1 Mose Kukũ Nɔnle29
SAATE Nwu Kanya Ninii Ku Israel Batii Di Moab Kasɔ Suoto
1Nnya kanya ninii sisuku se di SAATE nwu latɔkɔ ni Mose alɛ abla ni ku Israel batii di Moab, dikyakaa ni di kanya ninii le aabla ni ku mma di Horeb Kobokote.2Ninfɛ di Mose lalɛɛ Israel batii nwu bamuu aasiisa aatɔkɔ ma alɛ:Bitɔɔnya ku anu lee lɛsaa le di SAATE nwu labla ni Farao, banɔɔfotii nɔɔ bamuu ku kasɔ nɔɔ kamuu di Egipte.3Ku anu lee amu bianya ɔsɔ onyu kplɛ, atuosaa ya niabla ni ɔkpɛ ku sɛsaabla kplɛ se niabla ni ɔkpɛ nwu nkpo.4Kafɔɔ diɛbase ni di miɛ dii le mmle SAATE nwu diita ye disibu le ninnu ni kasɔ ee anu ya nin-nya nii ee atoko ya ninnu nii.5Di alɛɛ afosi-ana ya lakpaa ye lafenko ni di ɔfaafuu kamɛ, aklesaa lee ditabɛbɛɛ ye di suoto ee ntokota dibubudi di nkpaa lee.6Bitale bloblo, bianyi nta ee nta siene bamba kunwii. Labla nle mmle di mmle biatofo ni bilɛ ami ninle ni SAATE Yaa lee.7Di obe wɔ biadu ni lɛba le mmle, Hesbon ɔka Sihon ku Basan ɔka Og ladie baawa baabakpɛko wo, kafɔɔ bualenkee ma.8Buafũ kasɔ lɛma buata Ruben batii, Gad batii ku Manaase batii kɔna-kakyɛ fɛle atesaa lɛma.9Bilolaa kanya ninii le mmle bitikanko, di mmle di lɛsaa biala biɛbla kamalɛ ninta ye ni.10Bamuu lee biyɛ ninfũ miɛ di SAATEE Yaa lee anu- batunletɛ ku baka batii lee, okpoo banɔɔfo ku banɔɔfotii lee, ku Israel batii bule,11minko babi lee ku basɔfɔ lee ku bafɔɔ ba ninsi ni di kamɛ lee boobudi ntɔɔni manta ye ni, mantuka ni ntu kafɔɔ manta ye nii.12Biyɛ ninfũ di mmle bianii ni kanya ku SAATE Yaa lee, kanya ninii le di SAATE nwu kɔbla ni ku aye miɛ dii le mmle ku kanya otĩi ku ntam,13anfũ ye ankpee ni miɛ dii le mmle fɛ batii nɔɔ bile nii, alɛ aale ye ni Yaa fɛ mmle aabuɛ aatɛ ni di ntam be aaka aata ni bate lee Abraham, Isak ku Yakob.14Diele ku aye lete kɔbla kanya ninii ku ntam nimi be mmle,15aye ba nin-yɛ ni ninfũ ku awo miɛ, di SAATE Yaa loo anu, kafɔɔ ku mba kafɔɔ ninan-yɛ ni ninfũ miɛ.16Aye bamu biye mmle buasiɛ ni di Egipte ku mmle buabuo buafe ni di nnle be di osuku buabadu ni nfũ.17Bianya di kamɛ lɛma ayududusaa lɛma atembi nwu baabla ni ku awosoku, afuɔ ku koto fututu ku koto sɛɛle.18Bilolaa binyu nwaa bilɛ osuɔtɔ ee ɔsanko, kafaabi ee kɔna kukunwii ninsi ni kaamɛ lee miɛ diekyi di SAATE Yaa loo kamaa di otu kamɛ asifi alaasumu nnle nwu nkpo bayaa; bilolaa binyu bilɛ odu kuonwii diesi di kamɛ lee nimawako ni kɔfa-kpile lonle nwu okle.19Nse otii owo lenu ntam sɛlaa se mmle, ɛɛta lɛtɔtrɔ suoto nɔɔ, eenyu kafɔɔ alɛ, “Kamawɛ onwu nnwuna, kuntɛ lɛwɛ onunsie nlɛ kɔkyɛ di ami omu osuku kanya.” Ni nle mmle kamawako letoko nanfi di kasɔ ka di kanto nnɔɔ ni ku kasɔ kosole suoto.20SAATE nwu dilɔbatuna alɛ ɔɔyɔ ankyɛ nwɔ; ɔblɔ nɔɔ yakayaka ku osie kamasoo di otii nwu suoto. Ni akpaani ya amuu bɛɛkpana ni di kukũ ko mmle kamɛ kamawa nwɔ di suoto, SAATE nwu kafɔɔ kamayɛɛsa nwɔ leyooto di kasɔ ka mmle suoto.21SAATE nwu kamadiki lete nɔɔ di Israel ana nwu amuu kamɛ anta letoko nanfi, di mmle kanya di kanya ninii akpaani ya amuu bɛɛkpana ni di Kufiofa Kukũ ko mmle kamɛ nte nii.22Babi lee ba nimawa ni di alɛɛ ya nikɔwa ni sɛɛmaa, ku bafɔɔ ba nimakye ni nsɔ fanfa manwa ni kamanya letoko nanfi le niɛwa ni di kasɔ nwu suoto ku sifiɛ se di SAATE nwu lɛyɔ eekpete ka ni di suoto.23Kasɔ nwu kamuu kamale mmba kasɔ ka nikofiɛ ni ku amã- lɛsalɛsaa kuniwii dilɔbalɛ ɔpɛ ee dikɔntɔ, sɛfa kusinwii dilɔbayila di kasɔ nwu suoto. Kasɔ nwu kamate fɛle Sodom ku Gomora, Adma ku Seboim wɔ di SAATE nwu lawɔɔsa ni ku ɔblɔ yakayaka.24Nnle nwu mmuu batii matɔɔkaalɛ alɛ: “Obe oso di SAATE nwu lɛbla lɛsaa le mmle di kasɔ ka mmle suoto? Obe ɔblɔ yakayaka nɛ?”25Nioso kanya didiki nimale alɛ: “Diekye batii ba mmle lediɛ kanya ninii le di SAATE nwu, bate lɛma Yaa lanii ni ku mma, di obe wɔ aakpaa ma aadieko ni di Egipte kasɔ.26Beedie bɛɛkyɛ boosumu bayaa bamba, manwakasɔ manta ma, bayaa ba manan-ye ni, bayaa ba ananta ma nii.27Nioso di SAATE nwu ɔblɔ lesoo di kasɔ nwu suoto, ni ɛɛyɔ akpaani ya mmle amuu bɛɛkpana ni di kukũ ko mmle kamɛ ɛɛwako ka di suoto nɛ.28Ni di ɔblɔ yakayaka ku lɛblɔfiɛ osie kanya yi, SAATE nwu ladiki ma aakyeko kasɔ lɛma suoto aasifiko kasɔ bamba, fɛ mmle dite ni miɛ nɛ.”29Awofasaa yi, SAATE Yaa loo ále ale, kafɔɔ asaa ya beediki ni kayi nle awo ku babi loo ale dinaa ni kaloo, alɛ buatikanko kufiofa ko mmle sɛlaa simuu.
The Seed Company