kunkple kunsifi nfũ kuntũ ni nɛ.6Kɔfɛɛfɔ nfɛ kunfe kalakasɔkummunikĩi kunfe katookasɔ;kummana kunkyi kunsifi,kunkple kunsifi kakyekɔ ninkũ obe lele.7Sekle simuu mbiɛ simbuo di lekpo kamɛ,kafɔɔ lekpo nin-yii diidii.Lɛba le di sekle nwu lekye ni yi,lɛba nwu sinkple sinsifi nɛ.8Dibuo ntoobuo asaa amuu,dilenke nnɛɛ.Asaa ɔnya ninmiɛ ninu diidii,ee sɛlaa onu siyii kotoko.9Lɛsaa le nitodiwɛ ni kamakple nin-wɛ,babakple mambla lɛsaa le batodibla nii;lɛsaa fɔle kuninwii nnaa di kufĩ kalɔ.10Lɛsaa lewo nkpe di otii kafuo ni obuɛ alɛ,“Nyu lo! Nle mmle lɛsaa fɔle nɛ”?Diawɛ ninfũ kofokofoko, saa obe kamɛ diawɛ;diawɛ ninfũ fiɛ baalofo wo.11Blosinnyuma saa batii,mba bia nikɔwa ni yi,mba ninkpi kamaa bɔɔwa nidilɔbanyuma ma.Asaa Ya Kamɛ Di Numbentɛ Lafe Nii
12Ami, asaatuotɛ nwu, niale ɔka di Israel suoto di Yerusalem nɛ.13Layɔ suoto nii lata asaa otekete ku ninumbe ɔyɔ owolaa kamɛ di asaa ya amuu baabla ni di osi kalɔ. Diele atoo nutũle kɛɛkɛ di Yaa lɛyɔ eetika di batii suoto!14Ntɔɔnya asaa ya amuu bɔɔbla ni di kufĩ kalɔ; amuu lɛbla kasakasa, ɔkpɛ ɔbla owii di kɔfɛɛfɔ dile.15Blaafuo lɛsaa le niebo ni oyilasa;blaafuo lɛsaa le ninaa ni ɔka.16Latɔkɔ suoto nii nlɛ, “Nyu lo, ntoomuɔ lɛkyɛ sitũ kafɔɔ di ninumbe kamɛ nlenke otii biala niale ni sɛka di Yerusalem suoto fiɛ di ami; ntɔɔwɛ ninumbe ku lɛsaatofo kpinwu.”17Ni layɔ latika di suoto nii nlɛ katofo ninumbe lesɔnu, ku difiibuo ku dibuu kafɔɔ nɛ. Kafɔɔ latofo nlɛ, nle mmle kafɔɔ ɔkpɛ ɔbla owii di kɔfɛɛfɔ dile.18Diekye ninumbe kpinwu nwako sɛnyaami kpinwu owi;di lɛsaatofo kɔpɔ nii, nkpo di sikududu owi kɔpɔ sinkyakaa nɛ.The Seed Company