1 Mose Kukũ Nɔnle24
Kusĩ Ku Okple Ose Ɔyɔ Kufiofa
1Nse osuɔtɔ owo n-yɔ ɔsanko ɛɛnya alɛ ɔsaabla nɔɔ dilosinkyɛkyɛ nwɔ diekye atɔɔnya kakyi kawo di suoto nɔɔ yi, ɛɛkpana kusinkũ ɛɛta ɔsanko nwu, ɛɛdiki nwɔ di leyo nɔɔ,2ni nse atoodie di osuɔtɔ nwu leyo eesifi, atɔɔlaabla osuɔtɔ bamba ɔsɔfɔ,3ni nse osuɔtɔ nyɔɔfa nwu ninsimbɔ nwɔ, ɛɛkpana kusinkũ ɛɛta ɔsanko nwu, eedie di leyo nɔɔ eesifi ee osuɔtɔ nwu lekpi yi,4ni ɔsa nɔɔ kasale wɔ niasĩ nwɔ ni nnaa osuku ankple an-yɔ ɔsanko nwu di obe wɔ di osuɔtɔ bamba ntootenko nwɔ nii. Lɛsaa nwu mabla diyududusaa di SAATE nwu anu. Tan-yɔ okpile faawako kasɔ ka di SAATE Yaa lɛfɔ kɔyɔ anta fɔ ni fɛ atesaa.5Nse osuɔtɔ owo lɛyɔ ɔsanko sɛfɔlefɔle yi, ni diɛkaatɛ mantɔɔ ankyɛ kakpɛ ee mankpee nwɔ ɔkpɛ bamba owo ninnɛɛ. Dikpeni eesiɛko suoto di leyo lɛlɛɛ ninwii anta suoto n-yɔɔ ɔsɔfɔ fɔle wɔ ɛɛyɔɔ nii.6Tanfũ kukuɔ- bia okuɔlɛ- fɛ kamaa-lesesaa dita koto ko basiko fɔ nii, diekye otii nkpa nfɛ diofũ fɛ kamaa-lesesaa nɛ.7Nse beemufũ otii owo komufũ owo nɔɔ Israel otii anwofasa anta koto ofũ, ɛɛblɔɔ fɛ ɔlanle ee eesunsũ nwɔ yi, dikpeni beelo otii mufũtɛ nwu nkpo. Dikpeni biediki kpiletɛ nwu di kamɛ lee.8Lolaa fanyu nwaa di ofiɛ sɛɛle suoto, faabla fɛ mmle kanya di olebatatɛ ba ninle ni Lewi batii kamatuo fɔ ni. Dikpeni feelolaa fanyu falɛ fɛɛbla di nle latɔkɔ ma ni kanya.9Nyuma lɛsaa le di SAATE Yaa lɛfɔ labla ni Miriam di osuku, di obe wɔ biadie ni di Egipte.10Nse fɛɛfɛnsa lɛsaa lele fɛɛta owo lɛfɔ, tambuo leyo nɔɔ falaafũ lɛsaa le alɛ ɔɔyɔ anta anse ni kamaa.11Yila kaayi faata otii wɔ fɔɔfɛnsa ni lɛsaa nwu adieko kamaa-lesesaa nwu awako fɔ.12Nse dipii nkle otii nwu nkpo, ni tanta kamaa-lesesaa nwu late di ɔkyɛ lɛfɔ kale lasɛ ku nni.13Kplesa dibula nɔɔ faatɔɔ nse kufĩ ntɔɔmɛɛ di mmle abayɔ ni antĩi ni suoto ante ni. Ni abapɛ fɔ sɛfa, mambu ni fɛ ɔsaabla tinini di SAATE Yaa lɛfɔ anu.14Tantafaa kpɛmblatɛ lɛfɔ wɔ ninle ni piitɛ ku otii wɔ diefĩ nii, kuntɛ obilee Israel otii ee ɔfɔɔ wɔ ninsi ni di sekpoo lee nwu onwii kamɛ.15Tɔɔ kɔkpɛnto nɔɔ dii biala fiɛ di kufĩ kumɛɛ, diekye dipii nkle nwɔ, koto nwu eetika disi kafɔɔ nɛ. Nse diele nkpo, abawi anlɛɛ SAATE nwu ankpee fɔ, nimabla lɛpɔɔ okpi di okpile suoto ninta fɔ.16Blɔbalo bate di babi lɛma disi, ee balo babi di bate lɛma disi; obiala makpi di okpile nɔɔ omu suoto.17Bitantafaa ɔfɔɔ ee kuɛbi di kakankɔ, ee biafũ kpisɔfɔ dibula fɛ kamaa-lesesaa.18Binyuma bilɛ balanle biale di Egipte kasɔ, ni di SAATE Yaa lee ladiki ye ninfa nɛ. Nkpo oso kokpee ye kufiofa ko mmle nɛ.19Nse biofiɛlɛ kamɔɔ di kofe lee bieyee ɔmɔɔbu owo ɔyɔ yi, bitankple bialaayɔ nwu. Bidiɛ nwu kute kuta bafɔɔ ku bakuɛbi ku bakpisɔfɔ, di SAATE Yaa lee ata ye lɛtɔtrɔ di nnɛɛ lee sɛkpɛ simuu kamɛ.20Nse fɛɛtɛsɛ kookoo di awoso lɛfɔ suoto di dibi lewo lebu yi, tansinkple faalaakyi sɛla nwu lɛnyɔɔfa faatɛsɛ ni. Diɛ n-ya niebu ni atika ata bafɔɔ, bakuɛbi ku bakpisɔfɔ, di SAATE Yaa lɛfɔ aata fɔ lɛtɔtrɔ di nnɛɛ lɛfɔ ɔkpɛ omuu kamɛ.21Nse fɛɛtɛsɛ alewosobi di kofe lɛfɔ kamɛ yi, tansinkple faalaakyi kofe nwu kamɛ. Diɛ n-ya niebu ni atika ata bafɔɔ, bakuɛbi ku bakpisɔfɔ.22Nyuma falɛ ɔlanle faale di Egipte kasɔ. Nioso kokpee fɔ kufiofa ko mmle nlɛ le kũ nɛ.The Seed Company